2030 కామన్వెల్త్‌ క్రీడలు, 2036 ఒలింపిక్స్‌ ఆతిథ్య బిడ్‌ లక్ష్యాలకు అనుగుణంగా మార్పులు
న్యూఢిల్లీ, ట్రైనెట్ న్యూస్‌, అక్టోబర్ 16: అంతర్జాతీయ వేదికలపై భారత క్రీడాకారుల సన్నద్ధతను మెరుగుపరిచేందుకు జాతీయ క్రీడా సమాఖ్యలకు ఆర్థిక సహాయ పథకాన్ని కేంద్ర ప్రభుత్వం సవరించింది. ఇందుకు సంబంధించిన అమలు మార్గదర్శకాలను కేంద్ర యువజన వ్యవహారాలు, క్రీడల మంత్రిత్వ శాఖ విడుదల చేసింది. 16వ ఆర్థిక సంఘం కాలపరిమితికి అనుగుణంగా 2026–27 నుంచి 2030–31 వరకు మొత్తం రూ.7,386.74 కోట్ల వ్యయంతో పథకాన్ని కొనసాగించేందుకు ప్రభుత్వం ఆమోదం తెలిపింది.
ఒలింపిక్స్‌, ఆసియా క్రీడలు, కామన్వెల్త్‌ క్రీడలు, పారాలింపిక్స్‌, ప్రపంచ చాంపియన్‌షిప్‌ల వంటి ప్రధాన పోటీలకు భారత క్రీడాకారులను సిద్ధం చేయడంలో ఈ పథకం కీలకంగా పనిచేస్తోంది. జాతీయ శిక్షణ శిబిరాలు, అకాడమీల్లో శిక్షణ, క్రీడాకారులకు భోజనం, వసతి, క్రీడా సామగ్రి, బీమా, క్రీడా విజ్ఞాన సేవలకు సహాయం అందిస్తుంది. విదేశీ కోచ్‌లు, హైపర్‌ఫార్మెన్స్‌ డైరెక్టర్లు, ఫిజియోథెరపిస్టులు, క్రీడా శాస్త్రవేత్తలు, వైద్యుల నియామకంతోపాటు విదేశీ శిక్షణ, అంతర్జాతీయ పోటీల్లో పాల్గొనేందుకు తోడ్పాటు కల్పిస్తుంది.
దేశంలో అంతర్జాతీయ క్రీడా పోటీల నిర్వహణకు ఆర్థిక సహాయాన్ని గణనీయంగా పెంచారు. పోటీ ప్రాధాన్యం, పాల్గొనే దేశాలు, క్రీడాకారుల సంఖ్య ఆధారంగా ఒక్కో అంతర్జాతీయ పోటీ నిర్వహణకు జాతీయ క్రీడా సమాఖ్యలకు గరిష్ఠంగా రూ.50 కోట్ల వరకు అందించవచ్చు. ప్రతిపాదనలను కేంద్ర క్రీడల శాఖ కార్యదర్శి నేతృత్వంలోని కమిటీ పరిశీలించనుంది.
అత్యాధునిక క్రీడా విజ్ఞాన పరికరాలు, నిపుణులు, ఆధునిక శిక్షణ వసతులతో ఒలింపిక్‌ శిక్షణ కేంద్రాలను ఏర్పాటు చేయాలని ప్రణాళిక రూపొందించారు. ఒక్కో కేంద్రాన్ని ఒక క్రీడకు ప్రత్యేకంగా కేటాయించనున్నారు. విదేశీ శిక్షణపై ఆధారపడటాన్ని తగ్గించే లక్ష్యంతో ఈ కేంద్రాల్లో శిక్షణ పొందే అత్యుత్తమ భారత క్రీడాకారులకు కోచ్‌లు, సాంకేతిక సిబ్బంది, క్రీడా విజ్ఞాన సేవలు, ప్రత్యేక పరికరాల కోసం సహాయం అందించనున్నారు.
జాతీయ క్రీడల నిర్వహణకు కూడా గరిష్ఠంగా రూ.50 కోట్ల వరకు సహాయం అందించే నిబంధనను చేర్చారు. క్రీడా పరికరాలు, సమయ నిర్ధారణ, స్కోరింగ్‌, ఫలితాల నమోదు సేవలు, సాంకేతిక అధికారుల పారితోషికాలు, పోటీల సాంకేతిక నిర్వహణకు ఈ నిధులను వినియోగించవచ్చు. సీనియర్‌, జూనియర్‌, సబ్‌జూనియర్‌ జాతీయ చాంపియన్‌షిప్‌లు, క్షేత్రస్థాయి క్రీడాకారుల అభివృద్ధి, సమాఖ్యల పరిపాలనకు సహాయం కొనసాగుతుంది.
దేశీయ క్రీడలకు ప్రపంచవ్యాప్త గుర్తింపు కల్పించేందుకు ప్రత్యేక సహాయాన్ని ప్రవేశపెట్టారు. ఒలింపిక్స్‌, ఆసియా, కామన్వెల్త్‌ క్రీడల్లో ప్రదర్శన క్రీడలుగా చోటు సాధించే ప్రయత్నాలు, ఇతర దేశాల్లో జాతీయ సమాఖ్యల ఏర్పాటు, భారత్‌లో కార్యాలయాలు ఉన్న దేశీయ క్రీడల అంతర్జాతీయ, ఖండస్థాయి సమాఖ్యలకు అవసరమైన తోడ్పాటు అందించనున్నారు.
గ్లోబల్‌ సౌత్‌ దేశాల క్రీడాకారులు, కోచ్‌లకు భారత్‌లో శిక్షణ కల్పించేందుకు ఉపకార వేతనాలు, రాయితీతో శిక్షణ వసతుల వినియోగం వంటి అంతర్జాతీయ సహకార చర్యలకు అవకాశం కల్పించారు. బ్రిక్స్‌, బిమ్స్‌టెక్‌ వంటి బహుళపక్ష వేదికలకు సంబంధించిన క్రీడా పోటీలు, సదస్సులు, సమావేశాలు, పరిశోధనలు, కార్యశాలలకు కూడా ఆర్థిక సహాయం అందించనున్నారు.
భారత్‌లో కార్యాలయాలు ఉన్న గుర్తింపు పొందిన అంతర్జాతీయ, ఖండస్థాయి క్రీడా సంస్థలకు సంబంధిత జాతీయ క్రీడా సమాఖ్య లేదా జాతీయ ఒలింపిక్‌ కమిటీ ద్వారా సహాయం అందించే వెసులుబాటు కల్పించారు. క్రీడల శాఖ కార్యదర్శి నేతృత్వంలోని కమిటీ సిఫార్సుల మేరకు ఆయా ప్రతిపాదనలను విడివిడిగా పరిశీలించనున్నారు.
