న్యూ ఢిల్లీ, అక్టోబర్ 10 (ట్రైనెట్ న్యూస్) : 24
మంది జర్నలిస్టులు పాల్గొన్న మూడు వారాల రక్షణ విలేకరుల శిక్షణ కోర్సు తేజ్‌పూర్‌లో ముగిసింది. నౌకాదళం, వాయుసేన, సైన్యానికి సంబంధించిన శిక్షణ దశలను పూర్తి చేసిన అనంతరం ముగింపు కార్యక్రమం నిర్వహించారు.
త్రివిధ దళాల పాత్రలు, సామర్థ్యాలు, విధులు నిర్వహించే పరిస్థితులపై జర్నలిస్టులకు అవగాహన కల్పించారు. వివరణాత్మక సమావేశాలు, క్షేత్రస్థాయి సందర్శనలు, సైనిక సిబ్బందితో ముఖాముఖి చర్చల ద్వారా సాయుధ దళాల పనితీరు, రక్షణ రంగ వార్తల సేకరణలో పాటించాల్సిన బాధ్యతలను వివరించారు.
ఈ కార్యక్రమం సాయుధ దళాలు, మీడియా మధ్య పరస్పర అవగాహనను మరింత బలోపేతం చేసింది. సైనిక కార్యకలాపాలకు సంబంధించిన సున్నితమైన అంశాలు, జాతీయ భద్రతను దృష్టిలో ఉంచుకుంటూ ప్రజల్లో అవగాహన పెంపొందించాలనే ఉమ్మడి నిబద్ధతను చాటింది.
గజరాజ్ కార్ప్స్ జనరల్ ఆఫీసర్ కమాండింగ్ లెఫ్టినెంట్ జనరల్ నీరజ్ శుక్లా ముగింపు కార్యక్రమానికి అధ్యక్షత వహించారు. రక్షణ మంత్రిత్వ శాఖ అదనపు డైరెక్టర్ జనరల్ (మీడియా అండ్ కమ్యూనికేషన్) విజయ్ కుమార్‌తోపాటు ప్రజాసంబంధాల డైరెక్టరేట్ అధికారులు పాల్గొన్నారు.
