న్యూఢిల్లీ, ట్రైనెట్ న్యూస్, అక్టోబరు 13 :
వివిధ దేశాల ప్రభుత్వ అధికారుల మధ్య భాషా అడ్డంకులను తొలగించేందుకు భాషిణి బహుభాషా కృత్రిమ మేధ సేవలు తోడ్పడుతున్నాయి. ముస్సోరీలోని జాతీయ సుపరిపాలన కేంద్రం (ఎన్‌సీజీజీ) ఆధ్వర్యంలో అక్టోబరు 12 నుంచి 23 వరకు నిర్వహిస్తున్న పట్టణ సేవల అందజేతపై సామర్థ్య నిర్మాణ కార్యక్రమంలో భాషిణి తక్షణ బహుభాషా సమాచార మార్పిడికి సహకారం అందిస్తోంది.
కేంద్ర ఎలక్ట్రానిక్స్, సమాచార సాంకేతిక మంత్రిత్వ శాఖ పరిధిలోని డిజిటల్ ఇండియా కార్పొరేషన్‌కు చెందిన డిజిటల్ ఇండియా భాషిణి విభాగం ఈ సేవలను అందుబాటులోకి తీసుకొచ్చింది. భారత విదేశాంగ మంత్రిత్వ శాఖ ప్రాయోజకత్వంతో, పరిపాలనా సంస్కరణలు–ప్రజా ఫిర్యాదుల విభాగం పరిధిలోని ఎన్‌సీజీజీ ఈ కార్యక్రమాన్ని నిర్వహిస్తోంది. భారత సాంకేతిక, ఆర్థిక సహకార కార్యక్రమం (ఐటీఈసీ) ద్వారా చేపడుతున్న అంతర్జాతీయ సామర్థ్య నిర్మాణ ప్రయత్నాల్లో ఇది భాగంగా ఉంది.
పెరూ, కంబోడియా, నైజీరియా, కెన్యా, పాలస్తీనా, లెబనాన్, గాంబియా, ఈక్వెడార్, స్పెయిన్ తదితర దేశాలకు చెందిన ప్రభుత్వ అధికారులు, ప్రభుత్వ రంగ ప్రతినిధులు ఇందులో పాల్గొంటున్నారు. పాలన, పట్టణ సేవల అందజేతలో అనుభవాలు, ఉత్తమ విధానాలను పరస్పరం పంచుకునేందుకు ఈ కార్యక్రమం వేదికగా నిలుస్తోంది.
ప్రారంభ పరిచయ సమావేశంలో భాషిణి తన ‘శ్రుత్‌లేఖ్’ వేదిక ద్వారా ఆంగ్లం నుంచి స్పానిష్‌కు, స్పానిష్ నుంచి ఆంగ్లానికి తక్షణ అనువాద సేవలను అందించింది. దీంతో భాషా భేదాలు ఉన్నప్పటికీ విదేశీ ప్రతినిధులు పరస్పరం సంభాషించడంతోపాటు చర్చల్లో సమర్థంగా పాల్గొనగలిగారు.
మాటల ఆధారిత బహుభాషా కృత్రిమ మేధకు ప్రాధాన్యమిచ్చే భాషిణి విధానానికి ఈ వినియోగం ఉదాహరణగా నిలిచింది. వాక్కు ఆధారిత సాంకేతికతతో సమాచార మార్పిడిని, డిజిటల్ సేవలను మరింత సులభంగా అందుబాటులోకి తీసుకురావడమే దీని లక్ష్యం. అంతర్జాతీయ సహకారం, ప్రభుత్వ రంగ అధికారుల సామర్థ్యాభివృద్ధిలో కృత్రిమ మేధ ఆధారిత భాషా పరిష్కారాల ఉపయోగాన్ని ఈ కార్యక్రమం చాటిచెప్పింది.
భాషిణి బృందం పాల్గొనే ప్రతినిధులకు శ్రుత్‌లేఖ్ వినియోగంపై సహకారం అందించింది. భాషిణి వ్యవస్థ, బహుభాషా కృత్రిమ మేధ సామర్థ్యాలు, వైద్యం, ఆర్థిక సేవలు, వ్యవసాయం, ప్రజా సేవల అందజేత వంటి రంగాల్లో వాటి ఉపయోగాలను వివరించింది. రోజువారీ సంభాషణలు, డిజిటల్ కార్యకలాపాల్లో భాషా అడ్డంకులను అధిగమించేందుకు భాషిణి మొబైల్ యాప్‌లోని సదుపాయాలను పరిశీలించాలని ప్రతినిధులను ప్రోత్సహించింది.
అక్టోబరు 23న ముగిసే ఈ కార్యక్రమం అంతటా నిర్వహణ అవసరాలకు అనుగుణంగా శ్రుత్‌లేఖ్ సేవలను అందుబాటులో ఉంచనున్నారు. విభిన్న సంస్కృతుల మధ్య సంభాషణలను బలోపేతం చేయడం, విజ్ఞాన మార్పిడిని సులభతరం చేయడం, అంతర్జాతీయ శిక్షణ కార్యక్రమాల్లో అందరి భాగస్వామ్యాన్ని పెంపొందించడంలో ఈ సాంకేతికతకు ఉన్న అవకాశాలను ఈ కార్యక్రమం వెల్లడిస్తోంది.
భాషిణి సేవల విస్తరణ
డిజిటల్ ఇండియా భాషిణి విభాగం డేటాసెట్లు, కృత్రిమ మేధ నమూనాలు, అప్లికేషన్ ప్రోగ్రామింగ్ ఇంటర్‌ఫేస్‌లు (ఏపీఐలు), బహుభాషా యాప్‌ల ద్వారా దేశంలో భాషా కృత్రిమ మేధ వ్యవస్థను అభివృద్ధి చేస్తోంది. భారత భాషా డిజిటల్ ప్రజా మౌలిక సదుపాయంగా డిజిటల్ వేదికలు, సేవల్లో భాషా సాంకేతికతలను అనుసంధానించేందుకు భాషిణి తోడ్పడుతోంది.
ఇప్పటివరకు 800కు పైగా ప్రభుత్వ వెబ్‌సైట్లతో సహా మొత్తం 2,353 ప్రభుత్వ డిజిటల్ వేదికల్లో భాషిణి ఆధారిత భాషా సాంకేతికతలను అనుసంధానించారు. ఈ వేదిక పాఠ్య రూపంలో 36 భారతీయ భాషలకు, వాక్కు రూపంలో 23 భారతీయ భాషలకు, అలాగే 35 అంతర్జాతీయ భాషలకు మద్దతు ఇస్తోంది. ఇప్పటివరకు 900 కోట్లకు పైగా కృత్రిమ మేధ ఆధారిత ప్రాసెసింగ్ అభ్యర్థనలను నిర్వహించింది. రోజుకు 2.4 కోట్లకు పైగా అభ్యర్థనలను ప్రాసెస్ చేస్తూ, భాషా సాంకేతికత ద్వారా డిజిటల్ సేవలను మరింత మందికి చేరువ చేస్తోంది.
