న్యూఢిల్లీ, ట్రైనెట్ న్యూస్, నవంబర్ 04:
పింఛన్‌దారులు ముఖ గుర్తింపు సాంకేతికతను వినియోగించి స్మార్ట్‌ఫోన్‌ ద్వారానే డిజిటల్‌ జీవన ధ్రువపత్రాలను సమర్పించవచ్చని కేంద్ర పింఛన్లు, పింఛన్‌దారుల సంక్షేమ శాఖ సంయుక్త కార్యదర్శి ధ్రువజ్యోతి సేన్‌గుప్తా తెలిపారు. ప్రయాగ్‌రాజ్‌లో బుధవారం నిర్వహించిన దేశవ్యాప్త డిజిటల్‌ లైఫ్‌ సర్టిఫికెట్‌ (డీఎల్‌సీ)–5 మెగా శిబిరంలో ఆయన పాల్గొన్నారు.
ఉత్తర మధ్య రైల్వే ప్రయాగ్‌రాజ్‌ డివిజన్‌, స్టేట్‌ బ్యాంక్‌ ఆఫ్‌ ఇండియా సంయుక్త ఆధ్వర్యంలో డివిజనల్‌ రైల్వే మేనేజర్‌ కార్యాలయంలో ఈ శిబిరాన్ని నిర్వహించారు. పింఛన్‌దారులు, అధికారులతో సేన్‌గుప్తా మాట్లాడి డిజిటల్‌ సేవల వినియోగాన్ని ప్రోత్సహించారు.
వృద్ధులు జీవన ధ్రువపత్రాల కోసం బ్యాంకులు, ఇతర కార్యాలయాల చుట్టూ పదేపదే తిరగాల్సిన అవసరాన్ని ముఖ గుర్తింపు సాంకేతికత తగ్గిస్తుందని ఆయన వివరించారు. పింఛన్‌దారులు ఈ సదుపాయంపై అవగాహన పెంచుకోవడంతో పాటు తోటి పింఛన్‌దారులకు, ముఖ్యంగా వయోవృద్ధులకు దాని ప్రయోజనాలను తెలియజేయాలని సూచించారు.
అర్హులైన ప్రతి పింఛన్‌దారునికీ సకాలంలో సహాయం అందేలా బ్యాంకులు, ప్రభుత్వ శాఖలు, సంబంధిత సంస్థలు నిరంతర అవగాహన కార్యక్రమాలు చేపట్టాలని కోరారు. డిజిటల్‌ సేవలను మరింత విస్తరించి, ఏ ఒక్క అర్హుడూ సేవలకు దూరం కాకుండా అధికారులు చర్యలు తీసుకోవాలని పేర్కొన్నారు.
కార్యక్రమంలో ప్రయాగ్‌రాజ్‌ డివిజనల్‌ రైల్వే మేనేజర్‌ రజనీశ్‌ అగర్వాల్‌, యూఐడీఏఐ డైరెక్టర్‌ ఆకాశ్‌ దీప్‌, ఉత్తర మధ్య రైల్వే ప్రధాన సిబ్బంది అధికారి ముదిత్‌ చంద్ర తదితరులు పాల్గొన్నారు. డీఎల్‌సీ–5 ప్రచార కార్యక్రమాన్ని విజయవంతం చేసేందుకు ఇదే ఉత్సాహంతో ముందుకు సాగాలని అధికారులకు సూచించారు.
