‘మాదకద్రవ్యాలపై పోరాటం’ సందేశంతో దేశవ్యాప్త బైక్ ర్యాలీ ప్రారంభం
న్యూఢిల్లీ, ట్రైనెట్ న్యూస్, అక్టోబర్ 21:
దేశాన్ని 2029 డిసెంబర్ 31 నాటికి మాదకద్రవ్యాల మహమ్మారి నుంచి విముక్తం చేయడమే లక్ష్యంగా సమష్టిగా పోరాడాలని కేంద్ర హోం, సహకార శాఖల మంత్రి అమిత్ షా పిలుపునిచ్చారు. ప్రధాని నరేంద్ర మోదీ నాయకత్వంలో రూపొందించిన ‘నషా ముక్త్ భారత్’ కార్యాచరణను క్షేత్రస్థాయిలో అమలు చేసేందుకు దేశవ్యాప్తంగా పోలీసు బలగాలు అంకితభావంతో పనిచేయాలని కోరారు.
పోలీసు అమరవీరుల సంస్మరణ దినోత్సవాన్ని పురస్కరించుకుని బుధవారం న్యూఢిల్లీలోని జాతీయ పోలీసు స్మారకంలో విధి నిర్వహణలో ప్రాణత్యాగం చేసిన సిబ్బందికి ఆయన నివాళులర్పించారు. అనంతరం ‘మాదకద్రవ్యాలపై పోరాటం’ సందేశంతో నిర్వహిస్తున్న దేశవ్యాప్త మోటార్‌సైకిల్ ర్యాలీని జెండా ఊపి ప్రారంభించారు.
స్వాతంత్ర్యం అనంతరం ప్రపంచంలో భారత్ గౌరవప్రదమైన స్థానానికి చేరుకోవడానికి భద్రతా సిబ్బంది త్యాగాలు, అంకితభావమే పునాదిగా నిలిచాయని అమిత్ షా పేర్కొన్నారు. దేశ అంతర్గత భద్రతకు పోలీసులు తొలి, తుది రక్షణశ్రేణిగా వ్యవహరిస్తున్నారని అన్నారు. ఎన్నికలు, పండుగలు, నిరసనలు, సరిహద్దు భద్రత వంటి ప్రతి సందర్భంలోనూ అప్రమత్తంగా విధులు నిర్వర్తిస్తున్న కేంద్ర సాయుధ పోలీసు బలగాల సేవలను కొనియాడారు.
ప్రభుత్వ ఉద్యోగాల్లో పోలీసు సేవ అత్యంత సవాళ్లతో కూడుకున్నదని తెలిపారు. ప్రజలు కుటుంబాలతో పండుగలు జరుపుకుంటున్న సమయంలోనూ పోలీసులు విధుల్లో ఉండి శాంతిభద్రతలు, ట్రాఫిక్ నియంత్రణ, ప్రజల రక్షణకు కృషి చేస్తున్నారని అన్నారు. ప్రజాస్వామ్య పరిరక్షణలో, ఎన్నికలు సజావుగా నిర్వహించడంలో కేంద్ర సాయుధ పోలీసు బలగాల పాత్ర కీలకమని పేర్కొన్నారు. ఇటీవల పశ్చిమ బెంగాల్ అసెంబ్లీ ఎన్నికలు ఒక్క ప్రాణనష్టం కూడా లేకుండా పూర్తికావడంలో భద్రతా బలగాలు విశేష కృషి చేశాయని చెప్పారు.
భారత పోలీసు వ్యవస్థకు 2026 అత్యంత ప్రాధాన్యమైన సంవత్సరమని, మార్చి 31 నాటికి దేశం నక్సలిజం నుంచి విముక్తి సాధించిందని అమిత్ షా పేర్కొన్నారు. నక్సలిజం కారణంగా 1981 నుంచి 2026 మార్చి వరకు 3,600 మందికి పైగా భద్రతా సిబ్బంది, దాదాపు 13,700 మంది అమాయక పౌరులు ప్రాణాలు కోల్పోయారని తెలిపారు. అభివృద్ధి బాటలో ముందుకు సాగుతున్న ప్రాంతాల పురోగతికి అమరవీరుల త్యాగాలే పునాదని అన్నారు. సీఆర్‌పీఎఫ్, కోబ్రా బెటాలియన్, ఛత్తీస్‌గఢ్ పోలీసుల ధైర్యసాహసాలను ప్రశంసించారు.
దశాబ్దాలుగా అంతర్గత భద్రతకు సవాళ్లుగా నిలిచిన కశ్మీర్, ఈశాన్య ప్రాంతం, వామపక్ష తీవ్రవాద ప్రభావిత ప్రాంతాల్లో ఇప్పుడు శాంతి నెలకొని, అభివృద్ధికి అనుకూల వాతావరణం ఏర్పడిందని చెప్పారు. అయితే దేశం ఎదుట ఇంకా సవాళ్లు ఉన్నాయని, మాదకద్రవ్యాల వినియోగం, అక్రమ రవాణాను అరికట్టేందుకు సమన్వయంతో ముందుకు సాగాలని సూచించారు. మాదకద్రవ్యాలు యువత భవిష్యత్తును దెబ్బతీయడంతోపాటు ఆర్థిక వ్యవస్థపై భారం మోపుతున్నాయని, దేశ వ్యతిరేక కార్యకలాపాలకు నిధులు సమకూర్చే మార్గంగా మారుతున్నాయని ఆందోళన వ్యక్తం చేశారు.
1959 అక్టోబర్ 21న లడఖ్‌లోని హాట్ స్ప్రింగ్స్ ప్రాంతంలో చైనా సైనికుల దాడిని ప్రతిఘటిస్తూ పది మంది సీఆర్‌పీఎఫ్ సిబ్బంది ప్రాణత్యాగం చేశారని గుర్తుచేశారు. వారి స్మరణార్థం ఏటా పోలీసు అమరవీరుల సంస్మరణ దినోత్సవాన్ని నిర్వహిస్తున్నట్లు తెలిపారు. ప్రధాని మోదీ 2018లో ప్రారంభించిన జాతీయ పోలీసు స్మారకం, విధుల్లో ప్రాణాలర్పించిన 36,852 మంది పోలీసుల సేవలకు నివాళులర్పించే పవిత్ర ప్రదేశంగా నిలిచిందని పేర్కొన్నారు.
బైక్ ర్యాలీలో వివిధ రాష్ట్రాలు, కేంద్రపాలిత ప్రాంతాలు, కేంద్ర సాయుధ పోలీసు బలగాలు, ఇతర కేంద్ర పోలీసు సంస్థలకు చెందిన సుమారు 90 మంది రైడర్లు పాల్గొంటున్నారు. మాదకద్రవ్యాల వ్యతిరేక సందేశాన్ని ప్రజల్లోకి తీసుకెళ్తూ గుజరాత్‌లోని ఏక్తా నగర్‌కు చేరుకుని ‘ఏక్తా పరేడ్–2026’లో పాల్గొననున్నారు. కార్యక్రమంలో ఎంపీలు కృష్ణప్రసాద్ తెన్నేటి, రాజీవ్ కుమార్, కేంద్ర హోం కార్యదర్శి గోవింద్ మోహన్, ఐబీ డైరెక్టర్ మహేశ్ దీక్షిత్, ఐటీబీపీ డైరెక్టర్ జనరల్ శత్రుజీత్ కపూర్ తదితరులు పాల్గొన్నారు.
