రవీంద్ర భారతిలో మీడియా ప్రముఖులకు జీవన సాఫల్య, ప్రతిభా పురస్కారాలు
రవీంద్ర భారతి, ట్రైనెట్ న్యూస్, అక్టోబర్ 27: వార్తలోని భావాన్ని ప్రేక్షకుల హృదయాలకు చేరవేయాలంటే కేవలం పదాలు చదివితే సరిపోదు.. గళంలో మాధుర్యం, మాటల్లో స్పష్టత, సందర్భానికి తగిన హెచ్చు తగ్గులు ఉండాలని పోలీస్ హౌసింగ్ కార్పొరేషన్ మాజీ చైర్మన్ కోలేటి దామోదర్ గుప్తా అన్నారు. వార్తా కథనానికి స్వరమే ప్రత్యేక ఆకర్షణను తీసుకొస్తుందని, న్యూస్ ప్రెజెంటర్లు ఈ అంశంపై దృష్టి సారించాలని సూచించారు.
ప్రముఖ నటుడు అక్కినేని నాగేశ్వరరావు పేరిట మీడియా రంగ ప్రముఖులకు జీవన సాఫల్య, ప్రతిభా పురస్కారాల ప్రదానోత్సవం
మంగళవారం రాత్రి రవీంద్ర భారతిలోని ప్రధాన వేదికపై వైభవంగా జరిగింది. భాషా సాంస్కృతిక శాఖ సౌజన్యంతో శృతిలయ ఫౌండేషన్, సీల్ వెల్ కార్పొరేషన్ సంయుక్త నిర్వహణలో ఈ కార్యక్రమాన్ని నిర్వహించారు. ముఖ్య అతిథిగా పాల్గొన్న కోలేటి దామోదర్ గుప్తా మాట్లాడుతూ, ప్రజలకు సమాచారాన్ని అందించడంలో మీడియా పాత్ర కీలకమని పేర్కొన్నారు. అయితే రాజకీయ పార్టీల ప్రభావంతో నడిచే పత్రికల్లో ఒకే అంశానికి సంబంధించిన వార్తలు భిన్నంగా ప్రచురితమవుతున్నాయని అభిప్రాయపడ్డారు. వార్తను అందించే విధానంలో బాధ్యత, స్పష్టత, నిబద్ధత అవసరమని పరోక్షంగా సూచించారు.
తెరపై కనిపించేది వార్త.. వినిపించేది గళ కళ!
కార్యక్రమానికి అధ్యక్షత వహించిన సమాచార హక్కు చట్టం మాజీ ముఖ్య కమిషనర్ పి. విజయబాబు మాట్లాడుతూ, న్యూస్ ప్రెజెంటర్లు కేవలం వార్తలు చదివే వారు మాత్రమే కాదని, తమ గళంతో ప్రేక్షకులను ఆకట్టుకునే కళాకారులని అభివర్ణించారు. అందుకే వారిని 'గళ కళాకారులు'గా గుర్తించాలని పేర్కొన్నారు. సినిమా, రంగస్థల కళాకారులకు లభిస్తున్నట్లుగానే టెలివిజన్ న్యూస్ ప్రెజెంటర్లకూ ప్రభుత్వాలు అవార్డులు అందించి ప్రోత్సహించాలని కోరారు. టీజీవో నాయకుడు ఏలూరి శ్రీనివాసరావు మాట్లాడుతూ, శృతిలయ ఫౌండేషన్‌కు చెందిన ఆమని గాయనిగా ప్రతిభ చాటడంతో పాటు, ప్రభుత్వ ఉద్యోగానికి రాజీనామా చేసి తెలంగాణ ఉద్యమంలో క్రియాశీలకంగా పాల్గొన్నారని గుర్తుచేశారు.
మీడియా సేవలకు పురస్కారాల గుర్తింపు
మీడియా రంగంలో విశేష సేవలందించిన ప్రముఖులను ఈ సందర్భంగా పురస్కారాలతో సత్కరించారు. నమస్తే తెలంగాణకు చెందిన రఘు రాములు, మహా న్యూస్‌కు చెందిన కృష్ణమూర్తి, ఆంధ్రప్రభకు చెందిన డాక్టర్ మారం శ్రీనివాస్‌లకు జీవన సాఫల్య పురస్కారాలను ప్రదానం చేశారు. వివిధ టీవీ చానెళ్లు, పత్రికలకు చెందిన విజయ చంద్రిక, ప్రభాకర్, అరుణ్ కుమార్, జితేందర్, మంజుల, అక్షయ, సంధ్య, ప్రియాంక, ధనలక్ష్మి, బ్రాహ్మణిలకు ప్రతిభా పురస్కారాలు అందజేశారు. మైనార్టీ మోర్చా నాయకుడు షేక్ షాజహాన్‌ను అక్కినేని స్ఫూర్తి పురస్కారంతో సత్కరించారు.
పాటలతో ఆరంభం.. ప్రశంసలతో ముగింపు
కార్యక్రమ ప్రారంభంలో ఆమని, సుభాష్, కృష్ణ తదితరులు ఆలపించిన పాటలు సభికులను అలరించాయి. అనంతరం పురస్కార ప్రదానం, ప్రముఖుల ప్రసంగాలతో కార్యక్రమం సందడిగా సాగింది. ఈ కార్యక్రమంలో కుసుమ, భోగరాజు, నరహరి తదితరులు పాల్గొన్నారు.
