న్యూఢిల్లీ, ట్రైనెట్ న్యూస్, అక్టోబర్ 13: దేశ రాజధానిలో వాయు కాలుష్య నియంత్రణ చర్యలను కేంద్ర పర్యావరణ, అటవీ, వాతావరణ మార్పుల శాఖ మంత్రి భూపేందర్‌ యాదవ్‌, ఢిల్లీ ముఖ్యమంత్రి రేఖా గుప్తా మంగళవారం క్షేత్రస్థాయిలో సమీక్షించారు. అధిక కాలుష్యం నమోదయ్యే ఆనంద్‌ విహార్‌ ప్రాంతంలో ఢిల్లీ ప్రభుత్వం చేపడుతున్న నివారణ చర్యలను పరిశీలించారు. అనంతరం శాస్త్రి పార్క్‌లోని ఢిల్లీ కాలుష్య నియంత్రణ కమిటీ (డీపీసీసీ) ఆధ్వర్యంలో పనిచేస్తున్న కృత్రిమ మేధ ఆధారిత సమీకృత కమాండ్‌ అండ్‌ కంట్రోల్‌ కేంద్రాన్ని సందర్శించారు.
ఈ సందర్భంగా ఆనంద్‌ విహార్‌లోని స్వామి వివేకానంద అంతర్రాష్ట్ర బస్‌ టెర్మినల్‌ వద్ద 150 కొత్త విద్యుత్‌ బస్సులను జెండా ఊపి ప్రారంభించారు. ఆనంద్‌ విహార్‌ ఐఎస్‌బీటీ, నంద్‌ నగ్రి డిపో, రోహిణి సెక్టార్‌–37 డిపో, నాంగ్లోయ్‌, కేశోపూర్‌ డిపోల్లో ప్రజల వినియోగానికి ఏర్పాటు చేసిన విద్యుత్‌ వాహన ఛార్జింగ్‌ కేంద్రాలను వర్చువల్‌గా ప్రారంభించారు.
ఢిల్లీ వ్యాప్తంగా డీపీసీసీ ఏర్పాటు చేసిన 13 కొత్త నిరంతర పరిసర గాలి నాణ్యత పర్యవేక్షణ కేంద్రాలను కూడా ప్రారంభించారు. ఈ కేంద్రాలను సమీకృత కమాండ్‌ అండ్‌ కంట్రోల్‌ కేంద్రంతో అనుసంధానించడం ద్వారా గాలి నాణ్యత పర్యవేక్షణను మరింత మెరుగుపరచనున్నారు.
విద్యుత్‌ వాహనాల వినియోగాన్ని ప్రోత్సహించడం, ఆనంద్‌ విహార్‌లో కాలుష్య నియంత్రణ చర్యలు చేపట్టడం, గాలి నాణ్యత పర్యవేక్షణ వ్యవస్థను విస్తరించడంపై ఢిల్లీ ప్రభుత్వాన్ని భూపేందర్‌ యాదవ్‌ అభినందించారు.
కార్యక్రమంలో ఢిల్లీ పర్యావరణ, అటవీ, వన్యప్రాణి శాఖ మంత్రి మన్‌జిందర్‌ సింగ్‌ సిర్సా, రవాణా శాఖ మంత్రి డాక్టర్‌ పంకజ్‌ కుమార్‌ సింగ్‌, తూర్పు ఢిల్లీ ఎంపీ, కేంద్ర రోడ్డు రవాణా–రహదారుల శాఖ సహాయ మంత్రి హర్ష్‌ మల్హోత్రాతోపాటు కేంద్ర, ఢిల్లీ ప్రభుత్వాల ఉన్నతాధికారులు పాల్గొన్నారు.
