శాంతి పట్ల నిబద్ధతను బలహీనతగా భావించొద్దని హెచ్చరిక ఆధునిక సాంకేతికతతో ‘స్మార్ట్ పవర్’గా ఎదగాలని పిలుపు
న్యూఢిల్లీ, ట్రైనెట్ న్యూస్, అక్టోబర్ 15: పాకిస్థాన్ నుంచి ఉద్భవించే ఉగ్రదాడులకు భారత్ మరింత బలమైన సమాధానం ఇస్తుందని రక్షణ మంత్రి రాజ్‌నాథ్ సింగ్ స్పష్టం చేశారు. ఆపరేషన్ సిందూర్, బాలాకోట్ వైమానిక దాడులు, సర్జికల్ స్ట్రైక్స్ కేవలం సైనిక చర్యలు మాత్రమే కాదని, ఉగ్రవాదాన్ని దాని మూలాల్లోనే నిర్మూలించే దిశగా భారత వైఖరిలో వచ్చిన నిర్ణయాత్మక మార్పునకు ప్రతీకలని పేర్కొన్నారు. గురువారం న్యూఢిల్లీలో నిర్వహించిన రక్షణ సదస్సులో ఆయన ప్రసంగించారు.
చర్చలు, సహజీవనం, వివాదాల శాంతియుత పరిష్కారానికే భారతదేశం ప్రాధాన్యం ఇస్తుందని రాజ్‌నాథ్ తెలిపారు. అయితే శాంతి పట్ల దేశ నిబద్ధతను బలహీనతగా భావించరాదని హెచ్చరించారు. దేశ సార్వభౌమత్వం, సమగ్రత, జాతీయ ప్రయోజనాలను కాపాడేందుకు ఎలాంటి సవాలునైనా ఎదుర్కొనేందుకు సిద్ధంగా ఉన్నామని చెప్పారు. శాంతిని నిలబెట్టేందుకు బలం, సామర్థ్యం అవసరమని అభిప్రాయపడ్డారు.
మారుతున్న ఉగ్రవాద ముప్పుపై అప్రమత్తత
డిజిటల్ యుగంలో భద్రతా సవాళ్లు మరింత సంక్లిష్టమవుతున్నాయని రక్షణ మంత్రి పేర్కొన్నారు. తప్పుడు సమాచార వ్యాప్తి, అస్థిరత సృష్టించడం, వ్యవస్థలకు అంతరాయం కలిగించడం, మోసం, విధ్వంసాన్ని ‘5డీ భద్రతా ముప్పు’గా వివరించారు. ఉగ్రవాదం వ్యవస్థీకృత ముఠాలకే పరిమితం కావడం లేదని, ఒంటరిగా దాడులకు పాల్పడే వ్యక్తులు, ‘వైట్ కాలర్ ఉగ్రవాదం’ వంటి కొత్త ముప్పులపై అప్రమత్తంగా ఉండాలని సూచించారు.
ప్రయాణికుల విమానాన్ని కూల్చేందుకు సహ పైలట్ ప్రయత్నించారన్న ఆరోపణలు వచ్చిన ఘటనను ఈ సందర్భంగా ప్రస్తావించారు. ప్రమాదాన్ని నివారించేందుకు కెప్టెన్ స్మిత్ మచ్చర్ ప్రాణాలకు తెగించి వ్యవహరించారని కొనియాడారు. అప్రమత్తత, ధైర్యం కలిగిన ఒక్క వ్యక్తి కూడా ఉగ్రకుట్రను భగ్నం చేయగలరని అన్నారు. ఉగ్రవాద నిర్మూలనలో భద్రతా సంస్థలతోపాటు బాధ్యతగల పౌరుల భాగస్వామ్యం అవసరమని స్పష్టం చేశారు.
