న్యూఢిల్లీ, ట్రైనెట్ న్యూస్, నవంబర్ 06:
కార్మిక కోడ్‌లు, కార్మిక సంక్షేమం, సామాజిక భద్రతపై అవగాహన పెంపొందించేందుకు మధ్యప్రదేశ్‌లోని ఉజ్జయిని జిల్లా నాగ్దాలో ‘శ్రమ్ సంవాద్’ కార్యక్రమం నిర్వహించారు. కేంద్ర కార్మిక, ఉపాధి మంత్రిత్వ శాఖ, మధ్యప్రదేశ్ కార్మిక శాఖ సంయుక్తంగా గ్రాసిమ్ ఇండస్ట్రీస్ సహకారంతో నవంబర్ 4న ఈ కార్యక్రమాన్ని చేపట్టాయి.
యాజమాన్యాలు, మానవ వనరులు, న్యాయ, ఆర్థిక విభాగాల నిపుణులకు కార్మిక కోడ్‌లు, వాటి నిబంధనలపై అవగాహన కల్పించడం కార్యక్రమ ప్రధాన లక్ష్యం. కేంద్ర–రాష్ట్ర సమన్వయం, కార్మిక సంక్షేమం, సామాజిక రక్షణ వ్యవస్థల బలోపేతంపైనా దృష్టిసారించారు.
కేంద్ర కార్మిక శాఖ డైరెక్టర్ ఎస్‌.ఆర్‌. దత్తా అధ్యక్షత వహించగా, గ్రాసిమ్ ఇండస్ట్రీస్ ఉపాధ్యక్షుడు, విశ్రాంత స్క్వాడ్రన్ లీడర్ ఎస్‌.కె. సింగ్ సహాధ్యక్షుడిగా వ్యవహరించారు. కేంద్ర, రాష్ట్ర ప్రభుత్వ అధికారులు, ఈపీఎఫ్‌ఓ, ఈఎస్‌ఐసీ, కార్మిక సంక్షేమ సంస్థల ప్రతినిధులతో పాటు పరిశ్రమలు, యాజమాన్యాలు, వివిధ వృత్తి విభాగాలకు చెందిన 150 మందికి పైగా పాల్గొన్నారు.
సాంకేతిక సమావేశాల్లో నాలుగు కార్మిక కోడ్‌ల కింద యాజమాన్యాలు పాటించాల్సిన నిబంధనలు, చట్టబద్ధ బాధ్యతలను అధికారులు వివరించారు. ప్రధానమంత్రి వికసిత్ భారత్ రోజ్‌గార్ యోజన, ప్రధానమంత్రి శ్రమ్ యోగి మాన్‌ధన్ పథకాలపైనా ప్రత్యేక అవగాహన కల్పించారు.
యాజమాన్యాల కోసం రూపొందించిన నిబంధనల అనుసరణ మార్గదర్శిని, తరచూ అడిగే ప్రశ్నల సంకలనాన్ని ప్రతినిధులకు అందజేశారు. ప్రశ్నోత్తర కార్యక్రమంలో కార్మిక కోడ్‌లు, సామాజిక భద్రత నిబంధనలపై సందేహాలను నివృత్తి చేశారు. కార్మిక సంస్కరణల సమర్థ అమలుకు ప్రభుత్వం, పరిశ్రమల మధ్య సమన్వయాన్ని ఈ కార్యక్రమం బలోపేతం చేసింది.
