భారత వైమానిక దళానికి 160 శాటిలైట్ స్మార్ట్ యాంటీ ఎయిర్ఫీల్డ్ ఆయుధాలు
బీడీఎల్తో రూ.810.79 కోట్ల ఒప్పందం కుదుర్చుకున్న రక్షణ మంత్రిత్వ శాఖ
న్యూఢిల్లీ, సెప్టెంబర్ 23 (ట్రైనెట్ న్యూస్):
భారత వైమానిక దళం కోసం 160 శాటిలైట్ స్మార్ట్ యాంటీ ఎయిర్ఫీల్డ్ వెపన్స్—‘శాట్-సా’ (SAT-SAAW)తోపాటు సంబంధిత పరికరాలను కొనుగోలు చేసేందుకు భారత్ డైనమిక్స్ లిమిటెడ్—బీడీఎల్తో రక్షణ మంత్రిత్వ శాఖ రూ.810.79 కోట్ల విలువైన ఒప్పందాన్ని కుదుర్చుకుంది.
‘బై ఇండియన్—స్వదేశీ రూపకల్పన, అభివృద్ధి, తయారీ’ విభాగం కింద ఈ ఆయుధాలను సమకూర్చుకోనున్నారు. రక్షణ శాఖ కార్యదర్శి రాజేశ్ కుమార్ సింగ్ సమక్షంలో 2026 సెప్టెంబర్ 23న న్యూఢిల్లీలో ఈ ఒప్పందంపై సంతకాలు జరిగాయి.
శాట్-సా అనేది గగనతలం నుంచి భూమిపై ఉన్న లక్ష్యాలను అత్యంత కచ్చితత్వంతో ఛేదించగల గ్లైడ్ బాంబు. దీనిని జాగ్వార్, హాక్, సుఖోయ్-30 ఎంకేఐ వంటి యుద్ధ విమానాల నుంచి ప్రయోగించవచ్చు. శత్రు గగనతల రక్షణ పరిధిలోకి వెళ్లకుండానే సుదూరం నుంచి వారి వైమానిక స్థావరాలను ధ్వంసం చేసే సామర్థ్యం దీనికి ఉంది.
రక్షణ పరిశోధన, అభివృద్ధి సంస్థ—డీఆర్డీవో ఈ అధునాతన ఆయుధ వ్యవస్థను స్వదేశీ పరిజ్ఞానంతో రూపొందించి అభివృద్ధి చేసింది. ఇందులో 60 శాతం స్వదేశీ పరికరాలు, సాంకేతికతను వినియోగించనున్నారు. ఇనర్షియల్ మెజర్మెంట్ యూనిట్, లాంగ్ ఇంపాక్ట్ డిలే ఫ్యూజ్, ట్విన్ స్టోర్ క్యారియర్ వంటి కీలక ఉపవ్యవస్థలను కూడా దేశీయంగానే తయారు చేయనున్నారు. దీంతో రక్షణ రంగంలో స్వావలంబన మరింత బలోపేతం కానుంది.
ఈ ఆయుధాల సరఫరా 2027–28 నుంచి 2028–29 మధ్య జరగనుంది. శాట్-సా ఆయుధాలు భారత వైమానిక దళంలో చేరితే ప్రతికూల పరిస్థితుల్లోనూ నిరాటంకంగా కార్యకలాపాలు నిర్వహించే సామర్థ్యం పెరుగుతుంది. దేశ రక్షణ సన్నద్ధత మరింత పటిష్ఠమవుతుందని రక్షణ మంత్రిత్వ శాఖ పేర్కొంది.