కృత్రిమ మేధతో రక్షణ సామర్థ్యం
ఆధునిక భద్రతా అవసరాలకు అనుగుణంగా సైనిక శక్తి, దౌత్య–సామాజిక ప్రభావాన్ని సమన్వయం చేసే ‘స్మార్ట్ పవర్’ విధానాన్ని అనుసరించాలని రాజ్‌నాథ్ పిలుపునిచ్చారు. కచ్చితత్వంతో లక్ష్యాలను ఛేదించే ఆయుధాలు, లక్ష్య ప్రాంతంలో సంచరిస్తూ దాడిచేసే మందుగుండు వ్యవస్థలతోపాటు తక్కువ ఖర్చుతో సమర్థంగా పనిచేసే సాంకేతికతలను వినియోగించాలన్నారు. మానవ నిఘాకు కృత్రిమ మేధను జోడించడం ద్వారా మారుతున్న సవాళ్లను ఎదుర్కోవాలని సూచించారు.
ఆపరేషన్ సిందూర్‌లో ఆకాశ్ క్షిపణి వ్యవస్థ, బ్రహ్మోస్ వంటి స్వదేశీ రక్షణ వ్యవస్థలు దేశ సాంకేతిక సామర్థ్యాన్ని చాటాయని తెలిపారు. సాయుధ దళాల ఆధునికీకరణ బడ్జెట్‌లో 75 శాతాన్ని దేశీయ పరిశ్రమల నుంచి కొనుగోళ్లకు కేటాయించినట్లు చెప్పారు. ప్రభుత్వ, ప్రైవేటు సంస్థలు, అంకుర సంస్థలు, సూక్ష్మ, చిన్న, మధ్యతరహా పరిశ్రమలు జాతీయ రక్షణలో భాగస్వాములవుతున్నాయని పేర్కొన్నారు.
రూ.1.78 లక్షల కోట్లు దాటిన రక్షణ ఉత్పత్తి
దేశ రక్షణ ఉత్పత్తి విలువ 2014లో రూ.40 వేల కోట్లుగా ఉండగా, ప్రస్తుతం రూ.1.78 లక్షల కోట్లకు పైగా చేరిందని రాజ్‌నాథ్ వెల్లడించారు. రక్షణ ఎగుమతులు 2013–14లో రూ.686 కోట్ల నుంచి రూ.39 వేల కోట్లకు పెరిగాయని తెలిపారు. భారత రక్షణ ఉత్పత్తులు దాదాపు 100 దేశాలకు చేరుతున్నాయని చెప్పారు. ఈ ఏడాది రూ.2 లక్షల కోట్లు, 2029 నాటికి రూ.3 లక్షల కోట్ల రక్షణ ఉత్పత్తిని సాధించడంతోపాటు, 2029 నాటికి ఎగుమతులను రూ.50 వేల కోట్లకు చేర్చాలని లక్ష్యంగా పెట్టుకున్నట్లు వివరించారు.
సాయుధ దళాలు వినియోగించే 175 రకాల మందుగుండు సామగ్రిలో 159 రకాలను దేశీయంగానే ఉత్పత్తి చేస్తున్నామని తెలిపారు. స్వదేశీకరణ కోసం రక్షణ దళాలు 509 అంశాలతో ఐదు జాబితాలను విడుదల చేశాయని, ఆరో జాబితా విడుదలకు సిద్ధమవుతోందని చెప్పారు. రక్షణ ప్రభుత్వ రంగ సంస్థలు గుర్తించిన 5,012 అంశాల్లో 3,255 అంశాల స్వదేశీకరణ పూర్తయిందని పేర్కొన్నారు.
పరిశోధన, ఆవిష్కరణలకు ఐడెక్స్, ఐడెక్స్ ప్రైమ్, అదితి పథకాల ద్వారా ప్రోత్సాహం అందిస్తున్నామని రాజ్‌నాథ్ తెలిపారు. అంకుర సంస్థలు, ఎంఎస్‌ఎంఈల నుంచి రూ.2,400 కోట్లకు పైగా వస్తువులు, సేవల కొనుగోళ్లకు ఆమోదం తెలిపామని, కొత్త సాంకేతికతల అభివృద్ధికి రూ.1,500 కోట్లకు పైగా ప్రాజెక్టులను మంజూరు చేశామని వివరించారు. స్వాతంత్య్ర శతాబ్ది నాటికి భారత్ అభివృద్ధి చెందిన దేశంగా ఎదిగి సాంకేతికత, ఆర్థిక వ్యవస్థ, రక్షణ రంగాల్లో ప్రపంచానికి నాయకత్వం వహిస్తుందని విశ్వాసం వ్యక్తం చేశారు.
