న్యూఢిల్లీ, ట్రైనెట్ న్యూస్, నవంబర్ 06:
ప్రత్యేక ప్రచారం–6లో శాస్త్రీయ, పారిశ్రామిక పరిశోధన విభాగం (డీఎస్‌ఐఆర్) నిర్దేశిత లక్ష్యాలను వందశాతం సాధించింది. ప్రజా ఫిర్యాదులు, ఎంపీల నుంచి వచ్చిన సూచనల పరిష్కారం, రికార్డుల నిర్వహణలో లక్ష్యాలను పూర్తిచేయడంతో పాటు పలు అంశాల్లో నిర్దేశిత స్థాయిని అధిగమించింది.
అక్టోబర్ 2న న్యూఢిల్లీలోని సీఎస్‌ఐఆర్ ప్రధాన కార్యాలయంలో కేంద్ర సహాయ మంత్రి డాక్టర్ జితేంద్ర సింగ్ ఈ ప్రచారాన్ని ప్రారంభించారు. సీఎస్‌ఐఆర్ డైరెక్టర్ జనరల్, డీఎస్‌ఐఆర్ కార్యదర్శి డాక్టర్ ఎన్‌. కలైసెల్వి మార్గదర్శకత్వంలో, సంయుక్త కార్యదర్శి సురీందర్ పాల్ సింగ్ పర్యవేక్షణలో కార్యక్రమాలు సాగాయి. డీఎస్‌ఐఆర్‌తో పాటు సీఎస్‌ఐఆర్, సెంట్రల్ ఎలక్ట్రానిక్స్ లిమిటెడ్, ఎన్‌ఆర్‌డీసీ ప్రధాన, క్షేత్రస్థాయి కార్యాలయాలు ఇందులో పాల్గొన్నాయి.
అవసరం లేని దస్త్రాల తొలగింపు కోసం 9,805 భౌతిక ఫైళ్ల సమీక్షను లక్ష్యంగా పెట్టుకోగా, 13,956 ఫైళ్లను పరిశీలించి 140 శాతానికి పైగా పురోగతి సాధించారు. అలాగే 2,493 ఈ–ఫైళ్ల లక్ష్యానికి గాను 3,274 ఫైళ్లను సమీక్షించారు. నిరుపయోగ సామగ్రి విక్రయం ద్వారా రూ.76,36,047 ఆదాయం సమకూరగా, 21,117 చదరపు అడుగుల కార్యాలయ స్థలం ఖాళీ అయింది. దేశవ్యాప్తంగా నిర్దేశించిన 150 ప్రదేశాల్లో పరిశుభ్రత కార్యక్రమాలను పూర్తిచేశారు.
ఈ ప్రచారంలో పట్టణ పరిశుభ్రత కోసం దుర్గాపూర్‌లోని సీఎస్‌ఐఆర్–సీఎంఈఆర్‌ఐ రూపొందించిన సాంకేతికతలు, వ్యవసాయ అవశేషాల నుంచి రహదారుల నిర్మాణానికి ఉపయోగించే బయో బిటుమెన్ తయారీ, గోవాలోని సీఎస్‌ఐఆర్–ఎన్‌ఐఓ అభివృద్ధి చేసిన పగడపు దిబ్బల పర్యవేక్షణ రోబో ‘సీ–బాట్’ను ఉత్తమ విధానాలుగా ప్రదర్శించారు.
సమర్థమైన, జవాబుదారీతనంతో కూడిన పౌర కేంద్రిత పాలన పట్ల తమ నిబద్ధతను ఈ ఫలితాలు ప్రతిబింబిస్తున్నాయని డీఎస్‌ఐఆర్ తెలిపింది.
