డిశ్చార్జ్ పిటిషన్‌పై అభ్యంతరం.. ₹54.88 కోట్ల చెల్లింపులపై సమాధానం చెప్పాలని డిమాండ్
హైదరాబాద్, ట్రైనెట్ న్యూస్, అక్టోబర్ 13: ఫార్ములా ఈ కార్ రేసు కేసు విషయంలో బీఆర్‌ఎస్ వర్కింగ్ ప్రెసిడెంట్ కేటీఆర్‌పై ప్రభుత్వ విప్ ఆది శ్రీనివాస్ తీవ్ర విమర్శలు చేశారు. కేసును గతంలో తేలికగా తీసుకున్న కేటీఆర్ ఇప్పుడు డిశ్చార్జ్ పిటిషన్ దాఖలు చేసి విచారణ నుంచి తప్పించుకునే ప్రయత్నం చేస్తున్నారని ఆరోపించారు. తప్పు చేయకపోతే విచారణను ఎదుర్కొని తన నిజాయితీని నిరూపించుకోవాలని ఆయన డిమాండ్ చేశారు.
54.88 కోట్ల చెల్లింపులపై ప్రశ్నలు
ఫార్ములా ఈ రేసు నిర్వహణకు సంబంధించి ఫార్ములా ఈ ఆపరేషన్స్ సంస్థకు చేసిన ₹54.88 కోట్ల చెల్లింపులపై ఆది శ్రీనివాస్ ప్రశ్నలు లేవనెత్తారు. ఈ నిధులను ఎవరి అనుమతితో చెల్లించారో కేటీఆర్ స్పష్టత ఇవ్వాలని కోరారు. ఈ వ్యవహారంలో ఉన్న ఆరోపణలపై న్యాయపరమైన విచారణ ద్వారా వాస్తవాలు వెలుగులోకి రావాల్సి ఉందని పేర్కొన్నారు.
కోర్టులపై నమ్మకం ఉంది: ఆది శ్రీనివాస్
కేటీఆర్ గతంలో ఏసీబీ విచారణ సందర్భంగా చేసిన వ్యాఖ్యలను ప్రస్తావిస్తూ, ఇప్పుడు కోర్టును ఆశ్రయించడంపై ఆది శ్రీనివాస్ విమర్శలు గుప్పించారు. విచారణను ఎదుర్కొని ఆరోపణలకు సమాధానం చెప్పాలని సూచించారు. న్యాయస్థానాల ద్వారా ఈ వ్యవహారంలోని వాస్తవాలు బయటపడతాయని విశ్వాసం వ్యక్తం చేశారు.
ఇదిలా ఉండగా, ఫార్ములా ఈ కేసులో తనపై అభియోగాలు కొనసాగించేందుకు తగిన ఆధారాలు లేవని పేర్కొంటూ కేటీఆర్ డిశ్చార్జ్ పిటిషన్ దాఖలు చేశారు. ఈ పిటిషన్‌పై కౌంటర్ దాఖలు చేయాలని ఏసీబీని న్యాయస్థానం ఆదేశించింది. తదుపరి విచారణను అక్టోబర్ 30కి వాయిదా వేసింది
