న్యూఢిల్లీ, ట్రైనెట్ న్యూస్, అక్టోబర్ 21: సాయుధ దళాల ప్రధాన కార్యాలయం (ఏఎఫ్‌హెచ్‌క్యూ) ఉద్యోగుల పదోన్నతులు, నియామకాలు, కారుణ్య నియామకాలకు సంబంధించిన సమస్యలను ఉద్యోగుల సంఘం ప్రతినిధులు కేంద్ర మంత్రి డాక్టర్ జితేంద్ర సింగ్ దృష్టికి తీసుకెళ్లారు. బుధవారం జరిగిన సమావేశంలో వారి సమస్యలను విన్న మంత్రి, సంబంధిత అధికారుల ద్వారా పరిశీలించి పరిష్కరించేందుకు చర్యలు తీసుకుంటామని భరోసా ఇచ్చారు.
ప్రధాని నరేంద్ర మోదీ నాయకత్వంలో సిబ్బంది, శిక్షణ విభాగం (డీఓపీటీ) సకాలంలో పదోన్నతులు చేపడుతుండటాన్ని ప్రతినిధులు అభినందించారు. తమ సమస్యలను తెలియజేసేందుకు స్వల్ప వ్యవధిలో కోరినా సమావేశానికి అవకాశం కల్పిస్తున్నందుకు కృతజ్ఞతలు తెలిపారు.
భారతీయ మజ్దూర్ సంఘ్ జాతీయ ప్రధాన కార్యదర్శి (సంస్థాగత) పవన్ కుమార్, ఏఎఫ్‌హెచ్‌క్యూ సంఘం ప్రధాన కార్యదర్శి పంకజ్ యాదవ్ నేతృత్వంలోని ప్రతినిధి బృందం ముఖ్యంగా సెక్షన్ ఆఫీసర్ కేడర్‌లో ఖాళీలు, పదోన్నతి అవకాశాలపై చర్చించింది. 2018–2024 మధ్య యూపీఎస్సీ ద్వారా భర్తీకి ప్రతిపాదించిన ఖాళీలతో పోలిస్తే విధుల్లో చేరిన అభ్యర్థులు చాలా తక్కువగా ఉన్నారని వివరించింది.
వాస్తవ నియామకాల తీరు, భర్తీ కాకుండా మిగిలిన ఖాళీలను పరిగణనలోకి తీసుకొని ప్రస్తుత నియామక కోటాను హేతుబద్ధీకరించే సాధ్యాసాధ్యాలను సంబంధిత అధికారులతో పరిశీలించాలని మంత్రి సూచించారు.
మరణించిన ఉద్యోగుల అర్హులైన కుటుంబ సభ్యులకు కారుణ్య నియామకాల్లో జాప్యం, ప్రస్తుతం అమలులో ఉన్న ఐదు శాతం కోటా, అర్హత నిర్ధారణ ప్రమాణాలపైనా ప్రతినిధులు సమస్యలను వివరించారు. ప్రతిపాదిత మార్పులపై పరిపాలనా, చట్టపరమైన అంశాలతోపాటు నిర్దేశిత అర్హతలను పరిగణనలోకి తీసుకోవాలని మంత్రి పేర్కొన్నారు. అయితే నియామక కోటా లేదా కారుణ్య నియామక నిబంధనల మార్పుపై ఈ సమావేశంలో తుది నిర్ణయం ప్రకటించలేదు.
