నవంబర్ 4 నుంచి 14 వరకు చిన్నారులకు వాసన్ ఐ కేర్‌లో ఉచిత చికిత్స
హైదరాబాద్, ట్రైనెట్ న్యూస్, నవంబర్ 4:
దీపావళి పండుగ సందర్భంగా బాణసంచా కాల్చేటప్పుడు తల్లిదండ్రులు తమ పిల్లల పట్ల ప్రత్యేక శ్రద్ధ వహించాలని వాసన్ ఐ కేర్ వైద్యులు సూచించారు. టపాసులు కాల్చే సమయంలో తగిన జాగ్రత్తలు తీసుకోకపోతే కళ్లకు తీవ్ర గాయాలై చూపు కోల్పోయే ప్రమాదం ఉందని డాక్టర్ ఖాలీద్ లతీఫ్ , డాక్టర్ మరియా ఫారుకి , డాక్టర్ అంజలీ శుక్ల, డాక్టర్ కౌశిక్ హెచ్చరించారు. హైదరాబాద్ హిమాయత్ నగర్ లోని హాస్పిటల్ లో నిర్వహించిన సమావేశంలో వారు మాట్లాడుతూ... బాణసంచా నుంచి వెలువడే నిప్పురవ్వలు కళ్లపై పడినప్పుడు వెంటనే శుభ్రమైన నీటితో కళ్లను కడిగి, ఆలస్యం చేయకుండా కంటి వైద్యులను సంప్రదించాలని సూచించారు. ముఖ్యంగా చిన్నారులు టపాసులు కాల్చే సమయంలో పెద్దలు దగ్గరుండి పర్యవేక్షించాలని, ముఖానికి దగ్గరగా బాణసంచా కాల్చకుండా తగిన దూరం పాటించేలా చూడాలని తెలిపారు. ఏమాత్రం నిర్లక్ష్యం చేసినా కంటికి శాశ్వత నష్టం కలిగే అవకాశం ఉందని హెచ్చరించారు. దీపావళి సందర్భంగా బాణసంచా ప్రమాదాలకు గురయ్యే చిన్నారులకు అండగా నిలిచేందుకు వాసన్ ఐ కేర్ ప్రత్యేక ఉచిత వైద్య సేవలను అందించనుంది. నాలుగు నుంచి 14 ఏళ్లలోపు పిల్లలకు హైదరాబాద్‌లోని అన్ని వాసన్ ఐ కేర్ ఆస్పత్రుల్లో నవంబర్ 4 నుంచి 14వ తేదీ వరకు ఉచితంగా చికిత్స అందించనున్నట్లు వైద్యులు తెలిపారు. కంటి గాయాలను నిర్లక్ష్యం చేయకుండా వెంటనే వైద్య పరీక్షలు చేయించుకోవాలని సూచించారు. ఈ అవకాశాన్ని తల్లిదండ్రులు సద్వినియోగం చేసుకుని చిన్నారుల కంటి ఆరోగ్యాన్ని కాపాడాలని వారు కోరారు.
