న్యాయవాదుల సమస్యల పరిష్కారానికి ప్రత్యేక చొరవ నవంబర్‌లో సీఎం రేవంత్‌రెడ్డితో సమావేశం: టీపీసీసీ చీఫ్ మహేశ్ కుమార్ గౌడ్

దేశంలో ఎక్కడా లేని విధంగా అడ్వకేట్ ప్రొటెక్షన్ యాక్ట్ తీసుకొచ్చాం**

రాజ్యాంగబద్ధ సంస్థలను కేంద్రం నిర్వీర్యం చేస్తోంది

గ్రాడ్యుయేట్ ఎమ్మెల్సీ ఎన్నికల్లో కాంగ్రెస్ అభ్యర్థులను గెలిపించాలి

హైదరాబాద్, ట్రైనెట్ న్యూస్, అక్టోబర్ 24: న్యాయవాదుల సమస్యల పరిష్కారానికి రాష్ట్ర ప్రభుత్వం ప్రత్యేక చొరవ తీసుకుంటుందని టీపీసీసీ అధ్యక్షుడు మహేశ్ కుమార్ గౌడ్ తెలిపారు. న్యాయవాదులు ఎదుర్కొంటున్న సమస్యలపై నవంబర్‌లో ముఖ్యమంత్రి రేవంత్‌రెడ్డితో చర్చించి, పరిష్కారానికి కృషి చేస్తామని వెల్లడించారు. గాంధీ భవన్‌లో నిర్వహించిన టీపీసీసీ లీగల్ సెల్ కార్యవర్గ సమావేశంలో ఆయన మాట్లాడారు.న్యాయవాద వృత్తి ఎంతో గౌరవప్రదమైనదని, అదే సమయంలో కఠినమైన బాధ్యతలతో కూడుకున్నదని మహేశ్ కుమార్ గౌడ్ పేర్కొన్నారు. తాను కూడా న్యాయవాద వృత్తిలోకి రావాలని భావించినప్పటికీ ఆ అవకాశం నెరవేరలేదని చెప్పారు. న్యాయవాద వృత్తి నుంచి వచ్చిన అనేక మంది రాజకీయాల్లో రాణించారని, ప్రజా సమస్యల పరిష్కారంలో కీలక పాత్ర పోషిస్తున్నారని అన్నారు.

రాజ్యాంగబద్ధ సంస్థలను నిర్వీర్యం చేస్తున్న కేంద్రం

కేంద్రంలోని బీజేపీ ప్రభుత్వం రాజ్యాంగబద్ధ సంస్థలను నిర్వీర్యం చేస్తోందని మహేశ్ కుమార్ గౌడ్ విమర్శించారు. దేశంలో వెలువడుతున్న కొన్ని న్యాయస్థానాల తీర్పులను చూసి ఆశ్చర్యం కలుగుతోందని వ్యాఖ్యానించారు. ఎన్నికల సంఘాన్ని కేంద్ర ప్రభుత్వం తన జేబు సంస్థగా ఉపయోగించుకుంటోందని ఆరోపించారు. సీబీఐ, ఈడీ వంటి దర్యాప్తు సంస్థలను కూడా ఇష్టానుసారంగా వినియోగిస్తోందని విమర్శించారు. రాజ్యాంగ సంస్థల స్వతంత్రతను కాపాడటం ప్రజాస్వామ్యానికి అత్యంత అవసరమని ఆయన అభిప్రాయపడ్డారు. ప్రజాస్వామ్య విలువలు, రాజ్యాంగ స్ఫూర్తిని పరిరక్షించేందుకు న్యాయవాదులు కీలక పాత్ర పోషించాలని పిలుపునిచ్చారు.

న్యాయవాదుల సంక్షేమానికి ప్రాధాన్యం

న్యాయవాదుల సంక్షేమానికి కాంగ్రెస్ ప్రభుత్వం ప్రాధాన్యం ఇస్తోందని టీపీసీసీ చీఫ్ తెలిపారు. దేశంలో ఎక్కడా లేని విధంగా తెలంగాణలో అడ్వకేట్ ప్రొటెక్షన్ యాక్ట్ తీసుకొచ్చామని పేర్కొన్నారు. న్యాయవాదుల భద్రత, సంక్షేమం, వృత్తిపరమైన సమస్యల పరిష్కారానికి మరిన్ని చర్యలు తీసుకోవాల్సిన అవసరం ఉందన్నారు. న్యాయవాదులకు అందించే స్టైపెండ్లను పెంచుకునే అంశంపై కూడా దృష్టి సారించాలని సమావేశంలో పేర్కొన్నారు. న్యాయవాదులు ఎదుర్కొంటున్న సమస్యలను గుర్తించి, వాటి పరిష్కారానికి ప్రభుత్వంతో చర్చిస్తామని హామీ ఇచ్చారు.

అభివృద్ధి, సంక్షేమంలో తెలంగాణ ముందంజ

తెలంగాణలో కాంగ్రెస్ ప్రభుత్వం అభివృద్ధి, సంక్షేమ కార్యక్రమాలను సమర్థవంతంగా అమలు చేస్తోందని మహేశ్ కుమార్ గౌడ్ అన్నారు. దేశంలో ఎక్కడా లేని విధంగా అభివృద్ధి, సంక్షేమానికి ప్రాధాన్యం ఇస్తున్నామని పేర్కొన్నారు. ఇప్పటివరకు 80 వేలకు పైగా ఉద్యోగాలు కల్పించామని తెలిపారు.

రాష్ట్రంలో యువతకు ఉపాధి అవకాశాలు కల్పించడం, ప్రజా సంక్షేమాన్ని ముందుకు తీసుకెళ్లడం ప్రభుత్వ ప్రధాన లక్ష్యాలని చెప్పారు.

ఎమ్మెల్సీ ఎన్నికల్లో కాంగ్రెస్ అభ్యర్థులను గెలిపించాలి

రానున్న గ్రాడ్యుయేట్ ఎమ్మెల్సీ ఎన్నికల్లో కాంగ్రెస్ అభ్యర్థులు సామా రామ్మోహన్, సర్వోత్తమ్‌ను గెలిపించాలని మహేశ్ కుమార్ గౌడ్ పార్టీ శ్రేణులకు పిలుపునిచ్చారు. కాంగ్రెస్ అభ్యర్థుల విజయానికి న్యాయవాదులు, పార్టీ నాయకులు, కార్యకర్తలు సమన్వయంతో పనిచేయాలని సూచించారు.