హైదరాబాద్, ట్రైనెట్ న్యూస్, అక్టోబర్ 16:
తెలంగాణ రాష్ట్రంలో వాహనాల ఫిట్‌నెస్ పరీక్షలను ఆధునిక సాంకేతిక పరిజ్ఞానంతో నిర్వహించేందుకు 37 ఆటోమేటెడ్ టెస్టింగ్ స్టేషన్ల (ఏటీఎస్ ) ఏర్పాటుకు రాష్ట్ర ప్రభుత్వం సవరించిన పరిపాలనా అనుమతులు మంజూరు చేసింది. ఈ మేరకు రవాణా, రహదారులు భవనాల శాఖ జీ.ఓ.ఎం.ఎస్. నెం.50 ద్వారా ఉత్తర్వులు జారీ చేసింది. ఈ ప్రాజెక్టు కోసం మొత్తం రూ.425.50 కోట్ల వ్యయాన్ని ప్రభుత్వం ఆమోదించింది. గతంలో ఒక్కో స్టేషన్‌కు రూ.8 కోట్ల చొప్పున మొత్తం రూ.296 కోట్లకు పరిపాలనా అనుమతులు మంజూరు చేయగా, తాజా ఉత్తర్వుల ప్రకారం ఒక్కో స్టేషన్ వ్యయాన్ని రూ.11.50 కోట్లకు పెంచుతూ సవరించిన అనుమతులు జారీ చేశారు.
రెండు దశల్లో 37 స్టేషన్ల ఏర్పాటు*
మొదటి దశలో 15 ఆటోమేటెడ్ టెస్టింగ్ స్టేషన్లను ఏర్పాటు చేయనున్నారు. అప్పటి జిల్లా ప్రధాన కార్యాలయాల్లో ఒక్కొక్కటి చొప్పున, గ్రేటర్ హైదరాబాద్/HMDA పరిధిలో అదనంగా నాలుగు స్టేషన్లు కలిపి ఈ దశలో నిర్మాణం చేపట్టనున్నారు. ఈ దశకు రూ.172.50 కోట్ల వ్యయాన్ని ఆమోదించారు. రెండో దశలో మిగిలిన 22 ఆటోమేటెడ్ టెస్టింగ్ స్టేషన్లను ఏర్పాటు చేయనున్నారు. ఒక్కో స్టేషన్‌కు రూ.11.50 కోట్ల చొప్పున ఈ దశకు రూ.253 కోట్ల వ్యయాన్ని కేటాయించారు.
స్వయం ఆర్థిక నమూనాలో ప్రత్యేక ప్రయోజన వాహనం (ఎస్పీవీ )
37 ఆటోమేటెడ్ టెస్టింగ్ స్టేషన్ల ఏర్పాటు, నిర్వహణ కోసం రవాణా శాఖ పరిధిలో ప్రత్యేక ప్రయోజన వాహనం (ఎస్పీవీ ) ఏర్పాటు చేయడానికి ప్రభుత్వం అనుమతించింది. ఈ సంస్థ స్వయం ఆర్థిక నమూనాలో పనిచేస్తుంది. స్టేషన్ల ఏర్పాటుకు అవసరమైన నిధులను హడ్కో వంటి బ్యాంకులు లేదా ఆర్థిక సంస్థల నుంచి రుణాల రూపంలో సమీకరించనున్నారు.
వాహనాల ఫిట్‌నెస్ పరీక్షలకు సంబంధించి వసూలు చేసే దరఖాస్తు రుసుము, పరీక్ష రుసుము, వినియోగదారు ఛార్జీలను ఎస్పీవీ నిర్వహించే ప్రత్యేక నిధిలో జమ చేస్తారు. ఈ నిధులను ఆటోమేటెడ్ టెస్టింగ్ స్టేషన్ల ఏర్పాటుకు, నిర్వహణకు తీసుకున్న రుణాల అసలు, వడ్డీ చెల్లింపులకే వినియోగించనున్నారు.
తదుపరి చర్యలకు రవాణా కమిషనర్‌కు బాధ్యతలు
ప్రత్యేక ప్రయోజన వాహనం ఏర్పాటు, దాని కార్యకలాపాల నిర్వహణకు అవసరమైన నిర్మాణం, విధానం, ఆర్థిక నమూనాను రూపొందించి ప్రభుత్వానికి ప్రతిపాదనలు సమర్పించాలని తెలంగాణ రవాణా కమిషనర్‌ను ప్రభుత్వం ఆదేశించింది.
రాష్ట్రంలో మొత్తం 37 ఆటోమేటెడ్ టెస్టింగ్ స్టేషన్ల ఏర్పాటు ద్వారా వాహనాల ఫిట్‌నెస్ పరీక్షల నిర్వహణకు ఆధునిక వ్యవస్థను అభివృద్ధి చేయడానికి ప్రభుత్వం చర్యలు చేపట్టింది.
