ఆకట్టుకున్న ‘ఎరుక’ నాటిక ప్రదర్శన
రవీంద్ర భారతి, ట్రైనెట్ న్యూస్ 25: ప్రముఖ రచయిత మాడభూషి దివాకరబాబు రచించిన ‘ఎరుక’ నాటిక రవీంద్రభారతిలో ప్రేక్షకులను విశేషంగా ఆకట్టుకుంది. సామాజిక స్పృహను, మానవీయ విలువలను ప్రతిబింబించేలా రూపొందిన ఈ నాటిక ప్రేక్షకులను ఆలోచింపజేసింది. ఈ నాటికలో ఆచార్య కోట్ల హనుమంతరావు ప్రధాన పాత్రలో నటించి తన అభినయంతో ప్రేక్షకులను ఆకట్టుకున్నారు. ముఖ్యంగా కుమారి కోట్ల సన్నిధి ఎలుక పాత్రలో లీనమై, పాత్రకు జీవం పోస్తూ.. అద్భుతమైన నటనను ప్రదర్శించారు. ఆమె హావభావాలు, సంభాషణల పలుకుబడి, పాత్రలోని భావోద్వేగాలను ఆవిష్కరించిన తీరు ప్రేక్షకుల ప్రశంసలు అందుకుంది. కార్యక్రమానికి తెలుగు విశ్వవిద్యాలయం వైస్ ఛాన్సలర్ ఆచార్య వెలుదండ నిత్యానందరావు, ప్రముఖ దర్శకుడు రేలంగి నర్సింగరావు, ఆచార్య అలేఖ్య, డీసీఎన్ మూర్తి తదితర ప్రముఖులు అతిథులుగా పాల్గొన్నారు. ఈ సందర్భంగా వారు మాట్లాడుతూ.. ‘ఎరుక’ నాటికలోని సామాజిక అంశాలను, రచయిత మాడభూషి దివాకరబాబు రచనా ప్రతిభను ప్రశంసించారు. సమాజంలో మారుతున్న విలువలు, మానవ సంబంధాలు, వ్యక్తి బాధ్యతలను నాటిక ద్వారా చక్కగా ఆవిష్కరించారని పేర్కొన్నారు.
సాహిత్యం, నాటకరంగం, సమాజం మధ్య ఉన్న అనుబంధాన్ని చాటిచెప్పేలా ‘ఎరుక’ ప్రదర్శన సాగింది. నాటిక ముగిసిన అనంతరం ప్రేక్షకులు కళాకారులకు అభినందనలు తెలిపారు. ముఖ్యంగా కుమారి కోట్ల సన్నిధి ఎలుక పాత్రలో చూపిన ప్రతిభకు విశేష స్పందన లభించింది.
