ఇంటర్నేషనల్ వండర్ బుక్ ఆఫ్ రికార్డ్స్‌లో గాయని మల్లాది ఉషారాణి
20 మంది సహ గాయకులతో 12 గంటలపాటు నిర్విరామ సంగీత ప్రదర్శన
హైదరాబాద్, సెప్టెంబర్ 23 (ట్రైనెట్ న్యూస్):
ప్రముఖ గాయని శ్రీమతి మల్లాది ఉషారాణి 12 గంటలపాటు నిర్విరామంగా 111 సినీ గీతాలను ఆలపించి అరుదైన ఘనత సాధించారు. ఈ సంగీత ప్రదర్శన ద్వారా ఆమె నాలుగు ప్రతిష్ఠాత్మక రికార్డులు, అవార్డులను సొంతం చేసుకున్నారు.
సెప్టెంబర్ 19న చిక్కడపల్లిలోని శ్రీ త్యాగరాయ గానసభలో నిర్వహించిన ప్రత్యేక సంగీత కార్యక్రమంలో ఉషారాణి 20 మంది సహ గాయకులతో కలిసి మొత్తం 111 పాటలను ఆలపించారు. 1932 నుంచి 2024 వరకు సుమారు 50 మంది ప్రముఖ గాయనీమణులు ఆలపించిన సినీ గీతాలను ఎంపిక చేసుకొని ప్రదర్శించడం కార్యక్రమానికి ప్రత్యేక ఆకర్షణగా నిలిచింది.
తొలితరం గాయని రావు బాలసరస్వతీదేవి నుంచి నేటి తరం గాయని గీతా మాధురి వరకు వివిధ తరాలకు చెందిన గాయనీమణుల పాటలను ఆమె తనదైన శైలిలో ఆలపించారు. శ్రీరంగం గోపాలరత్నం, జిక్కి, లీల, పి.సుశీల, ఎస్.జానకి తదితర ప్రముఖ సినీ నేపథ్య గాయనీమణుల గీతాలను ఆలపించి ప్రేక్షకులను అలరించారు.
ఈ అద్భుత ప్రదర్శనతో మల్లాది ఉషారాణి ఇంటర్నేషనల్ వండర్ బుక్ ఆఫ్ రికార్డ్స్, ఇండియన్ ఐకాన్ అవార్డ్స్, వావ్ మ్యూజిక్ నంది అవార్డ్స్, గ్లోబల్ మల్టీ టాలెంట్ అవార్డ్స్లో గుర్తింపు పొందారు.
శ్రీవరం సుస్వరాలు, గ్లోబల్ టాలెంటెడ్ మ్యూజికల్ ఆర్ట్స్ ఫౌండేషన్, ఇండియన్ కల్చరల్ ఐకాన్ అవార్డ్స్, ఉషా మ్యూజిక్ అండ్ కల్చరల్ ఆర్గనైజేషన్, పీఎంఎస్‌ఎస్‌ఎస్ సంస్థలు సంయుక్తంగా ఈ కార్యక్రమాన్ని నిర్వహించాయి.
ఈ సందర్భంగా బింగి నరేందర్ గౌడ్, మూర్తి శ్రీరామ్, నాగ శివరామ్, త్రినాథరావు, సుధారాణి తదితర ముఖ్య అతిథుల చేతుల మీదుగా మల్లాది ఉషారాణి అవార్డులను అందుకున్నారు. సంగీతంపై అంకితభావంతో 20 మంది సహ గాయకుల సహకారంతో 111 పాటలను ఆలపించి సరికొత్త రికార్డు నెలకొల్పడం అభినందనీయమని అతిథులు కొనియాడారు.
