కార్వార్‌, ట్రైనెట్ న్యూస్‌, అక్టోబర్‌ 16:
భారత నౌకాదళంలో తొలి స్వదేశీ బహుళ ప్రయోజన నౌక ‘ఐఎన్‌ఎస్‌ సమర్థక్‌’ శుక్రవారం సేవల్లోకి ప్రవేశించింది. కర్ణాటకలోని కార్వార్‌లో నిర్వహించిన కార్యక్రమంలో ఉపరాష్ట్రపతి సి.పి. రాధాకృష్ణన్‌ ఈ నౌకను జాతికి అంకితం చేశారు. రక్షణ తయారీ రంగంలో స్వావలంబన సాధనకు, అధునాతన స్వదేశీ నౌకాదళ సామర్థ్యాల అభివృద్ధికి ఇది కీలక మైలురాయిగా నిలిచింది.
ఈ సందర్భంగా ఉపరాష్ట్రపతి మాట్లాడుతూ.. 75 శాతానికి పైగా స్వదేశీ పరిజ్ఞానం, పరికరాలతో రూపొందిన ఐఎన్‌ఎస్‌ సమర్థక్‌ దేశ రక్షణ తయారీ రంగంలో పెరుగుతున్న స్వావలంబనకు ప్రతీకగా నిలుస్తోందన్నారు. భారత సముద్ర ప్రయోజనాలను పరిరక్షించేందుకు నౌకాదళం నిరంతరం అప్రమత్తంగా, యుద్ధ సన్నద్ధతతో ఉందని పేర్కొన్నారు.
దేశీయ ప్రైవేటు నౌకా నిర్మాణ పరిశ్రమ విస్తరిస్తున్న పాత్రకు ఐఎన్‌ఎస్‌ సమర్థక్‌ నిదర్శనమని రాధాకృష్ణన్‌ తెలిపారు. భారత ఘనమైన సముద్ర వారసత్వంతోపాటు భవిష్యత్‌ సముద్ర శక్తికి కార్వార్‌ ప్రతీకగా నిలుస్తోందని అభివర్ణించారు.
