న్యూఢిల్లీ, ట్రైనెట్ న్యూస్, అక్టోబర్ 13: ప్రతికూల వాతావరణ పరిస్థితుల్లోనూ మెరుగైన సోయాబీన్‌ రకాలు ఆశాజనక దిగుబడిని కనబరిచాయి. ఇండోర్‌లోని భారత వ్యవసాయ పరిశోధనా మండలి (ఐసీఏఆర్‌)–జాతీయ సోయాబీన్‌ పరిశోధనా సంస్థ అభివృద్ధి చేసిన ఎన్‌ఆర్‌సీ 268, ఎన్‌ఆర్‌సీ 270 రకాలు హెక్టారుకు సుమారు 20 క్వింటాళ్ల దిగుబడి ఇచ్చే అవకాశమున్నట్లు ప్రాథమిక గణాంకాలు వెల్లడించాయి.
అక్టోబర్ 9న సంస్థ నిర్వహించిన సోయాబీన్‌ పంట కోత దినోత్సవంలో ఈ రెండు రకాల దిగుబడి సామర్థ్యాన్ని పరిశీలించారు. ఒక్కో రకాన్ని సాగు చేసిన ఒక్కో ఎకరం విస్తీర్ణంలో పంట కోసి సేకరించిన వివరాల ఆధారంగా హెక్టారుకు దిగుబడిని అంచనా వేశారు. ప్రస్తుతం దేశంలో సోయాబీన్‌ సగటు ఉత్పాదకత హెక్టారుకు సుమారు 10–11 క్వింటాళ్లుగా ఉన్న నేపథ్యంలో ఈ ప్రాథమిక ఫలితాలు ప్రాధాన్యం సంతరించుకున్నాయి.
జాతీయ సోయాబీన్‌ పరిశోధనా సంస్థ, అఖిల భారత సమన్వయ సోయాబీన్‌ పరిశోధనా ప్రాజెక్టు ఆధ్వర్యంలో దేశవ్యాప్తంగా చేపట్టిన పరిశోధనలు, ప్రయోగాల ప్రకారం మెరుగైన విత్తన రకాలు, తగిన సాగు సాంకేతికతలను అనుసరిస్తే హెక్టారుకు 15–20 క్వింటాళ్ల దిగుబడి సాధించవచ్చు. అనుకూల పరిస్థితుల్లో ఇది సుమారు 22–25 క్వింటాళ్ల వరకు చేరే అవకాశముంది.
ఈ ప్రాథమిక ఫలితాలను వ్యవసాయ పరిశోధన, విద్యా విభాగం (డేర్‌) కార్యదర్శి, ఐసీఏఆర్‌ డైరెక్టర్‌ జనరల్‌ డాక్టర్‌ ఎం.ఎల్‌. జాట్‌ ప్రశంసించారు. దేశంలో సోయాబీన్‌ ఉత్పాదకత పెంపునకు మెరుగైన రకాలు, శాస్త్రీయ సాగు పద్ధతులు కీలకమని పేర్కొన్నారు. ఈ ఏడాది ప్రతికూల వాతావరణంలోనూ హెక్టారుకు సుమారు 20 క్వింటాళ్ల దిగుబడి సూచనలు కనిపించడం ప్రోత్సాహకరమన్నారు. దిగుబడి గణాంకాల శాస్త్రీయ విశ్లేషణ భవిష్యత్‌ పరిశోధన వ్యూహాలకు దిశానిర్దేశం చేస్తుందని తెలిపారు.
పంట కోత సందర్భంగా సేకరించిన వివరాలను ఒకే ఏడాది దిగుబడి అంచనాకు పరిమితం చేయకుండా, దీర్ఘకాలికంగా విశ్లేషించాల్సిన అవసరముందని సంస్థ డైరెక్టర్‌ పేర్కొన్నారు. అనేక సంవత్సరాల గణాంకాలను క్రమబద్ధంగా సేకరించడం ద్వారా వివిధ ప్రాంతాలు, విత్తన రకాలు, సాగు పరిస్థితుల్లో ఉత్పాదకత మార్పులను అర్థం చేసుకోవచ్చన్నారు. పరిశోధనలు, సాంకేతికత విస్తరణ కార్యక్రమాల ప్రభావాన్ని అంచనా వేయడానికీ ఈ సమాచారం ఉపయోగపడుతుందని వివరించారు.
అధిక దిగుబడినిచ్చే రకాలు, శాస్త్రీయ సాగు పద్ధతులపై రైతులకు అవగాహన కల్పించేందుకు సంస్థ ఇటువంటి కార్యక్రమాలను క్రమం తప్పకుండా నిర్వహిస్తోంది. తాజా పంట కోత గణాంకాలను మరింత విశ్లేషించి, ఆయా రకాల పనితీరు, సాగు పరిస్థితుల ప్రభావంపై స్పష్టమైన అంచనాలు రూపొందించనున్నట్లు సంస్థ తెలిపింది.
