న్యూఢిల్లీ, ట్రైనెట్ న్యూస్, అక్టోబర్ 13: స్వదేశీ పరిజ్ఞానంతో నిర్మించిన బహుళ ప్రయోజన యుద్ధనౌక ‘సమర్థక్‌’ను భారత నౌకాదళం అక్టోబర్ 16న కర్ణాటకలోని కార్వార్‌ నౌకాదళ స్థావరంలో అధికారికంగా సేవల్లోకి ప్రవేశపెట్టనుంది. కేంద్ర ప్రభుత్వ ‘మేక్‌ ఇన్‌ ఇండియా’ కార్యక్రమంలో భాగంగా లార్సెన్‌ అండ్‌ టూబ్రో సంస్థ నిర్మించిన ఈ నౌక, నౌకాదళంలో చేరనున్న నాలుగు బహుళ ప్రయోజన నౌకల్లో మొదటిది.
రక్షణ రంగంలో స్వావలంబన సాధించే దిశగా ‘సమర్థక్‌’ ప్రవేశం మరో కీలక మైలురాయిగా నిలవనుంది. వ్యూహాత్మకంగా ప్రాధాన్యమున్న కార్యకలాపాల్లో వివిధ అవసరాలకు ఉపయోగపడే నౌకగా ఇది సేవలందించనుంది.
ప్రధానంగా సముద్ర నిఘా, గస్తీ కోసం రూపొందించిన ‘సమర్థక్‌’ తక్కువ తీవ్రత గల సముద్ర కార్యకలాపాలను కూడా నిర్వహించగలదు. లక్ష్యాల మోహరింపు, పరీక్షలకు వేదికగా, మానవరహిత, స్వయంచాలిత వ్యవస్థలకు మాతృనౌకగా పనిచేసే సామర్థ్యం దీనికి ఉంది.
మానవతా సహాయం, విపత్తు సహాయక చర్యల్లోనూ ఈ నౌకను వినియోగించవచ్చు. అవసరమైనప్పుడు పరిమిత వైద్య సేవలందించే ఆసుపత్రి నౌకగా మార్చుకునే సౌలభ్యం ఉంది. సముద్రంలో ప్రమాదానికి గురైన నౌకల రక్షణ, వెలికితీత కార్యకలాపాలకు కూడా తోడ్పడనుంది.
సవాళ్లతో కూడిన సముద్ర వాతావరణంలో కార్యకలాపాలు నిర్వహించేందుకు అనువుగా స్వదేశీ సెన్సర్లు, ఆయుధాలు, ఎలక్ట్రానిక్‌ వ్యవస్థలను సమగ్ర పోరాట వ్యవస్థలో అనుసంధానించారు.
‘సమర్థక్‌’ చిహ్నంలో అలల నుంచి బయటకు వస్తున్న భారతీయ ఏనుగును చిత్రించారు. ఇది నౌక బలం, తెలివితేటలు, చురుకుదనానికి ప్రతీకగా నిలుస్తోంది.
