హైదరాబాద్, ట్రైనెట్ న్యూస్, సెప్టెంబర్ 21:
తెలంగాణ రాజకీయం మరోసారి తీవ్ర రసవత్తరంగా మారింది. ప్రతిపక్ష భారాసను డిఫెన్స్ లోకి నెట్టేలా అధికార కాంగ్రెస్ పార్టీ సరికొత్త వ్యూహాలకు పదును పెడుతోంది. గులాబీ పార్టీకి తిరుగులేని కంచుకోటలుగా ఉన్న నియోజకవర్గాలను లక్ష్యంగా చేసుకుని సీఎం రేవంత్ రెడ్డి స్వయంగా సమరశంఖం పూరించనున్నారు.. ఇందులో భాగంగా ఈ నెల 30న సిరిసిల్లలో కాంగ్రెస్ భారీ బహిరంగ సభను నిర్వహించేందుకు షెడ్యూల్ ఖరారు చేసినట్లు తెలుస్తోంది. ఇటీవల నల్గొండ జిల్లా నకరేకల్ సభలో మాట్లాడిన సీఎం రేవంత్ రెడ్డి.. సెప్టెంబర్ ఆఖరులో సిరిసిల్లకు, ఆ తర్వాత అక్టోబర్లో సిద్దిపేటకు వస్తానని బహిరంగ సవాల్ విసిరిన సంగతి తెలిసిందే. ఆయన ఇచ్చిన పిలుపు మేరకు ఈ నెల 30న సిరిసిల్ల సభ నిర్వహణకు కాంగ్రెస్ నాయకత్వం ఈ సభను ఏర్పాటు చేస్తున్నట్లు సమాచారం. భారాస అధినేత కేసీఆర్ చాన్నాళ్లుగా ప్రజాక్షేత్రానికి దూరంగా ఉంటున్న నేపథ్యంలో ఆ పార్టీలో అగ్ర నేతలు కేటీఆర్, హరీష్ రావు లపై సీఎం రేవంత్ రెడ్డి తీవ్ర స్థాయిలో విరుచుకుపడుతున్నారు. కేటీఆర్ ప్రాతినిధ్యం వహిస్తున్న సిరిసిల్ల, హరీశ్ రావు ప్రాతినిధ్యం వహిస్తున్న సిద్దిపేట నియోజకవర్గంలో
వచ్చే ఎన్నికల్లో కాంగ్రెస్ జెండా ఎగురవేసి తీరుతామని సవాల్ విసురుతున్నారు. ఈ క్రమంలో నకిరేకల్ సభలో సీఎం చాలెంజ్ చేశారు. ఈ నెలాఖరుకు సిరిసిల్లకు వస్తానని ఆ తర్వతా సిద్ధిపేటపై దండయాత్ర చేస్తామని చాలెంజ్ విసిరారు. రాబోయే ఎన్నికలే టార్గెట్గా వ్యూహ రచన చేస్తున్న సీఎం.. రేవంత్ రెడ్డి ఉన్నంత కాలం
భారాస అనే మొక్క తెలంగాణలో మళ్లీ మొలకెత్తదు అంటూ పదునైన మాటలతే రాజకీయాన్ని హీటెక్కిస్తున్నారు.
