న్యూఢిల్లీ, అక్టోబర్‌ 9 (ట్రైనెట్ న్యూస్):
పత్తి రైతుల జీవనోపాధిని మెరుగుపరచడం, విలువ ఆధారిత ఉత్పత్తులను ప్రోత్సహించడం, అంతర్జాతీయ భాగస్వామ్యాలను బలోపేతం చేయడం లక్ష్యంగా భారత్‌, మాలి దేశాలు ప్రపంచ పత్తి దినోత్సవ కార్యక్రమాన్ని సంయుక్తంగా నిర్వహించాయి. అక్టోబర్‌ 7న న్యూయార్క్‌లోని ఐక్యరాజ్యసమితి ప్రధాన కార్యాలయంలో ‘సుస్థిరత కోసం పత్తి: జీవనోపాధి, విలువ జోడింపు, భాగస్వామ్యం’ అనే అంశంపై ఈ కార్యక్రమం జరిగింది.
ఐరాస సాధారణ సభ 75/318 తీర్మానం ద్వారా అక్టోబర్‌ 7ను ప్రపంచ పత్తి దినోత్సవంగా ప్రకటించింది. ముఖ్యంగా అభివృద్ధి చెందుతున్న, అత్యల్ప అభివృద్ధి చెందిన దేశాల్లో ఆర్థికాభివృద్ధి, అంతర్జాతీయ వాణిజ్యం, పేదరిక నిర్మూలనలో పత్తి పాత్రను ఈ దినోత్సవం తెలియజేస్తోంది. కార్యక్రమంలో భారత పార్లమెంట్‌ సభ్యులు, వివిధ దేశాల ప్రతినిధులు, అంతర్జాతీయ సంస్థల అధికారులు పాల్గొన్నారు.
ఐరాసలో భారత శాశ్వత ప్రతినిధి హరీశ్‌ పర్వతనేని స్వాగతోపన్యాసంలో మహాత్మాగాంధీ పత్తి, చరఖాలను స్వావలంబన, ఆత్మగౌరవం, భారత స్వాతంత్ర్య పోరాటంతో అనుసంధానించిన విషయాన్ని గుర్తుచేశారు. ఉత్పత్తిదారుల జీవనోపాధికి మద్దతు, విలువ జోడింపు–మార్కెట్‌ అవకాశాల విస్తరణ, సుస్థిరత, సాంకేతికత–భాగస్వామ్యాల బలోపేతం అనే నాలుగు ప్రాధాన్యాలను వివరించారు. అందుబాటు ధరల్లో ముడిపదార్థాలు, ఆర్థిక వనరులు, చిన్న సంస్థలకు సహకారం అవసరమని పేర్కొన్నారు.
మాలి శాశ్వత ప్రతినిధి ఇస్సా కాన్‌ఫురూ మాట్లాడుతూ తమ దేశ ఆర్థిక వ్యవస్థకు, గ్రామీణ జీవనోపాధికి పత్తి ఎంతో కీలకమన్నారు. పరిమిత ప్రాసెసింగ్‌ సామర్థ్యం, ఉత్పత్తి వ్యయాలు, మార్కెట్‌ ప్రవేశ సమస్యలు, వాణిజ్యాన్ని ప్రభావితం చేసే మద్దతు విధానాలు సవాళ్లుగా ఉన్నాయని తెలిపారు. దేశీయ ప్రాసెసింగ్‌, ఉపాధిని పెంచేందుకు పరస్పర ప్రయోజనకర భాగస్వామ్యాలను స్వాగతిస్తూ, భారత్‌ను ముఖ్య భాగస్వామిగా పేర్కొన్నారు.
పశ్చిమ బెంగాల్‌లోని బోల్పూర్‌ కాంతా ఎంబ్రాయిడరీ అనుభవాన్ని ఎంపీ అసిత్‌ కుమార్‌ మాల్‌ వివరించారు. సంప్రదాయ హస్తకళలు పత్తి ఉత్పత్తులకు అదనపు విలువను కల్పించడంతోపాటు మహిళల ఉపాధి, పునర్వినియోగానికి తోడ్పడుతున్నాయని చెప్పారు. కళాకారులకు న్యాయమైన పారితోషికం, తక్కువ వ్యయంతో రుణాలు, డిజైన్‌ సహకారం, మార్కెట్‌ అవకాశాలు అవసరమని సూచించారు.
తమిళనాడులో పత్తి అల్లిక దుస్తులు, వస్త్ర తయారీ రంగాల అభివృద్ధిలో చిన్న సంస్థలు, ఉమ్మడి మౌలిక సదుపాయాలు, నైపుణ్యం కలిగిన కార్మికుల పాత్రను ఎంపీ ఎల్‌.కె. సుధీశ్‌ వివరించారు. పీఎం మిత్ర పథకం కింద అభివృద్ధి చేస్తున్న సమీకృత టెక్స్‌టైల్‌ పార్కుతోపాటు వస్త్ర ప్రాసెసింగ్‌లో మురుగునీటి శుద్ధి, పునర్వినియోగ చర్యలను ప్రస్తావించారు.
కేంద్ర జౌళి మంత్రిత్వ శాఖ సంయుక్త కార్యదర్శి పద్మిని సింగ్లా మాట్లాడుతూ ప్రపంచంలో ప్రధాన పత్తి ఉత్పత్తి, వినియోగ దేశాల్లో భారత్‌ ఒకటని తెలిపారు. చిన్న, సన్నకారు రైతులకు ఈ రంగం ప్రాధాన్యాన్ని వివరించారు. ‘మిషన్‌ ఫర్‌ కాటన్‌ ప్రొడక్టివిటీ’, ‘కస్తూరి కాటన్‌ భారత్‌’ కార్యక్రమాల ద్వారా ఉత్పాదకత, నాణ్యత, ఉత్పత్తి మూలాన్ని గుర్తించే వ్యవస్థలను మెరుగుపరచడంపై దృష్టి సారిస్తున్నట్లు చెప్పారు.
వివిధ దేశాల ప్రతినిధులతోపాటు ఐరాస ఆహార, వ్యవసాయ సంస్థ న్యూయార్క్‌ అనుసంధాన కార్యాలయ డైరెక్టర్‌ అంజెలికా జాకోమ్‌, అంతర్జాతీయ పత్తి సలహా కమిటీ ప్రధాన శాస్త్రవేత్త డాక్టర్‌ కేశవ్‌ ఆర్‌. క్రాంతి ప్రసంగించారు. పత్తి విలువ గొలుసుల బలోపేతం, చిన్న రైతులు–కళాకారులకు మద్దతు, ప్రాసెసింగ్‌ సామర్థ్యం, మార్కెట్‌ అవకాశాలు, ఆధునిక శాస్త్ర సాంకేతిక వినియోగంపై చర్చించారు.
ఈ సందర్భంగా భారత నిపుణ కళాకారుడి మార్గదర్శకత్వంలో పాల్గొన్నవారు పత్తి వస్త్రంపై పెన్‌ కలంకారీ కళను స్వయంగా అభ్యసించారు. ఈ ప్రదర్శన భారత హస్తకళా సంప్రదాయాల వైభవాన్ని చాటింది.
