కొండా లక్ష్మణ్ బాపూజీ 111వ జయంతి వేడుకలు
తెలంగాణ కోసం మంత్రి పదవిని త్యాగం చేసిన మహనీయుడు
అమ్మనబోలు (నల్లగొండ), ట్రైనెట్ న్యూస్, సెప్టెంబర్ 27: ప్రత్యేక తెలంగాణ రాష్ట్ర సాధన కోసం తన మంత్రి పదవిని సైతం త్యాగం చేసిన మహనీయుడు, పద్మశాలి చేనేతల ఆత్మబంధువు స్వర్గీయ ఆచార్య కొండా లక్ష్మణ్ బాపూజీ అని వక్తలు కొనియాడారు.
ఆదివారం ఆచార్య కొండా లక్ష్మణ్ బాపూజీ 111వ జయంతిని పురస్కరించుకుని అమ్మనబోలు గ్రామపంచాయతీ కార్యాలయ ఆవరణలో ఆయన చిత్రపటానికి గ్రామ సర్పంచ్ కొంపల్లి సైదులు, గ్రామస్తులు పూలమాలలు వేసి ఘనంగా నివాళులర్పించారు.
ఈ సందర్భంగా సర్పంచ్ సైదులు మాట్లాడుతూ.. తెలంగాణ రాష్ట్ర సాధన ఉద్యమంలో కొండా లక్ష్మణ్ బాపూజీ పోషించిన పాత్ర చిరస్మరణీయమన్నారు. పద్మశాలి కుల బాంధవులకు ఆయన చేసిన సేవలు మరువలేనివని పేర్కొన్నారు. బాపూజీ ఆశయాలను ఆదర్శంగా తీసుకుని నేటి యువత సమాజ సేవలో ముందుండాలని పిలుపునిచ్చారు.
కార్యక్రమంలో పంచాయతీ కార్యదర్శి ఒంటిపాక లింగస్వామి, ఉపసర్పంచ్ దండు సునీత మల్లేష్, వార్డు సభ్యులు సూల ప్రసాద్, తెలంగాణ చేనేత ఐక్య వేదిక నల్గొండ జిల్లా వర్కింగ్ ప్రెసిడెంట్ పోచం వెంకటేశ్వర్లు, కొమ్ము యాదగిరిగౌడ్, లవకుమార్, సురుగు కుమారస్వామి, బోడ అనిత, ఎస్కే వలి, ఎలుక శిరీష, రాపోలు సంతోష్, దేవాలపల్లి మల్లేష్, ఏలే సోమనందం, భోగ హరిప్రసాద్ తదితరులు పాల్గొన్నారు.
