న్యూఢిల్లీ, ట్రైనెట్ న్యూస్, నవంబర్ 04:
భవిష్యత్ 6జీ సమాచార వ్యవస్థల అభివృద్ధికి ఉపయోగపడే సరికొత్త సిలికాన్ చిప్‌ను జవహర్‌లాల్ నెహ్రూ సెంటర్ ఫర్ అడ్వాన్స్‌డ్ సైంటిఫిక్ రీసెర్చ్‌ (జేఎన్‌సీఏఎస్‌ఆర్‌) పరిశోధకులు అభివృద్ధి చేశారు. చిప్‌లో ప్రత్యేకంగా రూపొందించిన అవరోధాన్ని టెరాహెర్ట్జ్ తరంగాలు అతి తక్కువ నష్టంతో దాటేలా చేసి, సెకనుకు 100 గిగాబిట్ల వరకు డేటా ప్రసారాన్ని ప్రదర్శించారు.
మైక్రోవేవ్‌లు, పరారుణ కాంతి మధ్య ఉండే టెరాహెర్ట్జ్ పౌనఃపున్యాలు విస్తృత బ్యాండ్‌విడ్త్‌ను అందిస్తాయి. భవిష్యత్ 6జీ నెట్‌వర్క్‌లలో వీటిని వినియోగించే అవకాశం ఉంది. అయితే చిన్న సర్క్యూట్లలో మలుపులు, కూడళ్లు, నిర్మాణంలో ఆకస్మిక మార్పుల వల్ల తరంగాలు చెదిరిపోవడం లేదా వెనక్కి పరావర్తనం చెందడంతో సిగ్నల్ బలహీనపడుతుంది.
ఈ సమస్యను అధిగమించేందుకు పరిశోధకులు సిలికాన్ పలకపై త్రిభుజాకార రంధ్రాలను ప్రత్యేక క్రమంలో అమర్చి ఫోటోనిక్ క్రిస్టల్‌ను రూపొందించారు. ‘టోపోలాజికల్ ఫోటోనిక్స్’ విధానంతో తరంగాలను నిర్దేశిత మార్గంలో ప్రయాణించేలా చేశారు. పరీక్షల్లో ఒక అవరోధం వల్ల అదనంగా కేవలం 1–2 శాతం, వరుసగా రెండు అవరోధాలతో 2–3 శాతం మాత్రమే సిగ్నల్ నష్టం నమోదైంది.
రెండు అవరోధాలున్న పరికరం, నాలుగు పదునైన మలుపులతో ఒమేగా ఆకారంలో ఉన్న పరికరం, సిగ్నల్‌ను రెండు శాఖలుగా విభజించే పరికరంపై ప్రయోగాలు నిర్వహించారు. ఇవి వరుసగా సెకనుకు 48, 60, 100 గిగాబిట్ల డేటాను ప్రసారం చేశాయి. అత్యధిక వేగాన్ని సాధించిన సిగ్నల్ విభజన పరికరంలో క్యామ్‌–32 మాడ్యులేషన్ సాంకేతికతను ఉపయోగించారు. ఈ వేగంతో సిద్ధాంతపరంగా 5 గిగాబైట్ల హైడెఫినిషన్ సినిమాను అర సెకనులోపే బదిలీ చేయవచ్చు.
జేఎన్‌సీఏఎస్‌ఆర్‌ అసిస్టెంట్ ప్రొఫెసర్‌, మెటా ఆప్టిక్స్ ల్యాబొరేటరీ అధిపతి డాక్టర్ అభిషేక్ కుమార్ నేతృత్వంలో ఈ పరిశోధన జరిగింది. సమీనా ముల్లా, సంగ్రామ్ కుమార్ సాధు సంయుక్త ప్రథమ రచయితలుగా వ్యవహరించారు. దేశ, విదేశాలకు చెందిన పలు పరిశోధనా సంస్థలు సహకరించాయి. అధ్యయన ఫలితాలు ‘అడ్వాన్స్‌డ్ మెటీరియల్స్’ జర్నల్‌లో ప్రచురితమయ్యాయి.
ఒకే చిప్‌పై తక్కువ నష్టంతో టెరాహెర్ట్జ్ సిగ్నళ్లను మళ్లించడం, విభజించడం సాధ్యమయ్యే సర్క్యూట్ల అభివృద్ధికి ఈ పరిశోధన దోహదపడనుంది. తదుపరి దశలో విద్యుత్‌, ఉష్ణం లేదా యాంత్రిక పద్ధతులతో అవరోధాలను నియంత్రించి, అవసరానికి అనుగుణంగా సిగ్నల్ ప్రయాణ మార్గాన్ని మార్చే అవకాశాలను పరిశోధకులు పరీక్షించనున్నారు.
