దివ్యాంగులకు ఇచ్చిన హామీలను వెంటనే అమలు చేయాలి: గోలి ప్రభాకర్

దివ్యాంగులకు ఇచ్చిన హామీలను వెంటనే అమలు చేయాలి: గోలి ప్రభాకర్

నల్గొండ, అక్టోబర్ 6, ట్రైనెట్ న్యూస్ : కాంగ్రెస్ ప్రభుత్వం దివ్యాంగులకు ఇచ్చిన హామీలను వెంటనే అమలు చేయాలని బీజేపీ దివ్యాంగుల విభాగం రాష్ట్ర కో-కన్వీనర్ గోలి ప్రభాకర్ డిమాండ్ చేశారు. ప్రభుత్వ వెయ్యి రోజుల పాలన పూర్తయినా దివ్యాంగులకు ఇచ్చిన హామీల్లో ఒక్కటీ నెరవేర్చలేదని విమర్శించారు. మంగళవారం నల్గొండ జిల్లా బీజేపీ కార్యాలయంలో దివ్యాంగుల విభాగం జిల్లా కన్వీనర్ రాపోలు సంతోష్ కుమార్ అధ్యక్షతన సమావేశం జరిగింది. ఈ సందర్భంగా ప్రభాకర్ మాట్లాడుతూ, దివ్యాంగులకు నెలకు రూ.6,000 పింఛన్, ఉచిత బస్సు ప్రయాణం, 80 శాతం సబ్సిడీతో రుణాలు, ప్రత్యేక శాఖ ఏర్పాటు, స్థానిక సంస్థల ఎన్నికల్లో 5 శాతం రిజర్వేషన్ వంటి హామీలను కాంగ్రెస్ తన మ్యానిఫెస్టోలో ప్రకటించిందన్నారు. దివ్యాంగుల హక్కుల చట్టం–2016ను సమర్థంగా అమలు చేస్తామని కూడా హామీ ఇచ్చిందని తెలిపారు. 32 హామీలు ఇచ్చి దివ్యాంగుల ఓట్లతో అధికారంలోకి వచ్చిన ప్రభుత్వం వాటి అమలుపై నిర్లక్ష్యం వహిస్తోందని ఆయన ఆరోపించారు. ఈ హామీల అమలును కోరుతూ బీజేపీ దివ్యాంగుల విభాగం ఈ వారంలో జిల్లా వ్యాప్తంగా సంతకాల సేకరణ చేపడుతుందని చెప్పారు. దివ్యాంగులను చైతన్యపరిచి సేకరించిన సంతకాలను ప్రభుత్వానికి అందజేస్తామని, అప్పటికీ స్పందన లేకపోతే ఉద్యమాన్ని ఉధృతం చేస్తామని హెచ్చరించారు. సమావేశంలో కో-కన్వీనర్లు పొన్న రమేష్, ముంత మల్లేష్ యాదవ్, పగిళ్ల యాదయ్య తదితరులు పాల్గొన్నారు.