కుమారుడి అప్పు తండ్రి ప్రాణం మీదకు *మైలార్‌గడ్డలో హత్య కేసు చేదించిన చిలకలగూడ పోలీసులు

సికింద్రాబాద్ ట్రైన్ న్యూస్ సెప్టెంబర్ 18/09/2026

కుమారుడి ఆర్థిక లావాదేవీల వివాదం ఓ తండ్రి ప్రాణాలను బలిగొన్న ఘటనలో చిలకలగూడ పోలీసులు నిందితుడిని అరెస్ట్ చేశారు. మైలార్‌గడ్డలో ఇమ్మడి శ్రీనివాస్‌పై జరిగిన హత్య కేసును పోలీసులు ఛేదించి మహమ్మద్ నిజాముద్దీన్ అలియాస్ నిజాం (36)ను అరెస్ట్ చేశారు. ఈ ఘటనపై చిలకలగూడ పోలీస్ స్టేషన్‌లో క్రైమ్ నంబర్ 459/2026, బీఎన్‌ఎస్ సెక్షన్ 103(1) కింద కేసు నమోదైంది. నిందితుడిని సెప్టెంబర్ 16న అరెస్ట్ చేసినట్లు పోలీసులు తెలిపారు.

పోలీసుల వివరాల ప్రకారం.. సెప్టెంబర్ 15న శ్రీనివాస్ సాయంత్రం 6 నుంచి 6.30 గంటల మధ్య తన ఇంటి నుంచి యాక్టివా వాహనంపై సమీపంలోని వైన్‌షాప్‌కు వెళ్లాడు. రాత్రి 7.10 నుంచి 7.20 గంటల మధ్య మైలార్‌గడ్డ రోడ్డుపై ఆయనపై నిందితుడు కత్తితో దాడి చేసి పరారయ్యాడు. తీవ్రంగా గాయపడిన శ్రీనివాస్‌ను తొలుత ఆర్టీసీ ఆసుపత్రికి, అనంతరం గాంధీ ఆసుపత్రికి తరలించారు. అక్కడ వైద్యులు పరిశీలించి మృతి చెందినట్లు నిర్ధారించారు.

కుమారుడితో ఆర్థిక లావాదేవీలు

మృతుడి కుమారుడు సుమన్‌తో నిందితుడు నిజాముద్దీన్‌కు పరిచయం ఉండటంతో పాటు వ్యాపార లావాదేవీలు ఉన్నాయని పోలీసులు తెలిపారు. షేర్ మార్కెట్ ట్రేడింగ్‌లో నష్టాలు రావడంతో సుమన్ భారీగా అప్పులు చేసి 2023 నవంబర్‌లో ఇంటి నుంచి వెళ్లిపోయినట్లు వెల్లడించారు. తనకు రావాల్సిన డబ్బును తిరిగి చెల్లించాలని నిజాముద్దీన్ సుమన్‌ను డిమాండ్ చేయడంతో పాటు, డబ్బు వివాదానికి సంబంధించి సివిల్ కేసు కూడా దాఖలు చేసినట్లు పోలీసులు తెలిపారు.

ఈ నేపథ్యంలో సుమన్‌కు బదులుగా అతని తండ్రి శ్రీనివాస్‌ను లక్ష్యంగా చేసుకున్నట్లు దర్యాప్తులో వెల్లడైనట్లు పోలీసులు పేర్కొన్నారు. సెప్టెంబర్ 15న మైలార్‌గడ్డ రోడ్డుపై శ్రీనివాస్‌పై కత్తితో దాడి చేసి నిందితుడు పరారైనట్లు తెలిపారు.

కత్తి, రక్తపు మరకలున్న దుస్తులు స్వాధీనం

నిందితుడు మహమ్మద్ నిజాముద్దీన్ అలియాస్ నిజాం (36), తండ్రి మహమ్మద్ కమాలుద్దీన్, భోలక్‌పూర్, ముషీరాబాద్‌కు చెందినవాడిగా పోలీసులు గుర్తించారు. అతని వద్ద నుంచి నేరానికి ఉపయోగించిన పదునైన వంకర కత్తి, రక్తపు మరకలున్న దుస్తులు, టీవీఎస్ ఎన్‌టార్క్ స్కూటర్‌ను స్వాధీనం చేసుకున్నారు.

కేసును వేగంగా ఛేదించి నిందితుడిని అరెస్ట్ చేసిన చిలకలగూడ పోలీస్ స్టేషన్ ఎస్‌హెచ్‌ఓ వి. రామకృష్ణ, ఎస్‌ఐ జె. రాకేష్, పోలీసు సిబ్బందిని చిలకలగూడ ఏసీపీ కె. శశాంక్ రెడ్డి పర్యవేక్షణలో, అదనపు డీసీపీ సికింద్రాబాద్ జోన్ జె. నర్సయ్య నాయకత్వంలో అభినందించినట్లు డీసీపీ రక్షిత కృష్ణమూర్తి తెలిపారు.

ఆర్థిక వివాదాలను చట్టబద్ధంగానే పరిష్కరించుకోవాలి

అప్పులు, ఆర్థిక వివాదాలు లేదా నగదు లావాదేవీలకు సంబంధించిన సమస్యలు ఉంటే పోలీస్ స్టేషన్, న్యాయస్థానం లేదా సంబంధిత చట్టబద్ధ సంస్థలను ఆశ్రయించాలని పోలీసులు సూచించారు. ఎవరూ చట్టాన్ని తమ చేతుల్లోకి తీసుకోవద్దని, డబ్బు వసూలు కోసం బెదిరింపులు, దాడులు లేదా హింసకు పాల్పడితే కఠిన చర్యలు తప్పవని హెచ్చరించారు. వ్యక్తిగత కక్షలు, ఆర్థిక వివాదాలను హింసకు దారితీయకుండా చట్టబద్ధమైన మార్గాల్లో పరిష్కరించుకోవాలని సికింద్రాబాద్ జోన్ డీసీపీ రక్షిత కృష్ణమూర్తి సూచించారు.