న్యూఢిల్లీ, ట్రైనెట్ న్యూస్, అక్టోబరు 10:
టాంజానియాలోని అరుషాలో నిర్వహించిన 153వ అంతర్ పార్లమెంటరీ యూనియన్ (ఐపీయూ) సభ అక్టోబరు 9న ముగిసింది. చివరి రోజు జరిగిన ఐపీయూ పాలక మండలి సమావేశంలో రాజ్యసభ డిప్యూటీ చైర్మన్ హరివంశ్ నేతృత్వంలోని భారత పార్లమెంటరీ ప్రతినిధి బృందం పాల్గొంది. సమావేశంలో ఐపీయూ అధ్యక్ష ఎన్నికతోపాటు ప్రత్యేక సమావేశాల నివేదికలు, మిగిలిన అజెండా అంశాలను చర్చించారు.
ఐపీయూ అధ్యక్ష ఎన్నికలో భారత్‌కు కేటాయించిన మూడు ఓట్లను హరివంశ్, లోక్‌సభ సభ్యులు అనురాగ్ సింగ్ ఠాకూర్‌, కమల్‌జీత్ సెహ్రావత్ వినియోగించుకున్నారు. రహస్య బ్యాలెట్ ద్వారా జరిగిన ఎన్నికలో ఆస్ట్రేలియా ప్రతినిధుల సభ స్పీకర్ మిల్టన్ డిక్ తదుపరి ఐపీయూ అధ్యక్షుడిగా ఎన్నికయ్యారు.
ఫలితం ప్రకటించిన అనంతరం హరివంశ్, భారత ప్రతినిధి బృంద సభ్యులు మిల్టన్ డిక్‌ను ప్రత్యక్షంగా అభినందించి, ఆయన పదవీకాలం విజయవంతంగా సాగాలని ఆకాంక్షించారు. అనంతరం లోక్‌సభ స్పీకర్ పంపిన అభినందన లేఖను రాజ్యసభ సభ్యుడు డాక్టర్ సస్మిత్ పాత్రా ఆయనకు అందజేశారు.
పాలక మండలి సమావేశం అనంతరం జరిగిన సభలో అరుషా ప్రకటనను ఆమోదించారు. దివ్యాంగుల హక్కులు, సాధికారతను ప్రోత్సహించేందుకు పార్లమెంటరీ వ్యూహాల ద్వారా అందరికీ సమ్మిళిత సామాజిక అభివృద్ధి సాధించాలనే తీర్మానానికి కూడా ఆమోదం తెలిపారు. హిమాలయ ప్రాంతంతోపాటు ఇతర దుర్బల ప్రాంతాల్లో వాతావరణ సంబంధిత విపత్తులను ఎదుర్కొనేందుకు, విపత్తులను తట్టుకునే సామర్థ్యాన్ని బలోపేతం చేసేందుకు అత్యవసర పార్లమెంటరీ చర్యలు చేపట్టాలనే తీర్మానాన్ని స్వీకరించారు.
అనంతరం టాంజానియా జాతీయ అసెంబ్లీ స్పీకర్, సభ అధ్యక్షుడు ముస్సా అజ్జాన్ జుంగు సమావేశాలు ముగిసినట్లు ప్రకటించారు. అక్టోబరు 5 నుంచి 9 వరకు జరిగిన ఈ సభలో భారత ప్రతినిధి బృందం చర్చల్లో పాల్గొని, తీర్మానాలు, తుది నిర్ణయాల రూపకల్పనకు సహకరించింది.
