న్యూఢిల్లీ, అక్టోబర్‌ 15 (ట్రైనెట్‌ న్యూస్‌):
నక్సల్‌ హింసతో గాయపడిన బాధితులకు పునరావాసం కల్పించి, గౌరవప్రదంగా జీవించేలా చేయడం ప్రభుత్వ బాధ్యతని కేంద్ర హోం, సహకార శాఖల మంత్రి అమిత్‌ షా అన్నారు. దివ్యాంగులు, హింస బాధితుల జీవితాల్లో కొత్త ఆశలు నింపేందుకు కేంద్ర ప్రభుత్వం కట్టుబడి ఉందని స్పష్టం చేశారు.
ప్రధాని నరేంద్ర మోదీ ముఖ్యమంత్రిగా, ప్రధానమంత్రిగా ప్రజాసేవలో 25 ఏళ్లు పూర్తి చేసుకున్న సందర్భంగా నిర్వహిస్తున్న ‘సేవా సంకల్ప్‌ అభియాన్‌’లో భాగంగా ఛత్తీస్‌గఢ్‌లో దివ్యాంగులకు సహాయక పరికరాల పంపిణీ కార్యక్రమాన్ని గురువారం వీడియో కాన్ఫరెన్స్‌ ద్వారా ఉద్దేశించి ఆయన ప్రసంగించారు. ఈ కార్యక్రమంలో నక్సల్‌ హింస కారణంగా దివ్యాంగులైన వారు కూడా లబ్ధి పొందుతున్నారని తెలిపారు.
అక్టోబర్‌ 5 నుంచి 7 వరకు జగదల్‌పూర్‌లో నిర్వహించిన శిబిరం ద్వారా 3,600 మందికిపైగా దివ్యాంగులకు ప్రయోజనం చేకూరిందని షా వివరించారు. వీరిలో బస్తర్‌ ప్రాంతానికి చెందినవారే 1,570 మందికిపైగా ఉన్నారని, ఈ సంఖ్య ఆ ప్రాంతం అనుభవించిన బాధను తెలియజేస్తోందన్నారు. ఐదు దశాబ్దాల నక్సల్‌ హింస పేద ఆదివాసీ కుటుంబాలకు తీవ్ర వేదన మిగిల్చిందని పేర్కొన్నారు.
రాజకీయ లక్ష్యాల కోసం ఐఈడీ పేలుళ్లతో అమాయకులను దివ్యాంగులుగా మార్చడం తీవ్రమైన మానవ హక్కుల ఉల్లంఘన అని విమర్శించారు. దేశంలో నక్సలిజాన్ని నిర్మూలించామని పేర్కొన్న ఆయన.. దాని కారణంగా ప్రజలకు మిగిలిన గాయాలను మాన్పడం కూడా అంతే అవసరమని అన్నారు. బాధితులు తిరిగి తమ కాళ్లపై నిలబడేలా అవకాశాలు కల్పించాలని పిలుపునిచ్చారు.
వీల్‌చైర్లు, ట్రైసైకిళ్లు, ఊతకర్రలు, వినికిడి పరికరాలు, స్మార్ట్‌ చేతికర్రలు, కృత్రిమ అవయవాలు అందించడం ద్వారా దివ్యాంగుల రోజువారీ జీవితాన్ని సులభతరం చేయవచ్చని తెలిపారు. ఈ కృషిలో ఛత్తీస్‌గఢ్‌ ప్రభుత్వం, జిల్లా యంత్రాంగం, రాష్ట్ర సాంఘిక సంక్షేమ శాఖ, జైపూర్‌కు చెందిన భగవాన్‌ మహావీర్‌ వికలాంగ్‌ సహాయతా సమితి, భారతీయ జైన్‌ సంఘటన తదితర సంస్థల భాగస్వామ్యాన్ని అభినందించారు.
బస్తర్‌ ఒలింపిక్స్‌, బస్తర్‌ పండుమ్‌, నియద్‌ నెల్లనార్‌, ముఖ్యమంత్రి సామూహిక బస్సు పథకం వంటి కార్యక్రమాలతో ఆ ప్రాంతంలో కొత్త ఉత్సాహం నెలకొంటోందని షా అన్నారు. ఒకప్పుడు కాల్పులు, పేలుళ్లతో భయానక వాతావరణం నెలకొన్న ప్రాంతంలో ఇప్పుడు వేలాది మంది యువత క్రీడల్లో పాల్గొంటూ తమ సంప్రదాయాలను పరిరక్షిస్తున్నారని చెప్పారు. బస్తర్‌ పండుమ్‌ ద్వారా ఆదివాసీ కళలు, సంస్కృతి పునరుజ్జీవానికి కృషి జరుగుతోందన్నారు.
సుమారు 8,526 మంది నక్సలైట్లు లొంగిపోయారని, గతంలో బ్యాంకు ఖాతాలు లేని వారిలో 7,328 మందికి ఖాతాలు తెరిచినట్లు తెలిపారు. పునరావాస చర్యల్లో భాగంగా 455 మందికి ఉద్యోగాలు, 129 మందికి భూములు కేటాయించినట్లు చెప్పారు. ప్రధాన మంత్రి ఆవాస్‌ యోజన కింద 4,014 మందికి ఇళ్లు అందాయని, 2,308 మందికిపైగా ఆదివాసీలకు నైపుణ్య శిక్షణ కల్పించినట్లు వివరించారు.
ప్రాంత అభివృద్ధిలో భాగంగా 6,763 కొత్త రేషన్‌ కార్డులు జారీ చేశామని, 2,808 కుటుంబాలకు ఉచిత విద్యుత్‌ అందించామని తెలిపారు. కొత్తగా 372 రహదారి పనులు ప్రారంభించగా, 670 చిన్న వంతెనల నిర్మాణం కొనసాగుతోందన్నారు. 48,526 మందికి ఆధార్‌ కార్డులు జారీ చేసినట్లు వెల్లడించారు.
ఏర్పాటు చేసిన 500కుపైగా భద్రతా శిబిరాల్లో 200కుపైగా శిబిరాలను ‘షహీద్‌ వీర్‌ గుండాధుర్‌ సేవా డేరా’లుగా మార్చనున్నట్లు అమిత్‌ షా ప్రకటించారు. గతంలో భద్రతా బలగాలు ప్రజలకు రక్షణ కల్పించిన ఈ శిబిరాల నుంచే కేంద్ర, రాష్ట్ర ప్రభుత్వ అధికారులు ప్రజాసేవలు అందిస్తూ అభివృద్ధి చెందిన బస్తర్‌ నిర్మాణానికి కృషి చేస్తారని పేర్కొన్నారు.
