కొడంగల్, ట్రైనెట్ న్యూస్, నవంబర్ 7:
ఒకప్పుడు వ్యవసాయమే ప్రధాన జీవనాధారంగా ఉన్న కొడంగల్ ప్రాంతం.. ఇక పారిశ్రామిక ప్రగతికి కొత్త వేదికగా మారబోతోంది. పరిశ్రమలు నగరాలకే పరిమితం కాకుండా పల్లెలకు విస్తరించాలనే లక్ష్యంతో తెలంగాణ ప్రభుత్వం చేపట్టిన రేర్ (రేర్– రూరల్ అగ్రికల్చర్ రీజినల్ ఎకానమీ ) ఇండస్ట్రియల్ హబ్ ఈ ప్రాంత అభివృద్ధిలో కీలక మలుపుగా నిలవనుంది. ముఖ్యమంత్రి రేవంత్ రెడ్డి ఈ హబ్ ప్రారంభోత్సవ కార్యక్రమంలో పాల్గొన్నారు.
943 ఎకరాల్లో పారిశ్రామిక ప్రస్థానం
కొడంగల్‌లో 943.34 ఎకరాల విస్తీర్ణంలో ఈ పారిశ్రామిక హబ్‌ను ప్రణాళికాబద్ధంగా అభివృద్ధి చేస్తున్నారు. వివిధ రంగాలకు చెందిన పరిశ్రమలను ఆకర్షించేలా రోడ్లు, నీరు, విద్యుత్ వంటి మౌలిక సదుపాయాలు కల్పించనున్నారు. భూసేకరణ కోసం ఇప్పటికే రూ.220 కోట్లు ఖర్చు చేయగా, మౌలిక వసతుల అభివృద్ధికి రూ.441.91 కోట్ల వ్యయ ప్రణాళిక రూపొందించారు. రేడియల్ రోడ్డు వెంబడి ఈ హబ్ ఉండటం పరిశ్రమలకు రవాణాపరంగా అదనపు ప్రయోజనం కానుంది.
రూ.252.86 కోట్ల పెట్టుబడులు.. 535 మందికి ఉపాధి
ఈ పారిశ్రామిక హబ్‌లోకి ఇప్పటికే రెండు సంస్థలు అడుగుపెట్టాయి. బిర్లా నూ లిమిటెడ్ ఫైబర్ సిమెంట్ బోర్డుల తయారీ పరిశ్రమను ఏర్పాటు చేయనుండగా, ఎకోపామ్ ఆయిల్ అండ్ ఫ్యాట్స్ ప్రైవేట్ లిమిటెడ్ వెజిటబుల్ ఆయిల్స్ తయారీతో పాటు వ్యవసాయ పరిశోధన, అభివృద్ధి కార్యకలాపాలు చేపట్టనుంది. ఈ రెండు సంస్థలకు కలిపి 96 ఎకరాల భూమిని కేటాయించారు. ప్రతిపాదిత పెట్టుబడులు రూ.252.86 కోట్లు కాగా, దాదాపు 535 మందికి ఉద్యోగ అవకాశాలు లభించనున్నాయి.
