న్యూఢిల్లీ, సెప్టెంబర్ 23 (ట్రైనెట్ న్యూస్): భారత్–శ్రీలంక దేశాల మధ్య నిర్వహించిన 13వ ద్వైపాక్షిక సముద్ర నౌకాదళ విన్యాసం ‘స్లైనెక్స్-26’ సెప్టెంబర్ 21న విశాఖపట్నంలో ముగిసింది. సెప్టెంబర్ 17 నుంచి 21 వరకు నిర్వహించిన ఈ విన్యాసం ద్వారా రెండు దేశాల నౌకాదళ సిబ్బంది వృత్తిపరమైన అంశాలపై పరస్పరం చర్చించడంతోపాటు అత్యుత్తమ కార్యాచరణ పద్ధతులను పంచుకున్నారు. ఇరు నౌకాదళాల మధ్య సమన్వయం, పరస్పర కార్యాచరణ సామర్థ్యాన్ని మరింత మెరుగుపరుచుకున్నారు.
విన్యాసంలోని హార్బర్ దశలో భారత నౌకాదళం, శ్రీలంక నౌకాదళం మధ్య వృత్తిపరమైన చర్చలు, పరస్పర నౌకల సందర్శనలు, క్రీడా కార్యక్రమాలు నిర్వహించారు.
సముద్ర దశలో సమన్వయంతో కూడిన నౌకాదళ కదలికలు, వైమానిక కార్యకలాపాలు, రాత్రివేళ సముద్రంలో ఇంధనం, ఇతర అవసరాల సరఫరా విన్యాసాలు చేపట్టారు. ప్రత్యేక దళాలు నౌకలను సందర్శించడం, ఎక్కడం, తనిఖీ చేయడం, స్వాధీనం చేసుకోవడం వంటి ‘విజిట్, బోర్డ్, సెర్చ్ అండ్ సీజర్’ (వీబీఎస్ఎస్) విన్యాసాలతోపాటు హెలికాప్టర్ల నుంచి తాళ్ల సహాయంతో దిగే ‘స్లిథరింగ్’ కార్యకలాపాలను ప్రదర్శించాయి. ఈ విన్యాసాలు ఇరు దేశాల దళాల మధ్య కార్యాచరణ సమన్వయం, పరస్పర సహకార సామర్థ్యాన్ని మెరుగుపరిచేందుకు దోహదపడ్డాయి.
భారత్–శ్రీలంక మధ్య బలమైన సముద్ర భాగస్వామ్యానికి ‘స్లైనెక్స్-26’ ప్రతీకగా నిలిచింది. సురక్షితమైన, స్థిరమైన హిందూ మహాసముద్ర ప్రాంతాన్ని నిర్మించాలన్న ఇరు దేశాల ఉమ్మడి నిబద్ధతను ఈ విన్యాసం చాటిచెప్పింది. సముద్ర సహకారం, పరస్పర కార్యాచరణ సామర్థ్యం, సామర్థ్య నిర్మాణాన్ని పెంపొందించడం ద్వారా భారతదేశ ‘మహాసాగర్’ దార్శనికతకు, ‘నైబర్హుడ్ ఫస్ట్’ విధానానికి ఈ విన్యాసం మరింత బలం చేకూర్చింది.
