న్యూఢిల్లీ, ట్రైనెట్ న్యూస్, అక్టోబర్ 16:
భారత్‌–పోలండ్‌ మధ్య చారిత్రక బంధాలను, సాంస్కృతిక సంబంధాలను బలోపేతం చేసే లక్ష్యంతో నిర్వహించిన రెండో జామ్‌సాహెబ్‌ స్మారక యువ మార్పిడి కార్యక్రమం విజయవంతంగా ముగిసింది. అక్టోబర్ 7 నుంచి 14 వరకు సాగిన ఈ కార్యక్రమంలో పోలండ్‌కు చెందిన 19 మంది యువ ప్రతినిధులు గుజరాత్‌, మహారాష్ట్ర, న్యూఢిల్లీలో పర్యటించారు. ఇరు దేశాల ఉమ్మడి చరిత్రకు సంబంధించిన స్మారక ప్రదేశాలను సందర్శించడంతోపాటు భారత శాస్త్రీయ, ఆర్థిక, సాంస్కృతిక ప్రగతిని పరిచయం చేసే సంస్థలను వీక్షించారు.
ప్రధానమంత్రి నరేంద్ర మోదీ 2024 ఆగస్టులో పోలండ్‌లో చేపట్టిన అధికారిక పర్యటన సందర్భంగా ఈ కార్యక్రమాన్ని ప్రకటించారు. భారత్‌–పోలండ్‌ వ్యూహాత్మక భాగస్వామ్యానికి సంబంధించిన ఐదేళ్ల కార్యాచరణ ప్రణాళికలో (2024–2028) ఇది భాగంగా ఉంది. ఏటా పోలండ్‌ యువత భారత్‌ను సందర్శించి దేశ చరిత్ర, సంస్కృతి, సంస్థలు, సమకాలీన అభివృద్ధిని తెలుసుకునేలా కార్యక్రమాన్ని రూపొందించారు.
పర్యటనలో గుజరాత్‌లోని జామ్‌నగర్‌లో ఉన్న బాలాచడి పోలిష్‌ బాలల శిబిర స్మారకాన్ని సందర్శించడం ప్రధాన ఘట్టంగా నిలిచింది. రెండో ప్రపంచ యుద్ధంలో నిరాశ్రయులైన పోలిష్‌ చిన్నారులకు మహారాజా జామ్‌సాహెబ్‌ దిగ్విజయ్‌సింహ్‌జీ రంజిత్‌సింహ్‌జీ జడేజా ఆశ్రయం, విద్య, వైద్య సేవలు అందించారు. ఆయన మానవతా సేవలకు గుర్తింపుగా పోలండ్‌ ప్రజలు ఆయనను ‘డోబ్రీ మహారాజా’గా, అంటే ‘మంచి మహారాజు’గా గౌరవిస్తున్నారు. ఈ సందర్శన ద్వారా ఇరు దేశాల అనుబంధానికి పునాదిగా నిలిచిన చారిత్రక ఘట్టాన్ని యువ ప్రతినిధులు తెలుసుకున్నారు.
అనంతరం మహారాష్ట్రలోని కొల్హాపూర్‌లో వలివాడే పోలిష్‌ శరణార్థుల శిబిర స్మారకాన్ని సందర్శించారు. రెండో ప్రపంచ యుద్ధ సమయంలోనూ, అనంతర కాలంలోనూ వేలాది మంది పోలిష్‌ శరణార్థులకు అక్కడ ఆశ్రయం కల్పించారు. బాలాచడి, వలివాడే సందర్శనలు కష్టకాలంలో పోలండ్‌ ప్రజలకు భారత్‌ అందించిన మానవతా సహాయాన్ని ప్రతిబింబించాయి.
న్యూఢిల్లీలో కేంద్ర యువజన వ్యవహారాలు, క్రీడల శాఖ మంత్రి డాక్టర్‌ మన్‌సుఖ్‌ మాండవీయ పోలిష్‌ యువ బృందానికి విందు ఇచ్చి వారితో ముఖాముఖి సంభాషించారు. యువత అభివృద్ధి, భాగస్వామ్యానికి భారత్‌ అనుసరిస్తున్న విధానాలను పరిచయం చేశారు. పరస్పర అవగాహన పెంపొందించేందుకు, ద్వైపాక్షిక సంబంధాలను బలోపేతం చేసేందుకు ప్రజల మధ్య ఇటువంటి మార్పిడి కార్యక్రమాలు దోహదపడతాయని ఈ సమావేశం చాటిచెప్పింది.
విదేశాంగ మంత్రి డాక్టర్‌ ఎస్‌. జైశంకర్‌ను కూడా యువ ప్రతినిధులు కలిశారు. భారత్‌–పోలండ్‌ సంబంధాలు, ఇరు దేశాల అనుబంధాన్ని మరింత బలోపేతం చేయడంలో యువ మార్పిడి కార్యక్రమాల పాత్రపై ఆయనతో చర్చించారు.
గాంధీనగర్‌లోని దండి కుటీర్‌, మహాత్మాగాంధీ జన్మస్థలమైన పోర్‌బందర్‌లోని కీర్తి మందిర్‌ సందర్శనలు చిరస్మరణీయ అనుభవాలుగా నిలిచాయని ప్రతినిధులు పేర్కొన్నారు. భారత చరిత్ర, సాంస్కృతిక వారసత్వాన్ని తెలుసుకునే అవకాశం లభించడంపై కృతజ్ఞతలు తెలిపారు. తమకు లభించిన ఆత్మీయ ఆతిథ్యాన్ని ప్రశంసిస్తూ, ఈ పర్యటన భారత్‌పై అవగాహనను పెంచడంతోపాటు దేశంతో తమ అనుబంధాన్ని మరింత బలపరిచిందని వెల్లడించారు.
జామ్‌సాహెబ్‌ మానవతా వారసత్వాన్ని ముందుకు తీసుకెళ్తూ, యువత ద్వారా భారత్‌–పోలండ్‌ స్నేహబంధాన్ని పటిష్ఠం చేయడంలో ఈ కార్యక్రమం కీలకంగా నిలిచింది.
