న్యూఢిల్లీ, ట్రైనెట్ న్యూస్, అక్టోబర్ 14:
ఆయుర్వేదంలో పరిశోధనలు, ఆవిష్కరణలను ప్రోత్సహించేందుకు కేంద్ర ఆయుర్వేద శాస్త్ర పరిశోధన మండలి (సీసీఆర్‌ఏఎస్‌) చేపట్టిన ‘స్పార్క్‌ 5.0’, ‘ఆయుర్‌శోధ్‌–2026’ రెండో సర్క్యులర్‌ను జాతీయ భారతీయ వైద్య విధానాల కమిషన్‌ (ఎన్‌సీఐఎస్‌ఎం) చైర్‌పర్సన్‌ ప్రొఫెసర్‌ మనీషా కొఠేకర్‌ బుధవారం ఆవిష్కరించారు. ఆయుర్వేద విద్యార్థుల్లో పరిశోధనాసక్తిని పెంపొందించడం, నాణ్యమైన పరిశోధనలు, శాస్త్రీయ సమాచార ప్రదర్శన, ఆవిష్కరణలను ప్రోత్సహించడం ఈ కార్యక్రమాల లక్ష్యం.
300 మందికి రూ.50 వేల చొప్పున విద్యార్థి ఉపకార వేతనం
2026–27 విద్యాసంవత్సరానికి నిర్వహిస్తున్న ‘స్టూడెంట్స్‌షిప్‌ ప్రోగ్రామ్‌ ఫర్‌ ఆయుర్వేద రీసెర్చ్‌ కెన్‌’ (స్పార్క్‌) ఐదో విడతలో మొత్తం 300 మందికి ఒక్కొక్కరికి రూ.50 వేల చొప్పున ఉపకార వేతనం అందించనున్నారు. స్వల్పకాలిక స్వతంత్ర పరిశోధన ప్రాజెక్టుల ద్వారా బీఏఎంఎస్‌ విద్యార్థులకు పరిశోధన పద్ధతులు, సాంకేతికతలపై అవగాహన కల్పించనున్నారు. విశ్లేషణాత్మక ఆలోచనను పెంపొందించడంతోపాటు పరిశోధనను వృత్తిగా ఎంచుకునేలా ప్రోత్సహించనున్నారు.
ఎన్‌సీఐఎస్‌ఎం లేదా భారత ప్రభుత్వం గుర్తించిన కళాశాలలు, విశ్వవిద్యాలయాల్లో బీఏఎంఎస్‌ మూడో, నాలుగో లేదా సంబంధిత ప్రొఫెషనల్‌ సంవత్సరాల్లో చదువుతున్న విద్యార్థులు అర్హులు. అక్టోబర్ 15న రిజిస్ట్రేషన్లు ప్రారంభం కానుండగా, దరఖాస్తుల సమర్పణకు నవంబర్‌ 15 చివరి తేదీగా నిర్ణయించారు.
మూడు విభాగాల్లో పరిశోధనలకు గుర్తింపు
‘సీసీఆర్‌ఏఎస్‌ ఆయుర్‌శోధ్‌’ ద్వారా ఆయుర్వేద పరిశోధనల్లో ప్రతిభ కనబరిచిన వారికి మూడు విభాగాల్లో జాతీయ స్థాయి గుర్తింపు అందించనున్నారు. ‘సీసీఆర్‌ఏఎస్‌–ప్రబోధ్‌ 3ఎంటీ’ కింద పరిశోధనాంశాన్ని మూడు నిమిషాల్లో వివరించే థీసిస్‌ ప్రదర్శనలను ప్రోత్సహిస్తారు. ‘సీసీఆర్‌ఏఎస్‌–ప్రకాశ్‌’ ద్వారా మౌలిక పరిశోధనల ఆధారంగా వెలువడిన ప్రచురణల్లో శాస్త్రీయ ప్రతిభను గుర్తిస్తారు. ‘సీసీఆర్‌ఏఎస్‌–నవోన్మేష’ కింద వినూత్న నమూనాలు, సరికొత్త పరిష్కారాలు, ప్రక్రియల్లో ఆవిష్కరణలు, పరిశోధన పద్ధతుల్లో పరివర్తనాత్మక కృషికి గుర్తింపు ఇస్తారు.
శ్రీ ధూతపాపేశ్వర్‌ లిమిటెడ్‌ ప్రాయోజిత నగదు బహుమతులతోపాటు పురస్కారాల వివరాలను రెండో సర్క్యులర్‌లో పొందుపరిచారు. ఆయుర్‌శోధ్‌ తుది పోటీలు డిసెంబర్‌ 11న నిర్వహించనున్నారు.
కార్యక్రమంలో సీసీఆర్‌ఏఎస్‌ డైరెక్టర్‌ జనరల్‌ ప్రొఫెసర్‌ వైద్య రబినారాయణ ఆచార్య, శ్రీ ధూతపాపేశ్వర్‌ లిమిటెడ్‌ ఎండీ, సీఈవో డాక్టర్ రంజిత్‌ పురాణిక్‌, ఎన్‌సీఐఎస్‌ఎం వివిధ బోర్డుల అధ్యక్షులు, దేశవ్యాప్తంగా ఉన్న సీసీఆర్‌ఏఎస్‌ సంస్థల అధిపతులు పాల్గొన్నారు.
