న్యూఢిల్లీ, అక్టోబర్ 15 (ట్రైనెట్ న్యూస్): జాతీయ ఆర్థిక సహాయ–ప్రతిభా ఉపకార వేతన పథకం (ఎన్‌ఎంఎంఎస్‌ఎస్) కింద 2026–27 విద్యా సంవత్సరానికి విద్యార్థుల దరఖాస్తుల నమోదు, పరిశీలన ప్రక్రియలను సకాలంలో పూర్తి చేయాలని కేంద్ర విద్యా మంత్రిత్వ శాఖ నొక్కిచెప్పింది. అర్హులైన విద్యార్థులకు ఈ పథకం ద్వారా ఏటా రూ.12 వేల ఉపకార వేతనం అందిస్తున్నట్లు పేర్కొంది.
పథకం అమలు, దరఖాస్తుల పరిశీలన విధానాలను బలోపేతం చేసేందుకు కేంద్ర పాఠశాల విద్య–అక్షరాస్యత విభాగం బుధవారం మధ్యప్రదేశ్‌లోని భోపాల్‌లో ఒకరోజు ప్రాంతీయ అవగాహన–సమీక్ష కార్యశాలను నిర్వహించింది.
ఈ సందర్భంగా పథకం అమలు పురోగతిని సమీక్షించారు. జాతీయ ఉపకార వేతన పోర్టల్ (ఎన్‌ఎస్‌పీ) ద్వారా పథకాన్ని నిర్వహించే విధానంపై అధికారులకు అవగాహన కల్పించారు. విద్యాసంస్థల నోడల్ అధికారులు (ఐఎన్‌ఓలు), జిల్లా నోడల్ అధికారులు (డీఎన్‌ఓలు) స్థాయిలో విద్యార్థుల దరఖాస్తుల పరిశీలనకు సంబంధించి రాష్ట్రాలు ప్రస్తావించిన సమస్యలపై చర్చించారు.
