న్యూఢిల్లీ, ట్రైనెట్‌ న్యూస్‌, అక్టోబర్‌ 27: క్రీడల్లో నైతికత, పారదర్శకతను కాపాడేందుకు భారత్‌ గట్టిగా కట్టుబడి ఉందని కేంద్ర యువజన వ్యవహారాలు, క్రీడల శాఖ మంత్రి డాక్టర్‌ మన్‌సుఖ్‌ మాండవీయ తెలిపారు. యునెస్కో అంతర్జాతీయ డోపింగ్‌ నిరోధక కన్వెన్షన్‌ పరిధిలో 2026–27 సంవత్సరానికి సంబంధించి COP10 బ్యూరో మూడో అధికారిక సమావేశానికి, ఫండ్‌ ఆమోద కమిటీ నాలుగో అధికారిక సమావేశానికి ఆయన న్యూఢిల్లీలో అధ్యక్షత వహించారు.
ఈ సందర్భంగా డాక్టర్‌ మాండవీయ మాట్లాడుతూ, “క్రీడల్లో అత్యుత్తమ ప్రతిభతో పాటు నిజాయతీ కూడా ఉండాలని భారత్‌ గట్టిగా విశ్వసిస్తోంది. ప్రతిభ, సాధన, కష్టంతోనే విజయం నిర్ణయించబడాలి; నిషేధిత పదార్థాలు లేదా పద్ధతులతో కాదు. డోపింగ్‌ ముప్పుపై జీరో టాలరెన్స్‌ పాటించాలని, స్వచ్ఛమైన క్రీడలను ప్రోత్సహించాలని ప్రధానమంత్రి నరేంద్ర మోదీ ఎప్పటికప్పుడు స్పష్టం చేస్తున్నారు” అని అన్నారు.
జాతీయ యాంటీ డోపింగ్‌ చట్టం–2022, 2025 సవరణతో దేశంలో డోపింగ్‌ నిరోధక వ్యవస్థను మరింత బలోపేతం చేసినట్లు మంత్రి వివరించారు. ఈ చట్టం, సవరణ 2026 జూలైలో అమల్లోకి వచ్చాయని తెలిపారు. “డోపింగ్‌ ఉల్లంఘనలను మరింత సమర్థంగా ఎదుర్కొనేందుకు, కోచ్‌లు మరియు సరఫరా వ్యవస్థలోని సంబంధిత వర్గాల బాధ్యతను నిర్ధారించే క్రిమినల్‌ నిబంధనలతో మరో సవరణను పార్లమెంట్‌ తదుపరి సమావేశంలో తీసుకొస్తాం” అని వెల్లడించారు.
2025–26లో భారత జాతీయ యాంటీ డోపింగ్‌ సంస్థ (NADA) 7 వేలకు పైగా పరీక్షలు నిర్వహించిందని, 350కి పైగా విద్యా, అవగాహన కార్యక్రమాల ద్వారా 27 వేల మందికి చేరువైందని మాండవీయ తెలిపారు. ప్రమాద అంచనా ఆధారిత పరీక్షలు, సమాచార ఆధారిత దర్యాప్తులపై ప్రత్యేకంగా దృష్టి పెట్టినట్లు చెప్పారు. నిషేధిత పదార్థాలపై సమాచారం అందించే ‘నో యువర్‌ మెడిసిన్‌’ మొబైల్‌ యాప్‌లో ఐదు లక్షలకు పైగా శోధనలు నమోదయ్యాయని, మందుల వినియోగంపై సరైన నిర్ణయాలు తీసుకునేందుకు ఇది సహాయపడుతోందని తెలిపారు.
కేంద్ర యువజన వ్యవహారాలు, క్రీడల శాఖ, విద్యాశాఖ, యునెస్కో మధ్య త్వరలో అవగాహన ఒప్పందం కుదరనుంది. దీని ద్వారా ‘స్పోర్ట్‌ వాల్యూస్‌ ఇన్‌ ఎవ్రీ క్లాస్‌రూమ్‌’ టూల్‌కిట్‌ను భారత్‌లో ప్రవేశపెట్టనున్నారు. క్రీడా విలువలు, నైతికత, నిజాయతీని తరగతి గదుల్లోకి తీసుకెళ్లి లక్షలాది మంది విద్యార్థులకు చేరవేయడం ఈ కార్యక్రమం లక్ష్యం.
డోపింగ్‌పై ప్రపంచస్థాయి సహకారాన్ని ముందుకు తీసుకెళ్లడం, కన్వెన్షన్‌ అమలును బలోపేతం చేయడం ఈ సమావేశం ప్రధాన ఉద్దేశం. ప్రపంచ డోపింగ్‌ నిరోధక వ్యవస్థలో ప్రభుత్వ సంస్థల బాధ్యతలు, పాత్రలను వివరించే ముసాయిదా పత్రంపై చర్చించారు. అలాగే జాతీయ అనుసరణ వేదిక ద్వారా సభ్యదేశాలతో కలిసి విద్యా సామర్థ్యం, పరిశోధనలను పెంపొందించడం, వనరుల సమీకరణ, 2026–2031 ఫండ్‌ కార్యాచరణ వ్యూహం, నిబంధనల అమలు, సామర్థ్య నిర్మాణం వంటి అంశాలు అజెండాలో ఉన్నాయి.
ప్రారంభ సమావేశంలో అజర్‌బైజాన్‌ యువజన, క్రీడల శాఖ మంత్రి, COP10 బ్యూరో ఛైర్‌పర్సన్‌ ఫరీద్‌ గయిబోవ్‌, ఫండ్‌ ఆమోద కమిటీ ఛైర్‌పర్సన్‌ ల్యూక్‌ మెక్‌కాన్‌, భారత క్రీడల శాఖ కార్యదర్శి, COP10 బ్యూరో వైస్‌ ఛైర్‌పర్సన్‌ హరి రంజన్‌ రావు, యునెస్కో సామాజిక విధానాలు, సమ్మిళిత అభివృద్ధి విభాగం డైరెక్టర్‌ గుస్తావో మెరినోతో పాటు జాంబియా, స్పెయిన్‌, రష్యా ప్రతినిధులు పాల్గొన్నారు.
COP10 బ్యూరోలో గ్రూప్‌–4 తరఫున వైస్‌ ఛైర్‌పర్సన్‌గా భారత్‌ ప్రాతినిధ్యం వహిస్తోంది. ప్రపంచ క్రీడా పాలనలో భాగస్వామ్యాన్ని పెంచుతూ, నైతిక క్రీడా విధానాలకు, యునెస్కో డోపింగ్‌ నిరోధక అంతర్జాతీయ కన్వెన్షన్‌ వంటి అంతర్జాతీయ వ్యవస్థలకు మద్దతు ఇస్తున్నట్లు ఈ సంయుక్త సమావేశం చాటిచెప్పింది.
