లబ్ధిదారుల సంక్షేమమే సంస్కరణల లక్ష్యం కావాలి: సీఎం సుఖ్విందర్‌సింగ్‌ సుఖు
న్యూఢిల్లీ, ట్రైనెట్ న్యూస్‌, అక్టోబర్ 16:
డిజిటల్‌ పరివర్తనతో ప్రజలకు సమర్థమైన సేవలు అందించడమే లక్ష్యంగా హిమాచల్‌ప్రదేశ్‌లోని ధర్మశాలలో రెండు రోజుల ఈ–గవర్నెన్స్‌ సంస్కరణల జాతీయ సదస్సు శుక్రవారం ప్రారంభమైంది. కేంద్ర, రాష్ట్ర, కేంద్రపాలిత ప్రాంతాల ప్రభుత్వ ప్రతినిధులు, నిపుణులు హాజరై వినూత్న పాలనా విధానాలు, ఆధునిక సాంకేతికతతో ప్రజాసేవల మెరుగుదలపై చర్చించారు.
ప్రారంభ సమావేశంలో హిమాచల్‌ప్రదేశ్‌ ముఖ్యమంత్రి సుఖ్విందర్‌సింగ్‌ సుఖు మాట్లాడుతూ.. లబ్ధిదారుల సంక్షేమాన్ని దృష్టిలో ఉంచుకుని సంస్కరణలు చేపట్టాలని అన్నారు. భవిష్యత్‌ సవాళ్లను ఎదుర్కొనేందుకు ఆధునిక సాంకేతికత కీలక సాధనంగా ఉపయోగపడుతుందని పేర్కొన్నారు. ప్రజలకు వారి నివాసాలకు సమీపంలోనే నాణ్యమైన సేవలు అందించేందుకు ప్రభుత్వ శాఖలు కృషి చేయాలని సూచించారు. రాష్ట్రంలో సదస్సు నిర్వహించినందుకు కేంద్ర సహాయ మంత్రి డాక్టర్‌ జితేంద్రసింగ్‌, పరిపాలనా సంస్కరణలు, ప్రజా ఫిర్యాదుల విభాగాన్ని (డీఏఆర్‌పీజీ) అభినందించారు.
డీఏఆర్‌పీజీ కార్యదర్శి నివేదితా శుక్లా వర్మ స్వాగతోపన్యాసం చేస్తూ.. పాలనను మరింత పటిష్ఠంగా, పౌర కేంద్రితంగా మార్చేందుకు జిల్లాలు, రాష్ట్రాలు, కేంద్ర మంత్రిత్వ శాఖలు వినూత్న కార్యక్రమాలు చేపడుతున్నాయని తెలిపారు. ఈ–గవర్నెన్స్‌ జాతీయ పురస్కారాలు, ప్రధానమంత్రి పురస్కారాలకు వచ్చిన నామినేషన్లు ఇందుకు నిదర్శనమన్నారు. ఒక ప్రాంతంలో విజయవంతమైన విధానాన్ని అనేక ప్రాంతాలకు విస్తరించడం ప్రభుత్వాల ముందున్న ప్రధాన సవాలని పేర్కొన్నారు. విజయవంతమైన ప్రయోగాన్ని దేశవ్యాప్త ఆచరణగా మార్చడమే సదస్సు లక్ష్యమని స్పష్టం చేశారు. కేంద్ర మంత్రులు జితేంద్రసింగ్‌, జె.పి. నడ్డా సదస్సుకు శుభాకాంక్షలు తెలిపినట్లు వెల్లడించారు.
హిమాచల్‌ప్రదేశ్‌ ప్రభుత్వ ప్రధాన కార్యదర్శి కమలేశ్‌కుమార్‌ పంత్‌ మాట్లాడుతూ.. ఈ–గవర్నెన్స్‌తో ప్రభుత్వ సేవలు ప్రజల ముంగిటకు చేరుతున్నాయని తెలిపారు. డిజిటల్‌ పాలన ద్వారా విధానపరమైన అడ్డంకులను తగ్గించి, సమాన అవకాశాలతో సేవలను వేగంగా అందించేందుకు కృషి చేస్తున్నట్లు వివరించారు. డీఏఆర్‌పీజీ అదనపు కార్యదర్శి పునీత్‌ యాదవ్‌ వందన సమర్పణ చేశారు.
తొలిరోజు హిమాచల్‌ప్రదేశ్‌కు చెందిన ‘హిమ్‌ పరివార్‌’, ‘సుఖాశ్రయ్‌’, ‘విద్యా సమీక్షా కేంద్రం’, ‘గ్రీన్‌ హిమాచల్‌’, ‘రాజీవ్‌ గాంధీ వన సంవర్ధన్‌ యోజన’ కార్యక్రమాలను ప్రదర్శించారు. ఆరోగ్యం, సామాజిక న్యాయం, విద్య, పర్యావరణం, అటవీ సంరక్షణ రంగాల్లో చేపడుతున్న చర్యలను వివరించారు.
ఇతర సాంకేతిక సమావేశాల్లో అగ్రిస్టాక్‌, ఈ–జాగృతి, ఈ–సంజీవని టెలిమెడిసిన్‌ సేవల్లో కృత్రిమ మేధ ఆధారిత వైద్య నిర్ణయ సహాయక వ్యవస్థ, బహుళ విపత్తుల ముందస్తు హెచ్చరికల నిర్ణయ సహాయక వ్యవస్థ, ఐగాట్‌ కర్మయోగిపై ప్రజంటేషన్లు ఇచ్చారు. ఈ–ఆరోగ్య ధమని, జిల్లా కోర్టు కేసుల నిర్వహణ వ్యవస్థ, ఐసీఎంఆర్‌–మైండ్స్‌, భారత రక్తపోటు నియంత్రణ కార్యక్రమం, డిజి యాత్ర విధానాలనూ వివరించారు.
అక్టోబర్ 17న రెండోరోజు సైబర్‌ భద్రత, ఉత్తమ ఈ–గవర్నెన్స్‌ విధానాలు, వాటి విస్తరణ, డేటా విశ్లేషణతోపాటు రాష్ట్ర, జిల్లా, క్షేత్రస్థాయి కార్యక్రమాలపై చర్చలు జరగనున్నాయి. అనంతరం ముగింపు సమావేశం నిర్వహించనున్నారు.
