న్యూఢిల్లీ, ట్రైనెట్ న్యూస్, నవంబర్ 06:
ప్రభుత్వ భవనాలపై సౌర విద్యుత్ వ్యవస్థల ఏర్పాటులో విశేష కృషికి కేంద్ర ఆర్థిక సేవల విభాగం (డీఎఫ్‌ఎస్‌) ‘పీఎం సూర్య ఘర్ ఎక్సలెన్స్ అవార్డు’ అందుకుంది. అత్యధిక భవనాలను సౌర విద్యుత్ పరిధిలోకి తీసుకొచ్చిన కేంద్ర మంత్రిత్వ శాఖలు, విభాగాల విభాగంలో రెండో స్థానాన్ని సాధించింది.
డీఎఫ్‌ఎస్‌ పరిపాలనా పరిధిలోని సంస్థలకు చెందిన 4,144 భవనాలను పరిశీలించి, సాంకేతికంగా అనుకూలమైన 2,576 భవనాలను గుర్తించారు. భవన యాజమాన్యం, పైకప్పు వినియోగ హక్కులు, నీడ ప్రభావం, బరువును మోయగల సామర్థ్యం వంటి అంశాలను అంచనా వేశారు. అనుకూలంగా గుర్తించిన అన్ని భవనాలపై సౌర విద్యుత్ ప్లాంట్లను ఏర్పాటు చేసి, పూర్తిస్థాయిలో అందుబాటులోకి తీసుకొచ్చారు. వీటి మొత్తం స్థాపిత సామర్థ్యం 61.50 మెగావాట్లు.
నవంబర్ 5న న్యూఢిల్లీలోని భారత్ మండపంలో జరిగిన భారత్ పునరుత్పాదక ఇంధన సదస్సు, ప్రదర్శన–2026 ముగింపు కార్యక్రమంలో భారత ఉపరాష్ట్రపతి ఈ అవార్డును ప్రదానం చేశారు. అంతర్జాతీయ సౌర కూటమి తొమ్మిదో సర్వసభ్య సమావేశం, నాలుగో అంతర్జాతీయ గ్రీన్ హైడ్రోజన్ సదస్సుతో పాటు కేంద్ర నూతన, పునరుత్పాదక ఇంధన మంత్రిత్వ శాఖ ఈ సదస్సును నిర్వహించింది.
సౌర విద్యుత్‌కు అనుకూలమైన భవనాలన్నింటిలోనూ వ్యవస్థలను ఏర్పాటు చేయడం ద్వారా డీఎఫ్‌ఎస్‌ వందశాతం లక్ష్యాన్ని సాధించింది. దేశ నికర శూన్య ఉద్గార లక్ష్యాలు, సుస్థిర మౌలిక వసతుల అభివృద్ధిలో ఆర్థిక సంస్థల భాగస్వామ్యానికి ఈ పురస్కారం గుర్తింపుగా నిలిచింది.
