న్యూఢిల్లీ, అక్టోబర్ 15 (ట్రైనెట్ న్యూస్): జాతీయ కేడెట్ దళం (ఎన్‌సీసీ) విస్తరణకు రాష్ట్రాలు ఆచరణాత్మక ప్రణాళికలు రూపొందించి అమలు చేయాలని కేంద్ర రక్షణ శాఖ సహాయ మంత్రి సంజయ్ సేఠ్ పిలుపునిచ్చారు. ప్రస్తుతం సుమారు 17 లక్షలుగా ఉన్న కేడెట్ల సంఖ్యను 20 లక్షలకు పెంచాలన్న ప్రధాన మంత్రి నరేంద్ర మోదీ లక్ష్యాన్ని సాధించేందుకు సమన్వయంతో కృషి చేయాలని సూచించారు.
అస్సాంలోని గువాహటిలో గురువారం ఎన్‌సీసీ నిర్వహించిన రాష్ట్రాల ప్రతినిధులు, అదనపు డైరెక్టర్ జనరళ్ల ప్రత్యేక సంయుక్త సదస్సుకు ఆయన అధ్యక్షత వహించారు. ఈశాన్య ప్రాంతంలోని ఏడు రాష్ట్రాలతోపాటు పశ్చిమ బెంగాల్, సిక్కింలో ఎన్‌సీసీ విస్తరణ, బలోపేతం, సమర్థ నిర్వహణపై సమావేశంలో చర్చించారు.
ఈ సందర్భంగా సంజయ్ సేఠ్ మాట్లాడుతూ యువతలో ‘దేశమే ప్రథమం’ అనే స్ఫూర్తిని పెంపొందించేలా ప్రోత్సాహం, మార్గదర్శకత్వం అందించాలని కోరారు. కేడెట్లకు మౌలిక వసతులు, మెరుగైన శిక్షణ సదుపాయాలు కల్పించడంపై రాష్ట్రాలు ప్రత్యేక దృష్టి సారించాలని సూచించారు. ఎన్‌సీసీ బలోపేతానికి కేంద్ర ప్రభుత్వం కట్టుబడి ఉందని స్పష్టం చేశారు.
గణతంత్ర దినోత్సవ శిబిరంలో ఈశాన్య రాష్ట్రాల కేడెట్ల భాగస్వామ్యాన్ని ఆయన ప్రశంసించారు. బాలికల నమోదు పెరుగుతుండటం మహిళా సాధికారతకు ఎన్‌సీసీ అందిస్తున్న తోడ్పాటును ప్రతిబింబిస్తోందన్నారు. యువతలో ఆత్మవిశ్వాసం, క్రమశిక్షణ, దేశసేవ పట్ల అంకితభావాన్ని పెంపొందించడంలో ఎన్‌సీసీ కీలక పాత్ర పోషిస్తోందని పేర్కొన్నారు.
రాష్ట్ర ప్రభుత్వాలు, ఎన్‌సీసీ మధ్య సమన్వయం పెంపు, కేడెట్ల సంక్షేమం, శిక్షణ వసతులు, సంస్థాగత బలోపేతం, పరిపాలనాపరమైన సమస్యల పరిష్కారంపై సదస్సులో చర్చించారు. సామాజిక సేవ, సమాజాభివృద్ధి, వ్యక్తిత్వ వికాసం, నాయకత్వ లక్షణాలు, జాతీయ సమైక్యతను పెంపొందించడంలో ఎన్‌సీసీ పాత్రను ప్రముఖంగా ప్రస్తావించారు.
ఈశాన్య ప్రాంత ఎన్‌సీసీ డైరెక్టరేట్ పరిధిలో అరుణాచల్ ప్రదేశ్, అస్సాం, మణిపూర్, మేఘాలయ, మిజోరం, నాగాలాండ్, త్రిపుర రాష్ట్రాల్లో తొమ్మిది గ్రూప్ ప్రధాన కార్యాలయాలు, 50 యూనిట్లు పనిచేస్తున్నాయి. ఈ ప్రాంతంలోని 1,645 విద్యాసంస్థల్లో సుమారు 1.25 లక్షల మంది కేడెట్లు ఉన్నారు. పశ్చిమ బెంగాల్–సిక్కిం డైరెక్టరేట్ పరిధిలో ఆరు గ్రూప్ ప్రధాన కార్యాలయాలు, 56 యూనిట్ల ద్వారా 1,326 విద్యాసంస్థల్లో సుమారు 1.25 లక్షల మంది కేడెట్లు కార్యకలాపాల్లో పాల్గొంటున్నారు.
ఎన్‌సీసీ డైరెక్టర్ జనరల్ లెఫ్టినెంట్ జనరల్ వీరేంద్ర వత్స్ నేతృత్వంలో నిర్వహించిన ఈ సదస్సులో అదనపు కార్యదర్శి దీప్తి మొహిల్ చావ్లా, తొమ్మిది రాష్ట్రాల మంత్రులు, ఉన్నతాధికారులు, రక్షణ మంత్రిత్వ శాఖ, ఎన్‌సీసీ సీనియర్ అధికారులు పాల్గొన్నారు.
