న్యూఢిల్లీ, అక్టోబరు 8 (ట్రైనెట్ న్యూస్):
అధికారిక గణాంకాలు, పరిశోధన, సమాచార విశ్లేషణ రంగాల్లో సహకారాన్ని బలోపేతం చేసేందుకు జాతీయ గణాంక కార్యాలయం న్యూఢిల్లీకి చెందిన పహ్లే ఇండియా ఫౌండేషన్‌తో అవగాహన ఒప్పందం కుదుర్చుకుంది. కేంద్ర గణాంకాలు, కార్యక్రమాల అమలు మంత్రిత్వ శాఖ పరిధిలోని ఈ కార్యాలయం సామర్థ్యాల పెంపు, విజ్ఞాన మార్పిడిలోనూ ఫౌండేషన్‌తో కలిసి పనిచేయనుంది.
మంత్రిత్వ శాఖ కార్యదర్శి డాక్టర్‌ సౌరభ్‌ గార్గ్‌, డైరెక్టర్‌ జనరల్‌ పీఆర్‌ మేష్రామ్‌, ఫౌండేషన్‌ చైర్‌పర్సన్‌ డాక్టర్‌ రాజీవ్‌ కుమార్‌, ప్రధాన గణాంక నిపుణుడు ఆశిష్‌ కుమార్‌ సమక్షంలో ఒప్పందం కుదిరింది. మంత్రిత్వ శాఖ అదనపు డైరెక్టర్‌ జనరల్‌ సునీత భాస్కర్‌, ఫౌండేషన్‌ కార్యనిర్వాహక సంచాలకుడు రవి పోఖర్నా ఒప్పంద పత్రాలపై సంతకాలు చేశారు.
పరస్పర ఆసక్తి ఉన్న అంశాల్లో పరిశోధన, సమాచార విశ్లేషణ, సామర్థ్యాల పెంపు, విజ్ఞాన మార్పిడికి ఈ ఒప్పందం విస్తృత కార్యాచరణ చట్రాన్ని అందిస్తుంది. మంత్రిత్వ శాఖ ప్రాధాన్యాలకు అనుగుణంగా నిర్దిష్ట ఉమ్మడి కార్యక్రమాలను చేపట్టనున్నారు. కార్యక్రమంలో మంత్రిత్వ శాఖ ఉన్నతాధికారులు, పహ్లే ఇండియా ఫౌండేషన్‌ ప్రతినిధులు పాల్గొన్నారు.
