న్యూఢిల్లీ, ట్రైనెట్ న్యూస్‌, అక్టోబర్ 16:
ద్వైపాక్షిక రక్షణ భాగస్వామ్యాన్ని మరింత బలోపేతం చేసేందుకు భారత్‌, మంగోలియా పునరుద్ఘాటించాయి. మంగోలియా రాజధాని ఉలాన్‌బాటర్‌లో శుక్రవారం జరిగిన ఇరు దేశాల రక్షణ మంత్రిత్వ శాఖల 14వ సంయుక్త కార్యాచరణ బృందం సమావేశంలో కొనసాగుతున్న సహకార కార్యక్రమాలను సమగ్రంగా సమీక్షించారు. ప్రస్తుత కార్యక్రమాల పురోగతిని పరిశీలించడంతోపాటు పరస్పరం గుర్తించిన రంగాల్లో సహకారాన్ని విస్తరించే చర్యలపై చర్చించారు. ప్రాంతీయ, అంతర్జాతీయ పరిణామాలపైనా అభిప్రాయాలు పంచుకున్నారు.
ఈ సమావేశానికి భారత రక్షణ మంత్రిత్వ శాఖ సంయుక్త కార్యదర్శి డాక్టర్‌ ఇషితా గంగూలీ త్రిపాఠి, మంగోలియా రక్షణ శాఖ డిప్యూటీ స్టేట్‌ సెక్రటరీ బ్రిగేడియర్‌ జనరల్‌ గన్‌సుఖ్‌ ఇ. సంయుక్త అధ్యక్షత వహించారు. ‘నోమాడిక్‌ ఎలిఫెంట్‌’ సంయుక్త సైనిక విన్యాసాలు విజయవంతంగా ముగియడంపై ఇరుపక్షాలు సంతృప్తి వ్యక్తం చేశాయి. మంగోలియా సాయుధ దళాల సిబ్బందికి శిక్షణ, సామర్థ్యాల పెంపులో భారత్‌ అందిస్తున్న నిరంతర సహకారాన్ని మంగోలియా ప్రశంసించింది.
పర్యటనలో భాగంగా డాక్టర్‌ ఇషితా గంగూలీ త్రిపాఠి మంగోలియా సాయుధ దళాల జనరల్‌ స్టాఫ్‌ డిప్యూటీ చీఫ్‌ మేజర్‌ జనరల్‌ ఉసుఖ్‌బయార్‌ జె.తో సమావేశమయ్యారు. ఇరు దేశాల సాయుధ దళాల మధ్య సహకారంలో సాధించిన పురోగతిని సమీక్షించారు. రక్షణ సంబంధాలను మరింత పటిష్ఠం చేసేందుకు, వ్యూహాత్మక భాగస్వామ్యాన్ని ముందుకు తీసుకెళ్లేందుకు అవకాశాలను గుర్తించారు.
భారత ప్రతినిధి బృందం మంగోలియాలోని జాతీయ రక్షణ విశ్వవిద్యాలయాన్ని కూడా సందర్శించింది. భారత సహాయంతో ఏర్పాటు చేసిన సైబర్‌ భద్రత శిక్షణ కేంద్రం పనితీరును పరిశీలించింది. భాషా శిక్షణ, సైబర్‌ భద్రత రంగాల్లో భారత్‌ అందిస్తున్న తోడ్పాటును మంగోలియా అభినందించింది. సామర్థ్యాల పెంపు, విజ్ఞాన మార్పిడి ద్వారా రక్షణ సహకారాన్ని మరింత విస్తరించుకోవాల్సిన ప్రాధాన్యాన్ని తెలియజేసింది.
భారత్‌–మంగోలియా మధ్య చిరకాలంగా కొనసాగుతున్న చారిత్రక, సాంస్కృతిక, నాగరికత సంబంధాలు ప్రస్తుత భాగస్వామ్యానికి బలమైన పునాదిగా నిలుస్తున్నాయి. ఉమ్మడి ఆధ్యాత్మిక విశ్వాసాలు, సాంస్కృతిక వారసత్వం ఇరు దేశాలను మరింత చేరువ చేస్తున్నాయని ఈ పర్యటన చాటిచెప్పింది.
