నల్గొండలో నీటి వనరుల పరిరక్షణకు సమగ్ర ప్రణాళిక: మంత్రి కోమటిరెడ్డి వెంకట్ రెడ్డి

నల్గొండ జిల్లాలో నీటి వనరుల పరిరక్షణ కోసం సమగ్ర కార్యాచరణ ప్రణాళికను రూపొందించినట్లు మంత్రి కోమటిరెడ్డి వెంకట్ రెడ్డి తెలిపారు. కలెక్టరేట్‌లో నిర్వహించిన జిల్లా నీటి పారుదల సలహా మండలి సమీక్షా సమావేశంలో ఆయన మాట్లాడుతూ, ప్రతి వర్షపు నీటి చుక్కను ఒడిసిపట్టాలని పిలుపునిచ్చారు. జలసిరి కార్యక్రమం ద్వారా భూగర్భ జలాల పెంపునకు చర్యలు చేపడుతున్నామని, ఫార్మ్ పాండ్స్ నిర్మాణంపై ప్రత్యేక దృష్టి పెట్టాలని అధికారులను ఆదేశించారు. ఈ సమావేశంలో పాల్గొన్న హాలియా మున్సిపాలిటీ చైర్మన్ చింతల చంద్రారెడ్డి మాట్లాడుతూ.. హాలియాలో తాగునీటి సమస్య పరిష్కారానికి రంగారెడ్డిగూడెం మిషన్ భగీరథ ప్లాంట్ నుంచి ఎక్కువ నీటిని విడుదల చేసేలా చూడాలని కోరారు. అలాగే జలసిరి కార్యక్రమంలో మున్సిపాలిటీలను కూడా చేర్చి, ఇంకుడు గుంతల ఏర్పాటును ప్రోత్సహించాలని మంత్రికి విజ్ఞప్తి చేశారు.