పల్లెల్లోనే ఉపాధి.. ప్రాంతీయ అభివృద్ధికి బాటలు
హైదరాబాద్ వంటి మహానగరాలకే పారిశ్రామిక అభివృద్ధిని పరిమితం చేయకుండా రాష్ట్రంలోని వెనుకబడిన ప్రాంతాలకూ పెట్టుబడులను తీసుకెళ్లడం ఈ ప్రాజెక్టు ప్రధాన ఉద్దేశం. స్థానిక యువత ఉద్యోగాల కోసం దూర ప్రాంతాలకు వలస వెళ్లకుండా సొంత ప్రాంతంలోనే ఉపాధి పొందే అవకాశం కల్పించడం, వ్యవసాయ ఆధారిత పరిశ్రమలకు ప్రోత్సాహం అందించడం ద్వారా గ్రామీణ ఆర్థిక వ్యవస్థను బలోపేతం చేయాలని ప్రభుత్వం భావిస్తోంది. మొత్తంగా, రేర్ ఇండస్ట్రియల్ హబ్ కొడంగల్‌కు కేవలం పరిశ్రమలను తీసుకురావడమే కాకుండా ఉపాధి, పెట్టుబడులు, మౌలిక సదుపాయాలు, ప్రాంతీయ ఆర్థిక అభివృద్ధికి కొత్త దిశ చూపించే ప్రాజెక్టుగా నిలవనుంది. పారిశ్రామిక ప్రగతి పల్లెబాట పట్టిస్తే గ్రామీణ తెలంగాణ ముఖచిత్రమే మారుతుందనే ఆశలకు ఈ హబ్ నాంది పలుకుతోంది.
పారిశ్రామికవేత్తలతో సీఎం రేవంత్ రెడ్డి ముఖాముఖి..
కొడంగల్‌లో పెట్టుబడులకు ఆహ్వానం
తెలంగాణలో పారిశ్రామిక అభివృద్ధిని అన్ని ప్రాంతాలకు విస్తరించాలనే లక్ష్యంతో ముఖ్యమంత్రి రేవంత్ రెడ్డి కొడంగల్‌లో పారిశ్రామికవేత్తలతో ప్రత్యేక ముఖాముఖి సమావేశం నిర్వహించారు. ఈ సమావేశానికి దాదాపు 100 మంది పారిశ్రామికవేత్తలు, వివిధ పారిశ్రామిక సంఘాల ప్రతినిధులు హాజరయ్యారు.
కొడంగల్ పరిసర ప్రాంతాలతో పాటు హైదరాబాద్ విమానాశ్రయ ప్రాంతం, ఇతర పారిశ్రామిక క్లస్టర్లకు చెందిన ప్రముఖ పారిశ్రామికవేత్తలు ఈ సమావేశంలో పాల్గొన్నారు. ఏరోస్పేస్, రక్షణ రంగం, గ్రీన్ టెక్నాలజీ, పునరుత్పాదక ఇంధనం, ఉక్కు, రాగి, టెక్స్‌టైల్స్, వ్యవసాయ ఆధారిత పరిశ్రమలకు చెందిన ప్రతినిధులతో ముఖ్యమంత్రి చర్చించారు. కొడంగల్ ప్రాంతంలో పారిశ్రామిక పెట్టుబడులకు ఉన్న అవకాశాలు, పరిశ్రమల స్థాపనకు అవసరమైన మౌలిక సదుపాయాలు, స్థానిక యువతకు ఉద్యోగ అవకాశాల కల్పన వంటి అంశాలపై చర్చ జరిగినట్లు సమాచారం. రాష్ట్రంలోని ద్వితీయ శ్రేణి పట్టణాలు, గ్రామీణ ప్రాంతాలకు కూడా పరిశ్రమలను విస్తరించి సమతుల్య అభివృద్ధి సాధించడమే ప్రభుత్వ లక్ష్యంగా ఈ సమావేశం సాగింది. ఈ కార్యక్రమంలో మంత్రులు దుద్దిళ్ల శ్రీధర్ బాబు, తుమ్మల నాగేశ్వరరావు, దామోదర రాజనర్సింహతో పాటు ఎంపీలు, ఎమ్మెల్యేలు, ఎమ్మెల్సీలు, ఉన్నతాధికారులు పాల్గొన్నారు. పారిశ్రామికవేత్తల భాగస్వామ్యంతో కొడంగల్‌ను పెట్టుబడులు, పరిశ్రమలు, ఉపాధి అవకాశాలకు కేంద్రంగా తీర్చిదిద్దే దిశగా ఈ ముఖాముఖి సమావేశం ప్రాధాన్యత సంతరించుకుంది.
