ముంబయి, అక్టోబరు 8 (ట్రైనెట్ న్యూస్):
దిగ్గజ నటుడు శివాజీ గణేశన్‌ నటించిన మూడు విశిష్ట తమిళ చిత్రాల 35 మిల్లీమీటర్ల ఫిల్మ్‌ ప్రతులు పుణెలోని జాతీయ చలనచిత్ర భాండాగారం (ఎన్‌ఎఫ్‌డీసీ–ఎన్‌ఎఫ్‌ఏఐ) సేకరణలో చేరాయి. భారత చలనచిత్ర, టెలివిజన్‌ సంస్థ (ఎఫ్‌టీఐఐ) చలనచిత్ర పరిశోధన అధికారి అపర్ణ సుబ్రమణియన్‌ ఈ ప్రతులను సేకరించి భాండాగారానికి విరాళంగా అందించారు.
ఏపీ నాగరాజన్‌ దర్శకత్వం వహించిన ‘తిరువరుట్చెల్వర్‌’ (1967), ‘తిల్లానా మోహనాంబాళ్‌’ (1968), ‘తిరువిళయాడల్‌’ (1965) చిత్రాలు ఈ సేకరణలో ఉన్నాయి. ఇప్పటివరకు ఏ రూపంలోనూ భాండాగారంలో లేని ‘తిరువరుట్చెల్వర్‌’ తొలిసారిగా అందుబాటులోకి రావడం విశేషం. మిగిలిన రెండు చిత్రాలకు అదనంగా మరో విడుదల నాటి ఫిల్మ్‌ ప్రతి లభించడంతో వాటి సంరక్షణ మరింత బలోపేతం కానుంది.
ఒక ప్రతిని భద్రంగా సంరక్షిస్తూ, మరో ప్రతిని పరిశోధన, సాంకేతిక పరిశీలన, డిజిటలీకరణ, ప్రతుల మధ్య తులనాత్మక అధ్యయనానికి వినియోగించుకునే అవకాశం ఉంటుందని భాండాగారం తెలిపింది.
భారత చలనచిత్ర వారసత్వ పరిరక్షణలో సంస్థలతోపాటు వ్యక్తులు, ఇతర సంఘాల కృషి కూడా కీలకమని జాతీయ చలనచిత్ర అభివృద్ధి సంస్థ మేనేజింగ్‌ డైరెక్టర్‌ ప్రకాశ్‌ మగ్దుమ్‌ పేర్కొన్నారు. ఈ మూడు ముఖ్యమైన తమిళ చిత్రాల ప్రతులు జాతీయ సేకరణను సమృద్ధి చేయడంతోపాటు భావితరాలకు అందుబాటులో ఉంచేందుకు తోడ్పడతాయని తెలిపారు. వాటిని గుర్తించి భాండాగారానికి అందించిన కృషిని అభినందించారు.
గత మూడున్నరేళ్లుగా ఫిల్మ్‌ ప్రతులను కాపాడుతూ సేకరిస్తున్నట్లు అపర్ణ సుబ్రమణియన్‌ తెలిపారు. ఈ ఏడాది జనవరిలో ‘రత్తకన్నీర్‌’ (1954) చిత్రం ప్రతిని కూడా భాండాగారానికి అందించినట్లు చెప్పారు. సరైన సంరక్షణ సౌకర్యాలున్న ప్రజా భాండాగారంలో ఈ ప్రతులను భద్రపరచడమే తన లక్ష్యమని పేర్కొన్నారు.
