3,993 ప్రజా ఫిర్యాదులు, 454 అప్పీళ్ల పరిష్కారం
న్యూఢిల్లీ, ట్రైనెట్ న్యూస్‌, అక్టోబర్‌ 16: ప్రభుత్వ కార్యాలయాల్లో పరిశుభ్రతను స్థిరమైన ఆచరణగా మార్చడం, పెండింగ్‌ అంశాలను తగ్గించడం లక్ష్యంగా కేంద్ర ఆరోగ్య, కుటుంబ సంక్షేమ శాఖ స్పెషల్‌ క్యాంపెయిన్‌–6ను కొనసాగిస్తోంది. అక్టోబర్‌ 2 నుంచి 31 వరకు నిర్వహిస్తున్న ఈ కార్యక్రమం మధ్యంతర పురోగతిని శాఖ సంయుక్త కార్యదర్శి, ప్రచార నోడల్‌ అధికారి ఎలాంగ్‌బామ్‌ రాబర్ట్‌ సింగ్‌ శుక్రవారం సమీక్షించారు.
పెండింగ్‌ అంశాలను ప్రతిరోజూ పర్యవేక్షిస్తూ నిర్దేశిత లక్ష్యాలను సకాలంలో సాధించాలని సమీక్షలో సూచించారు. శాఖ పరిధిలోని కేంద్ర ప్రభుత్వ ఆసుపత్రులు, సంస్థలు, అనుబంధ, అధీన కార్యాలయాలు, స్వయంప్రతిపత్తి సంస్థలు కార్యక్రమంలో చురుగ్గా పాల్గొనాలని స్పష్టం చేశారు.
కార్యక్రమంలో భాగంగా దేశవ్యాప్తంగా 988 ప్రదేశాల్లో పరిశుభ్రత, మొక్కల పెంపకం తదితర కార్యక్రమాలు చేపట్టారు. కార్యాలయ పరిసరాలను శుభ్రపరచడంతోపాటు సుందరీకరణకు చర్యలు తీసుకున్నారు. ప్రజా సమస్యల సత్వర పరిష్కారంలో భాగంగా 3,993 ప్రజా ఫిర్యాదులు, 454 అప్పీళ్లను పరిష్కరించారు.
రికార్డుల నిర్వహణలో భాగంగా 40,123 భౌతిక దస్త్రాలను సమీక్షించి, వాటిలో తొలగించదగిన 6,890 దస్త్రాలను తొలగించారు. అదేవిధంగా 7,034 ఈ–ఫైళ్లను పరిశీలించి, 6,875 ఫైళ్లను ముగించారు. అధికారిక రికార్డులను క్రమబద్ధీకరించడం, పెండెన్సీని తగ్గించడం, పరిపాలనా సామర్థ్యాన్ని మెరుగుపరచడం లక్ష్యంగా ఈ చర్యలు చేపట్టారు.
పర్యావరణహిత వ్యర్థాల నిర్వహణలో భాగంగా 800 ఎలక్ట్రానిక్‌ వ్యర్థ వస్తువులను తొలగించారు. అక్టోబర్‌ 31 వరకు స్వచ్ఛత కార్యక్రమాలు, పెండింగ్‌ అంశాల పరిష్కారం, సమర్థ రికార్డుల నిర్వహణపై నిరంతర పర్యవేక్షణ కొనసాగిస్తామని ఆరోగ్య, కుటుంబ సంక్షేమ శాఖ తెలిపింది. పరిశుభ్రమైన, సమర్థమైన, పౌర కేంద్రిత పాలనను ప్రోత్సహించేందుకు కృషి చేస్తున్నట్లు పేర్కొంది.
