80కిపైగా సంస్థల నుంచి 150 మందికిపైగా ప్రతినిధుల భాగస్వామ్యం
న్యూఢిల్లీ, ట్రైనెట్ న్యూస్, అక్టోబర్ 17: వాతావరణ శాస్త్ర పరిశోధనలను ప్రజలకు ఉపయోగపడే సేవలుగా మలచడం, ప్రభుత్వ విధానాలు, వివిధ రంగాల నిర్ణయాలకు అవసరమైన సమాచారాన్ని అందించడం లక్ష్యంగా పుణెలో కీలక సమావేశం జరిగింది. కేంద్ర భూవిజ్ఞాన మంత్రిత్వ శాఖ పరిధిలోని ఇండియన్‌ ఇన్‌స్టిట్యూట్‌ ఆఫ్‌ ట్రాపికల్‌ మెటియోరాలజీ (ఐఐటీఎం) శనివారం ‘క్లైమేట్‌ సైన్స్‌ ఇంటు సర్వీసెస్‌ ఫర్‌ ఇండియా ఫోరం’ (సీఎస్‌ఎస్‌ఐఎఫ్‌) తొలి భాగస్వామ్య పక్షాల సంప్రదింపుల సమావేశాన్ని నిర్వహించింది.
దేశంలోని వివిధ రాష్ట్రాలకు చెందిన 80కిపైగా సంస్థల నుంచి 150 మందికిపైగా ప్రతినిధులు పాల్గొన్నారు. ప్రభుత్వ శాఖలు, పరిశోధన, విద్యాసంస్థలు, సేవలందించే సంస్థలు, స్వచ్ఛంద సంస్థలు, పౌర సమాజం, ప్రైవేటు రంగ ప్రతినిధులు వాతావరణ సమాచార అవసరాలపై చర్చించారు.
ఐఐటీఎం డైరెక్టర్‌ డాక్టర్‌ ఎ. సూర్యచంద్రరావు స్వాగతోపన్యాసం చేశారు. ఇండియన్‌ ఇన్‌స్టిట్యూట్‌ ఆఫ్‌ స్పేస్‌ సైన్స్‌ అండ్‌ టెక్నాలజీ మాజీ డైరెక్టర్‌ ప్రొఫెసర్‌ వి.కె. దధ్వాల్‌ ముఖ్య అతిథిగా ప్రసంగించారు. ఐఐటీఎంలోని సెంటర్‌ ఫర్‌ క్లైమేట్‌ చేంజ్‌ రీసెర్చ్‌ ప్రాజెక్టు డైరెక్టర్‌ డాక్టర్‌ సువర్ణ ఫడ్నవీస్‌ సమావేశ లక్ష్యాలను వివరించారు.
దేశానికి వాతావరణ సేవల సమాచార వ్యవస్థ అవసరంపై ప్రపంచ వాతావరణ సంస్థలోని క్లైమేట్‌ అప్లికేషన్స్‌ అండ్‌ సర్వీసెస్‌ విభాగం మాజీ అధిపతి డాక్టర్‌ రూపా కుమార్‌ కొల్లి ప్రసంగించారు. విధాన నిర్ణయాలకు ఉపయోగపడే వాతావరణ మార్పుల సమాచారం అవసరమని కేంద్ర పర్యావరణ మంత్రిత్వ శాఖ శాస్త్రవేత్త అమర్‌దీప్‌ రాజు వివరించారు. వాతావరణ నమూనాలు, గణాంకాలు, పరిశోధన ఆధారిత సమాచార ఉత్పత్తులపై సీనియర్‌ శాస్త్రవేత్త డాక్టర్‌ స్వప్న పనిక్కల్‌ అవగాహన కల్పించారు.
రంగాలవారీగా నిర్వహించిన చర్చల్లో జలవనరులు, వ్యవసాయం, ఆహార భద్రత, విపత్తుల నిర్వహణ, ముప్పు తగ్గింపు అంశాలకు ప్రాధాన్యం ఇచ్చారు. తీవ్రమైన వర్షపాతం, అధిక ఉష్ణోగ్రతలు, కార్చిచ్చుల ప్రభావం, ప్రజారోగ్య అవసరాలపై ప్రతినిధులు చర్చించారు. పునరుత్పాదక ఇంధనాలకు మార్పు, బీమా, ఆర్థిక నష్టాల అంచనాలో వాతావరణ సమాచారం వినియోగాన్ని పరిశీలించారు.
సముద్ర ఉష్ణ తరంగాలు, సముద్ర జీవ ఉత్పాదకత, తీరప్రాంతాల ముప్పులు, భవిష్యత్‌ వాతావరణ అంచనాలపైనా చర్చలు జరిగాయి. పరిశీలనల ద్వారా సేకరించిన సమాచారాన్ని ఆచరణలో ఉపయోగపడే సేవలుగా మార్చేందుకు అవసరమైన విధానాలపై అభిప్రాయాలు పంచుకున్నారు.
వివిధ రంగాల ప్రతినిధులు తమకు అవసరమైన వాతావరణ సమాచారం, క్షేత్రస్థాయి సవాళ్లు, సేవలపై అంచనాలను తెలియజేశారు. సమావేశంలో వచ్చిన సిఫార్సులు వాతావరణ శాస్త్రం, ప్రభుత్వ విధానాలు, సామాజిక అవసరాల మధ్య అనుసంధానాన్ని బలోపేతం చేసేందుకు దోహదపడనున్నాయి.
భారత వాతావరణ శాఖ, జాతీయ విపత్తు ప్రతిస్పందన దళం, జాతీయ విపత్తు నిర్వహణ సంస్థ, భారతీయ రిజర్వు బ్యాంకు, ఇన్‌కాయిస్‌, భారత వ్యవసాయ పరిశోధన మండలి సంస్థలతోపాటు పలు రాష్ట్ర ప్రభుత్వ విభాగాలు, విశ్వవిద్యాలయాలు, స్వచ్ఛంద సంస్థల ప్రతినిధులు పాల్గొన్నారు. శాస్త్రీయంగా విశ్వసనీయమైన, వినియోగదారుల అవసరాలకు అనుగుణమైన వాతావరణ సేవల అభివృద్ధికి సీఎస్‌ఎస్‌ఐఎఫ్‌ ద్వారా నిరంతర సంప్రదింపులు కొనసాగించనున్నారు.
