గురజాడ అప్పారావు జయంతి వేడుకలు ఘనంగా
త్యాగరాయ గానసభలో ‘ఎందరో మహానుభావులు – మధుర స్మృతులు’ కార్యక్రమం
గురజాడ సాహిత్య సేవలను స్మరించిన ప్రముఖులు
హైదరాబాద్, ట్రైనెట్ న్యూస్, సెప్టెంబర్ 23:
తెలుగు సాహిత్యానికి, సామాజిక సంస్కరణలకు విశిష్ట సేవలందించిన మహాకవి గురజాడ అప్పారావు జయంతి వేడుకలు బుధవారం హైదరాబాద్‌లోని శ్రీ త్యాగరాయ గానసభలో ఘనంగా నిర్వహించారు. తెలంగాణ రాష్ట్ర భాషా సాంస్కృతిక శాఖ సౌజన్యంతో, ‘ఎందరో మహానుభావులు – మధుర స్మృతులు’ కార్యక్రమంలో భాగంగా గానసభలోని కళా సుబ్బారావు కళావేదికపై ఈ కార్యక్రమం జరిగింది.
ఈ కార్యక్రమానికి ముఖ్య అతిథిగా తెలంగాణ భాషా సాంస్కృతిక శాఖ సంచాలకులు డా. ఏనుగు నరసింహారెడ్డి, IAS హాజరయ్యారు. సభకు శ్రీ త్యాగరాయ గానసభ అధ్యక్షులు కళా వి.ఎస్. జనార్ధన్ మూర్తి అధ్యక్షత వహించారు. విశిష్ట అతిథులుగా కవి, సాహితీవేత్త శ్రీమతి శైలజామిత్ర, బృందావనం సంస్థ అధ్యక్షులు వై. సుబ్రహ్మణ్యం తదితరులు పాల్గొన్నారు.
ఈ సందర్భంగా గురజాడ అప్పారావు చిత్రపటానికి పూలమాలలు వేసి ఘనంగా నివాళులర్పించారు. అనంతరం ఆయన తెలుగు సాహిత్యానికి అందించిన సేవలు, సామాజిక చైతన్యానికి చేసిన కృషి, అభ్యుదయ భావజాలం గురించి వక్తలు వివరించారు. సమాజంలోని మూఢనమ్మకాలు, అసమానతలు, సామాజిక దురాచారాలను తన రచనల ద్వారా ప్రశ్నించిన గురజాడ అప్పారావు తెలుగు సాహిత్య చరిత్రలో చిరస్థాయిగా నిలిచారని పేర్కొన్నారు.
‘దేశమంటే మట్టికాదోయ్... దేశమంటే మనుషులోయ్’ అనే గురజాడ సందేశం నేటికీ సమాజానికి మార్గదర్శకంగా నిలుస్తోందని వక్తలు తెలిపారు. ఆయన రచనలు ప్రజల్లో సామాజిక బాధ్యత, మానవతా దృక్పథం, సమానత్వ భావనలను పెంపొందించాయని గుర్తుచేశారు. ముఖ్యంగా కన్యాశుల్కం వంటి రచనల ద్వారా సమాజంలోని సమస్యలను స్పష్టంగా ప్రతిబింబించి సంస్కరణల అవసరాన్ని చాటిచెప్పారని పేర్కొన్నారు.
గురజాడ సాహిత్య సంపదను భావితరాలకు పరిచయం చేయడంతో పాటు, ఆయన ఆశయాలను కొనసాగించాల్సిన బాధ్యత ప్రతి ఒక్కరిపై ఉందని ప్రముఖులు పిలుపునిచ్చారు. శ్రీ త్యాగరాయ గానసభ ఆధ్వర్యంలో జరిగిన ఈ కార్యక్రమం సాహితీ అభిమానులు, కళాకారులు, ప్రముఖుల సమక్షంలో విజయవంతంగా ముగిసింది.
