వాటర్షెడ్ అభివృద్ధి, నిర్వహణపై ఉన్నతస్థాయి సమావేశం
జాతీయ వర్షాధార ప్రాంతాల అథారిటీ ఆధ్వర్యంలో సమీక్ష
భవిష్యత్ వాటర్షెడ్ ప్రణాళికలకు జాతీయ సాంకేతిక మార్గదర్శకాలు
న్యూఢిల్లీ, ట్రైనెట్ న్యూస్, సెప్టెంబర్ 23:
దేశంలో వాటర్షెడ్ అభివృద్ధి, నిర్వహణ వ్యవస్థలను మరింత సమర్థవంతంగా తీర్చిదిద్దే లక్ష్యంతో జాతీయ వర్షాధార ప్రాంతాల అథారిటీ (NRAA) ఆధ్వర్యంలో జాతీయ స్థాయి సాంకేతిక కమిటీ సమావేశం న్యూఢిల్లీలోని NASC కాంప్లెక్స్లో నిర్వహించారు. వ్యవసాయం మరియు రైతు సంక్షేమ మంత్రిత్వ శాఖ పరిధిలోని NRAA, REWARD – Rejuvenating Watersheds for Agricultural Resilience through Innovative Development కార్యక్రమంలో భాగంగా ఈ సమావేశాన్ని ఏర్పాటు చేసింది.
NRAA ముఖ్య కార్యనిర్వహణ అధికారి డాక్టర్ చంద్రశేఖర్ కుమార్ అధ్యక్షతన జరిగిన సమావేశంలో ICAR డీడీజీ (NRM) డాక్టర్ ఏ.కె. నాయక్, భూ వనరుల శాఖ సంయుక్త కార్యదర్శి నితిన్ ఖడే, ఒడిశా డైరెక్టర్ డాక్టర్ సుబ్రత్ పాండా తదితరులు పాల్గొన్నారు. కర్ణాటక WDD కమిషనర్ ఉపేంద్ర ప్రతాప్ సింగ్ ఆన్లైన్ ద్వారా సమావేశంలో పాల్గొన్నారు.
ఒడిశా, కర్ణాటక రాష్ట్ర స్థాయి నోడల్ ఏజెన్సీల ప్రతినిధులు, ICAR సంస్థలు, వ్యవసాయ విశ్వవిద్యాలయాలు, IITలు, స్వచ్ఛంద సంస్థలు, కన్సార్టియం భాగస్వాములు, REWARD ప్రాజెక్టు బృందాలు సహా సుమారు 45 మంది సమావేశానికి హాజరయ్యారు.
ఈ సందర్భంగా డాక్టర్ చంద్రశేఖర్ కుమార్ మాట్లాడుతూ, REWARD కార్యక్రమం ద్వారా సేకరించిన క్షేత్రస్థాయి డేటా ఆధారంగా రూపొందిస్తున్న జాతీయ సాంకేతిక మార్గదర్శకాల (NTG) ముసాయిదాలోని అంశాలను సమగ్రంగా ధృవీకరించాలని సూచించారు. ఒడిశా, కర్ణాటక రాష్ట్రాలు వాటర్షెడ్ డేటాతో పాటు డెసిషన్ సపోర్ట్ సిస్టమ్ సమాచారాన్ని సంబంధిత భాగస్వాములతో పంచుకోవాలని కోరారు.
డాక్టర్ ఏ.కె. నాయక్ మాట్లాడుతూ, వాటర్షెడ్ ప్రణాళిక మరింత శాస్త్రీయంగా ఉండేందుకు ల్యాండ్ రిసోర్స్ ఇన్వెంటరీ (LRI), హైడ్రాలజీ అంశాలను సమన్వయం చేయడం అవసరమన్నారు. పరిశోధనల్లో అనుసరించిన పద్ధతులను జాతీయ సాంకేతిక మార్గదర్శకాల్లో స్పష్టంగా పొందుపరచడంతో పాటు సంబంధిత వెబ్ పోర్టళ్లను త్వరగా అభివృద్ధి చేయాలని సూచించారు.
భూ వనరుల శాఖ సంయుక్త కార్యదర్శి నితిన్ ఖడే మాట్లాడుతూ, ప్రాజెక్టుల అమలుకు ఎక్కువ సమయం కేటాయించేలా డీటెయిల్డ్ ప్రాజెక్ట్ రిపోర్ట్ (DPR) తయారీ వ్యవధిని ఆరు నెలల నుంచి మూడు నెలలకు తగ్గించే అంశాన్ని పరిశీలించవచ్చని తెలిపారు. వివిధ శాఖలు, రంగాల మధ్య సమన్వయాన్ని కూడా మార్గదర్శకాల్లో భాగం చేయాలని సూచించారు.
సమావేశ ప్రారంభంలో డాక్టర్ సుసమా సుధిశ్రీ గత జాతీయ స్థాయి సాంకేతిక కమిటీ సమావేశంలో తీసుకున్న నిర్ణయాల అమలు నివేదికను సమర్పించారు. రెండో ముసాయిదా జాతీయ సాంకేతిక మార్గదర్శకాల్లో చేసిన మార్పులు, చేర్పులను వివరించారు.
ఒడిశా, కర్ణాటక రాష్ట్రాలు సేకరించిన సమాచారాన్ని NRAA, కన్సార్టియం భాగస్వాములకు అందించడం ద్వారా విశ్లేషణ, నివేదికల తయారీ, మార్గదర్శకాల ధృవీకరణ మరింత సమర్థవంతంగా జరుగుతుందని అధికారులు పేర్కొన్నారు.
ప్రస్తుతం రూపొందిస్తున్న జాతీయ సాంకేతిక మార్గదర్శకాలు భవిష్యత్లో దేశవ్యాప్తంగా చేపట్టే వాటర్షెడ్ అభివృద్ధి కార్యక్రమాలకు కీలకంగా మారనున్నాయి. ముఖ్యంగా వాటర్షెడ్ డెవలప్మెంట్ కంపోనెంట్ – ప్రధాన మంత్రి కృషి సించాయి యోజన 3.0 కింద అమలు చేసే కార్యక్రమాలకు ఇవి ప్రధాన మార్గదర్శకాలుగా ఉపయోగపడనున్నాయి.
