న్యూఢిల్లీ, అక్టోబర్ 9 (ట్రైనెట్ న్యూస్): ప్రపంచ వాణిజ్యంలో స్థిరపడిన నిబంధనలు ప్రశ్నార్థకమవుతున్న తరుణంలో పటిష్ఠమైన న్యాయ విశ్లేషణ మరింత అవసరమని కేంద్ర వాణిజ్య కార్యదర్శి రాజేశ్‌ అగర్వాల్‌ అన్నారు. సుస్థిరతతో ముడిపడిన వాణిజ్య చర్యలు, డిజిటల్‌ వాణిజ్యం వంటి అంశాలు అంతర్జాతీయ వాణిజ్య అజెండాను పునర్నిర్మిస్తున్నాయని పేర్కొన్నారు.
న్యూఢిల్లీలోని ప్రధానమంత్రి మ్యూజియం అండ్‌ లైబ్రరీలో అక్టోబర్ 7న నిర్వహించిన సెంటర్‌ ఫర్‌ ట్రేడ్‌ అండ్‌ ఇన్వెస్ట్‌మెంట్‌ లా (సీటీఐఎల్‌) తొమ్మిదో వార్షికోత్సవానికి ఆయన వీడియో సందేశం అందించారు. తొమ్మిదేళ్లలో సంస్థ నిరంతర పరిశోధన, సమగ్ర న్యాయ విశ్లేషణతో ప్రభుత్వం, పరిశ్రమలు, వాణిజ్య న్యాయ నిపుణుల విశ్వాసాన్ని పొందిందని అభినందించారు. స్వేచ్ఛా వాణిజ్య ఒప్పందాల చర్చలు, వివాద పరిష్కారం, సంస్థాగత అనుభవాన్ని భద్రపరచడంలో వాణిజ్య శాఖకు సీటీఐఎల్‌ అందిస్తున్న సహకారాన్ని ప్రస్తావించారు.
అంతర్జాతీయ ఆర్థిక న్యాయ పరిణామాలను అనుసరించడంతోపాటు వాటికి దిశానిర్దేశం చేయగల సీటీఐఎల్‌ వంటి సంస్థలు భారత్‌కు అవసరమని సుప్రీంకోర్టు న్యాయమూర్తి జస్టిస్‌ పి.ఎస్‌. నరసింహ అన్నారు. అంతర్జాతీయ పెట్టుబడి న్యాయం విదేశీ పెట్టుబడుల రక్షణపై ప్రధానంగా దృష్టి సారించే దశ నుంచి ప్రభుత్వాల నియంత్రణాధికారాన్ని గుర్తించే దిశగా పరిణామం చెందిందని వివరించారు. పెట్టుబడుల రక్షణ, ప్రజాప్రయోజనాల కోసం ప్రభుత్వాలు నియంత్రణ చర్యలు చేపట్టే అధికారాల మధ్య సమతుల్యత కలిగిన దీర్ఘకాలిక న్యాయ వ్యవస్థ అవసరమని సూచించారు.
భారత్‌ వాణిజ్య సామర్థ్యాన్ని బలోపేతం చేసేందుకు సీటీఐఎల్‌ను ఏర్పాటు చేసినట్లు సంస్థ అధిపతి, ఐఐఎఫ్‌టీ ప్రొఫెసర్‌, డబ్ల్యూటీఓ ఇండియా చైర్‌ జేమ్స్‌ జె. నెడుంపారా తెలిపారు. ఇప్పటివరకు సంస్థ 4,000కు పైగా న్యాయ అభిప్రాయాలను అందించిందని, దాదాపు పది స్వేచ్ఛా వాణిజ్య ఒప్పందాలకు సంబంధించిన చర్చల్లో పాల్గొందని చెప్పారు. ప్రపంచ వాణిజ్య సంస్థ చర్చలు, సమర్పణలు, నోటిఫికేషన్లు, వివాద పరిష్కార ప్రక్రియల్లోనూ సహకరించిందన్నారు.
కేంద్ర వాణిజ్య, పరిశ్రమల మంత్రిత్వ శాఖ అదనపు కార్యదర్శి యశ్వీర్‌ సింగ్‌ మాట్లాడుతూ ప్రధాన వాణిజ్య ఒప్పందాలు, జీ20, బ్రిక్స్‌ వంటి వేదికల్లో భారత్‌ భాగస్వామ్యానికి సీటీఐఎల్‌ అందించిన సహకారాన్ని వివరించారు. అంతర్జాతీయ ఆర్థిక న్యాయ రంగంలో నిపుణులను తీర్చిదిద్దడంలో సంస్థ పాత్రను ప్రశంసించారు. అంతర్జాతీయ వాణిజ్య చర్చలు, విధాన నిర్ణయాలకు సకాలంలో నిపుణుల సహకారం అందించడంలో సంస్థ ప్రాధాన్యం పెరుగుతోందని ఐఐఎఫ్‌టీ వైస్‌ చాన్స్‌లర్‌ డాక్టర్‌ కె. రంగరాజన్‌ పేర్కొన్నారు.
కీలక ఖనిజాలు, సెమీకండక్టర్లు, కృత్రిమ మేధ, సరఫరా గొలుసులు, వాతావరణం, సుస్థిరత వంటి కొత్త అంశాల్లో సీటీఐఎల్‌ పరిశోధనలు విస్తరిస్తున్నాయని సంయుక్త కార్యదర్శి కపిల్‌ చౌధరి తెలిపారు. వాణిజ్య శాఖలో సంస్థాగత విజ్ఞాన నిర్వహణ, సిబ్బంది సామర్థ్యాభివృద్ధికి మరింత ప్రాధాన్యం ఇవ్వాలని సూచించారు.
ఈ సందర్భంగా వాణిజ్యం–సుస్థిరత అంశాలపై రూపొందించిన సీటీఐఎల్‌ తొమ్మిదో వార్షికోత్సవ ప్రత్యేక సంచికను ఆవిష్కరించారు. మారుతున్న అంతర్జాతీయ పరిస్థితుల్లో అభివృద్ధి చెందుతున్న దేశాలకు ఎదురయ్యే అవకాశాలు, సవాళ్లను ఇందులో విశ్లేషించారు. పెట్టుబడి న్యాయం, విధాన పరిణామాలపై వెలువడే ‘ఇన్వెస్ట్‌మెంట్‌ లా కంపాస్‌’ మాసపత్రిక ప్రత్యేక వార్షికోత్సవ సంచికను కూడా విడుదల చేశారు. దీర్ఘకాలం సేవలందించిన అధ్యాపకులు, సిబ్బందికి విశిష్ట సేవా పురస్కారాలను అందజేశారు.
