ఢిల్లీ, సెప్టెంబర్ 24 (ట్రైనెట్ న్యూస్):
ఒక నిర్దిష్ట భౌగోళిక ప్రాంతంలోని చేపల్లో పరాన్నజీవుల సంక్రమణ గుర్తించినట్లు వచ్చిన నివేదికల ఆధారంగా ట్యూనా లేదా మార్కెట్‌లో లభించే ఇతర చేపలను తినడం మానేయాల్సిన అవసరం లేదని కొచ్చిలోని ఐసీఏఆర్–సెంట్రల్ మెరైన్ ఫిషరీస్ రీసెర్చ్ ఇన్‌స్టిట్యూట్ (ఐసీఏఆర్–సీఎంఎఫ్‌ఆర్‌ఐ) వినియోగదారులకు సూచించింది.
భారత తీరప్రాంతంలో పరిశీలించిన ట్యూనాతోపాటు ఇతర చేపల్లో హానికరమైన పరాన్నజీవుల సంక్రమణకు సంబంధించిన బాహ్య లక్షణాలు కనిపించలేదని సంస్థ స్పష్టం చేసింది. ఇతర ప్రాంతాల్లో గుర్తించిన అంశాలను భారత జలాల్లో పట్టే చేపలకు వర్తింపజేయడం సరికాదని పేర్కొంది.
బ్రెజిల్ సమీపంలోని అట్లాంటిక్ మహాసముద్రం నుంచి సేకరించిన స్కిప్‌జాక్ ట్యూనా చేపల్లో పరాన్నజీవులు ఉన్నట్లు ఒక అధ్యయనంలో వెల్లడైన నేపథ్యంలో ఐసీఏఆర్–సీఎంఎఫ్‌ఆర్‌ఐ ఈ సూచనలు చేసింది. పర్యావరణ పరిస్థితులతోపాటు కోపిపోడ్స్ వంటి మధ్యస్థ లేదా ద్వితీయ అతిథేయ జీవుల లభ్యతపై ఆధారపడి ఒక్కో చేపలో, ఒక్కో భౌగోళిక ప్రాంతంలో పరాన్నజీవుల ఉనికి, సంఖ్య మారుతాయని వివరించింది.
ఐసీఏఆర్–సీఎంఎఫ్‌ఆర్‌ఐ డైరెక్టర్ డాక్టర్ గ్రిన్సన్ జార్జ్ మాట్లాడుతూ, చేపల జీవశాస్త్ర అధ్యయనాల్లో భాగంగా స్కిప్‌జాక్ ట్యూనాతోపాటు వివిధ రకాల చేపలను సంస్థ శాస్త్రవేత్తలు క్రమం తప్పకుండా పరిశీలిస్తారని తెలిపారు. అవసరమైన సందర్భాల్లో చేపల్లో అసాధారణ లక్షణాలు, పరాన్నజీవుల ఉనికిని పరిశీలిస్తారని చెప్పారు. సంస్థ పరిశీలించిన చేపల్లో హానికరమైన పరాన్నజీవుల సంక్రమణకు సంబంధించిన బాహ్య లక్షణాలు కనిపించలేదన్నారు.
చేపల జాతులు లేదా వాటి జనాభాను వేరు చేసి గుర్తించేందుకు పరాన్నజీవుల ఉనికిలోని తేడాలను ప్రపంచవ్యాప్తంగా సూచికలుగా ఉపయోగిస్తున్నారని సంస్థ వివరించింది. అందువల్ల ఒక ప్రాంతంలోని చేపలపై వెలువడిన అధ్యయన ఫలితాలను మరో ప్రాంతంలో లభించే అదే జాతి చేపలకు నేరుగా వర్తింపజేయలేమని స్పష్టం చేసింది.
ఆహార భద్రతలో భాగంగా చేపలను పట్టుకున్న వెంటనే సరైన పద్ధతిలో పేగులు, ఇతర అంతర్గత అవయవాలను తొలగించడం ముఖ్యమని సూచించింది. శుభ్రపరిచే, ప్రాసెసింగ్ చేసే సమయంలో సాధారణంగా వీటిని తొలగిస్తారని తెలిపింది. చేపలను పూర్తిగా ఉడికించడం వల్ల పరాన్నజీవులు నశించి, వాటితో ముడిపడిన ఆహార భద్రత ప్రమాదాలు గణనీయంగా తగ్గుతాయని పేర్కొంది.
కొన్ని దేశాల్లో సాంస్కృతిక ఆహారపు అలవాట్లలో భాగంగా పచ్చి లేదా స్వల్పంగా ఉడికించిన సముద్ర ఆహారాన్ని తీసుకుంటారని తెలిపింది. ఆయా ప్రాంతాల్లో పరాన్నజీవుల వ్యాప్తి ఎక్కువగా ఉండి, దానిపై సరైన అంచనా లేకపోతే ప్రమాదం అధికంగా ఉండవచ్చని హెచ్చరించింది. భారత్‌లో సాధారణంగా సముద్ర ఆహారాన్ని అధిక ఉష్ణోగ్రత వద్ద పూర్తిగా ఉడికించి తీసుకుంటారని, ఇది అదనపు ఆహార భద్రతను కల్పిస్తుందని వెల్లడించింది.
ఒక నిర్దిష్ట ప్రాంతంలోని చేపల్లో పరాన్నజీవులు కనిపించినట్లు వార్తలు వచ్చినంత మాత్రాన ట్యూనా లేదా మార్కెట్‌లో లభించే ఇతర చేపలను వినియోగదారులు దూరం పెట్టాల్సిన అవసరం లేదని ఐసీఏఆర్–సీఎంఎఫ్‌ఆర్‌ఐ పునరుద్ఘాటించింది. చేపలను సక్రమంగా శుభ్రపరిచి, పూర్తిగా ఉడికించి తీసుకోవాలని సూచించింది. తగిన జాగ్రత్తలు పాటిస్తూ చేపలు, ఇతర సముద్ర ఆహారం నుంచి లభించే పోషక ప్రయోజనాలను పొందవచ్చని పేర్కొంది.
